സ്വപ്നയുടെ വാക്കുകള് പ്രകോപനം ഉണ്ടാക്കിയിട്ടുണ്ട്... കലാപാഹ്വാനത്തിന് ചുമത്തിയ കേസ് നിലനില്ക്കും; സ്വപ്ന സുരേഷിനെതിരായ അന്വേഷണത്തില് ഇടപെടാന് കാരണങ്ങളില്ലെന്ന് ഹൈക്കോടതി; ജലീലിന്റെ പരാതിയില് സ്വപ്ന സുരേഷിനും പി.സി.ജോര്ജിനുമെതിരെ രജിസ്റ്റര് ചെയ്ത കേസില് കുറ്റപത്രം ഉടന് സമര്പ്പിക്കും
സ്വപ്ന സുരേഷിനെതിരായ അന്വേഷണത്തില് ഇടപെടാന് കാരണങ്ങളില്ലെന്ന് ഹൈക്കോടതി. കേസ് റദ്ദാക്കണമെന്ന സ്വപ്നയുടെ ഹര്ജി തള്ളിക്കൊണ്ടാണ് കോടതിയുടെ നിരീക്ഷണം. കലാപാഹ്വാനത്തിന് ചുമത്തിയ കേസ് നിലനില്ക്കുമെന്ന് ഹൈക്കോടതി വ്യക്തമാക്കി. കലാപാഹ്വാനം , ഗൂഢാലോചന കേസുകള് റദ്ദാക്കണമെന്ന് ആവശ്യപ്പെട്ട് സ്വപ്ന സമര്പ്പിച്ച ഹര്ജികള് തള്ളി പുറപ്പെടുവിച്ച ഉത്തരവിലാണ് കോടതിയുടെ നിരീക്ഷണം.
സ്വപ്നയുടെ വാക്കുകള് പ്രകോപനം ഉണ്ടാക്കിയിട്ടുണ്ട്. ഈ സാഹചര്യത്തില് സെക്ഷന് 153 പ്രകാരം എടുത്ത കേസ് നിലനില്ക്കും. കേസുമായി ബന്ധപ്പെട്ട് നടക്കുന്ന അന്വേഷണത്തില് ഇടപെടേണ്ട യുക്തിസഹമായ കാരണങ്ങളിലെന്ന് ഹൈക്കോടതി നിരീക്ഷിച്ചു. അപൂര്വങ്ങളില് അപൂര്വമായ കേസുകളില് മാത്രമാണ് എഫ്ഐആറുകള് റദ്ദാക്കുന്നത്. സ്വപ്നയുടെ കേസുകള് അത്തരം വിഭാഗത്തില് ഉള്പ്പെടുന്നതല്ലെന്നും കോടതി വ്യക്തമാക്കി. അന്വേഷണം പ്രാഥമികഘട്ടത്തില് ആണെന്നും കോടതി വ്യക്തമാക്കി. കുറ്റപത്രം സമര്പ്പിച്ച ശേഷം ആവശ്യമെങ്കില് കേസ് റദ്ദാക്കാന് വീണ്ടും കോടതിയെ സമീപിക്കാമെന്ന് ജസ്റ്റിസ് സിയാദ് റഹ്മാന് വ്യക്തമാക്കി.
അതേസമയം മുന് മന്ത്രി കെ.ടി.ജലീലിന്റെ പരാതിയില് തിരുവനന്തപുരം കന്റോണ്മെന്റ് പൊലീസ് സ്വപ്ന സുരേഷിനും പി.സി.ജോര്ജിനുമെതിരെ രജിസ്റ്റര് ചെയ്ത കേസില് കുറ്റപത്രം ഉടന് സമര്പ്പിക്കുമെന്നാണ് സൂചന.
തിരുവനന്തപുരത്തേയും പാലക്കാട്ടേയും കേസുകള് റദ്ദാക്കണമെന്ന സ്വപ്നയുടെ ഹര്ജികള് ഹൈക്കോടതി തള്ളിയതിന് പിന്നാലെയാണ് കേസില് കുറ്റപത്രം നല്കാനുള്ള നടപടികള് അന്വേഷണ സംഘം വേഗത്തിലാക്കിയത്. ജലീലിന്റെ പരാതിയില് കേസെടുത്തത് കന്റോണ്മെന്റ് പൊലീസ് ആണെങ്കിലും നിലവില് അന്വേഷണം നടത്തുന്നത് പ്രത്യേക സംഘമാണ്.
സ്വപ്നയ്ക്കും പി.സി.ജോര്ജിനും പുറമേ സരിത്തിനെയും ഈ കേസില് പ്രതിയാക്കും. കന്റോണ്മെന്റ് പൊലീസ് എടുത്ത കേസ് പ്രകാരം സ്വപ്ന സുരേഷിനും പി.സി.ജോര്ജിനും എതിരെ ജാമ്യം ലഭിക്കാവുന്ന വകുപ്പുകളാണ് ചുമത്തിയിരുന്നത്. എന്നാല് പ്രത്യേക അന്വേഷണ സംഘം കോടതിയില് റിപ്പോര്ട്ട് നല്കിയത് ജാമ്യം ലഭിക്കാത്ത വകുപ്പുകള് ചേര്ത്താണ്. എന്നാലും അറസ്റ്റിന് നീക്കമുണ്ടാകില്ല എന്നാണ് സൂചന. പകരം കുറ്റപത്രം വേഗം നല്കി, വിചാരണ നടപടികളിലേക്ക് നീങ്ങാനാണ് അന്വേഷണ സംഘം ലക്ഷ്യമിടുന്നതെന്നാണ് ഉന്നത പൊലീസ് വൃത്തങ്ങള് നല്കുന്ന സൂചന.
https://www.facebook.com/Malayalivartha
