അഞ്ചു വയസുകാരൻ കുഴഞ്ഞു വീണു മരിച്ച സംഭവത്തിൽ ദുരൂഹത. ജന്മദിനാഘോഷം കഴിഞ്ഞ് ഉടനെ കുട്ടി കുഴഞ്ഞു വീഴുകയായിരുന്നു. ഇതേതുടർന്ന് കുട്ടിയുടെ മരണത്തില്‍ സംശയം പ്രകടിപ്പിച്ച് ബന്ധുക്കള്‍ രംഗത്ത് എത്തി. ഇക്കഴിഞ്ഞ ശനിയാഴ്ചയാണ് സംഭവം.

ഭക്ഷണത്തില്‍ നിന്നോ മറ്റോ വിഷാംശം കലര്‍ന്നതാണ് മരണകാരണമെന്ന് ഡോക്ടര്‍ പറഞ്ഞതായി ബന്ധുക്കള്‍ പറയുന്നു. സംഭവ ദിവസം തുറവൂര്‍ വളമംഗലം സ്വദേശി ലിന്റോ എന്ന 5 വയസുകാരന്റ ജന്മദിനാഘോഷം വീട്ടില്‍ നടക്കുകയായിരുന്നു. തുടർന്ന് കടയില്‍ നിന്ന് വാങ്ങിയ കേക്കും മറ്റു ഭക്ഷണവും കഴിച്ച ശേഷം മൂത്ത കുട്ടി ഛര്‍ദ്ദില്‍ ബാധിച്ച് ആശുപത്രിയിലായി.

അതേസമയം തന്നെ ഒപ്പമുണ്ടായിരുന്ന 5 വയസ്സുകാരന്‍ കുഴഞ്ഞു വീഴുകയായിരുന്നു. ഇതേതുടർന്ന് ഉടന്‍ തന്നെ തുറവൂര്‍ ആശുപത്രിയില്‍ എത്തിച്ചു. പിന്നാലെ വിദഗ്ദ ചികിത്സക്കായ് എറണാകുളത്തെ സ്വകാര്യ ആശുപത്രിയിലെത്തിച്ച 5 വയസുകാരന്‍ ബുധനാഴ്ച മരിച്ചു. ഭക്ഷണത്തില്‍ നിന്നോ കേക്കില്‍ നിന്നോ ആയിരിക്കാം കുട്ടിയുടെ ശരീരത്തില്‍ വിഷാംശം ഉണ്ടായതെന്ന് സംശയമുണ്ട്. ലിന്റോയുടെ കണ്ണുകളും മറ്റ് അവയവങ്ങളും ദാനം ചെയ്തു.