കണ്ണീരോടെ വിട.....വാഹന അപകടത്തില്‍ കൊല്ലപ്പെട്ട പിതാവിനും മകനും മുണ്ടയില്‍ക്കോണം ഗ്രാമം വിട നല്‍കിയത് കണ്ണീരോടെ..... നഗരൂര്‍ മുണ്ടയില്‍ക്കോണം കരിക്കകത്തില്‍ വീട്ടില്‍ പ്രദീപ് എന്നറിയപ്പെടുന്ന സുനില്‍കുമാര്‍ (45) ,ഇളയ മകന്‍ ശ്രീദേവ്(5) എന്നിവര്‍ ശനി രാത്രി നഗരൂര്‍ കല്ലിങ്ങലില്‍ വച്ച് ഇവര്‍ സഞ്ചരിച്ചിരുന്ന ബൈക്കില്‍ കാര്‍ ഇടിക്കുകയായിരുന്നു. രണ്ടുപേരും സംഭവസ്ഥലത്തു വച്ചുതന്നെ മരണമടഞ്ഞു. ബൈക്കില്‍ ഉണ്ടായിരുന്ന മൂത്ത മകന്‍ ശ്രീഹരിക്കു ഗുരുതരമായി പരുക്കേറ്റു.

കരിക്കകത്തില്‍ വീട്ടില്‍ സുനില്‍കുമാര്‍, ഇളയ മകന്‍ ശ്രീദേവ് എന്നിവരുടെ മൃതദേഹങ്ങള്‍ നഗരൂര്‍ ജംഗ്ഷനില്‍ പൊതു ദര്‍ശനത്തിന് എത്തിച്ചപ്പോള്‍.
പിതാവും രണ്ടു മക്കളും നഗരൂര്‍ കടയില്‍ നിന്നും സാധനങ്ങള്‍ വാങ്ങി വീട്ടിലേക്ക് മടങ്ങുമ്പോള്‍ കിളിമാനൂര്‍ ഭാഗത്തു നിന്നും അമിത വേഗത്തില്‍ തെറ്റായ ദിശയിലൂടെ വന്ന കാര്‍ സുനില്‍കുമാറും മക്കളും സഞ്ചരിച്ചിരുന്ന ബൈക്കിനെ ഇടിച്ചു നിരക്കിക്കൊണ്ടുപോയി റോഡിന്റെ വശത്തെ സുരക്ഷാ വേലിയിലേക്ക് ഇടിച്ചു നിര്‍ത്തുകയായിരുന്നു.

ഓടിക്കൂടിയ നാട്ടുകാര്‍ അപകടത്തില്‍പെട്ട സുനില്‍കുമാറിനെയും മൂത്ത മകന്‍ ശ്രീഹരിയെയും ആശുപത്രിയിലേക്ക് കൊണ്ടു പോയി 10 മിനിറ്റ് കഴിഞ്ഞതിനു ശേഷമാണ് തോടിന്റെ വശത്തായി ശ്രീദേവ് മരിച്ചു കിടക്കുന്നത് കണ്ടത്..


ഇന്നലെ വൈകിട്ട് വീട്ടിലെത്തിച്ച മൃതദേഹങ്ങള്‍ പൊതു ദര്‍ശനത്തിനു വച്ചശേഷം 6.30ന് സംസ്‌കരിച്ചു. അപകടത്തിനു കാരണമായ കാറിലുണ്ടായിരുന്ന മടവൂര്‍ ഞാറയില്‍കോണം ഷിറാസ് മന്‍സിലില്‍ ഷിറാസ്(30),ഞാറയില്‍കോണം കരിമ്പുവിള ജെബി മന്‍സിലില്‍ ജാഫര്‍ഖാന്‍(42) എന്നിവരെ നഗരൂര്‍ പൊലീസ് അറസ്റ്റ് ചെയ്തു. ഇവര്‍ മദ്യപിച്ചിരുന്നതായാണ് പ്രാഥമിക നിഗമനമെന്നും പൊലീസ് .

അതേസമയം ശ്രീഹരി അപകടനില തരണം ചെയ്തതായി ആശുപത്രി അധികൃതര്‍ . കെട്ടിട നിര്‍മാണ തൊഴിലാളിയായ സുനില്‍കുമാറിന്റെ ഏക വരുമാനത്തിലാണു ഭാര്യാ മാതാവ് കൂടി ഉള്‍പ്പെടുന്ന കുടുംബം കഴിയുന്നത്. കോവിഡ് കാലത്തിനു മുന്‍പ് വിദേശത്തായിരുന്ന സുനില്‍കുമാര്‍ കോവിഡ് വ്യാപനത്തെത്തുടര്‍ന്ന് നാട്ടിലെത്തുകയായിരുന്നു.