മങ്കയം വെള്ളച്ചാട്ടത്തിനടുത്ത് കുടുംബാംഗങ്ങള്‍ക്കൊപ്പം കുളിക്കുന്നതിനിടെ അപ്രതീക്ഷിതമായുണ്ടായ മലവെള്ളപ്പാച്ചിലില്‍ പെട്ട് ഒമ്പതു വയസ്സുകാരിക്ക് ദാരുണാന്ത്യം.... യുവതിയെ കാണാതായി, പത്തു പേരാണ് ഒഴുക്കില്‍പെട്ടത് ,എട്ടു പേരെ നാട്ടുകാര്‍ രക്ഷപ്പെടുത്തി, കാണാതായ യുവതിയ്ക്കായി തെരച്ചില്‍ തുടരുന്നു

നെടുമങ്ങാടിന് സമീപത്തായി പാലോട് മങ്കയം വെള്ളച്ചാട്ടത്തിനടുത്താണ് സംഭവമുണ്ടായത്. കുട്ടിയുടെ പിതാവിന്റെ സഹോദരിയായ യുവതിയെയാണ് കാണാതായത്.


നെടുമങ്ങാട് സ്വദേശികളായ ഏഴ് കുട്ടികള്‍ അടങ്ങിയ അടുത്ത ബന്ധുക്കളായ രണ്ട് കുടുംബങ്ങളിലെ പത്തു പേരാണ് ഒഴുക്കില്‍പെട്ടത്. എട്ടുപേരെ നാട്ടുകാര്‍ രക്ഷപ്പെടുത്തി. നെടുമങ്ങാട് കുറക്കോട് കുന്നുംപുറത്ത് സുനാജ് മന്‍സിലില്‍ സുനാജ്, അജ്മി ദമ്പതികളുടെ മകള്‍ നസ്‌റിയ ഫാത്തിമയാണ് (9) മരിച്ചത്. കാണാതായ ഷാനിക്കായി (33) തെരച്ചില്‍ തുടരുന്നു.

.കനത്ത മഴയെത്തുടര്‍ന്ന് അടച്ചിട്ടിരുന്ന മങ്കയം വെള്ളച്ചാട്ടം കഴിഞ്ഞ വെള്ളിയാഴ്ചയാണ് ടൂറിസ്റ്റുകള്‍ക്കായി തുറന്നുകൊടുത്തത്.
ഇന്നലെ വൈകുന്നേരം അഞ്ചരയോടെയാണ് സംഭവമുണ്ടായത്. ഹൈറു (6), ഷഫീക് (32), ഫാത്തിമ (22), സുനൈന (18), ഐഷു (5), ഒമര്‍ ഫറൂക് (4), ഫാദിയ (11), ഇര്‍ഷാന്‍ (13) എന്നിവരെയാണ് നാട്ടുകാര്‍ രക്ഷപ്പെടുത്തിയത്. പരുക്കേറ്റ ഹൈറുവിനെ എസ്.എ.ടി ആശുപത്രിയില്‍ പ്രവേശിപ്പിച്ചു.



ചുള്ളിമാനൂരിലെ ഓഡിറ്റോറിയത്തില്‍ നടന്ന വിവാഹത്തില്‍ പങ്കെടുത്തശേഷം കുട്ടികളുടെ ആഗ്രഹപ്രകാരമാണ് വൈകിട്ട് മങ്കയം വെള്ളച്ചാട്ടം കാണാനായി കുടുംബങ്ങള്‍ എത്തിയത്. ആറ് മണിവരെയാണ് ഇവിടത്തേക്ക് വനംവകുപ്പ് പാസ് നല്‍കുന്നത്. അഞ്ചു മണി കഴിഞ്ഞതിനാല്‍ നല്‍കിയില്ല. തുടര്‍ന്നാണ് അപകട മേഖലയല്ലാത്ത വാഴത്തോപ്പ് ഭാഗത്തെത്തി കുളിക്കാനിറങ്ങിയത്. അതിനിടെയാണ് മലവെള്ളപ്പാച്ചിലുണ്ടായത് .

നാട്ടുകാര്‍ എട്ടുപേരെ രക്ഷപ്പെടുത്തിയെങ്കിലും രണ്ടുപേരെ കണ്ടെത്താനായില്ല. തുടര്‍ന്ന് നടത്തിയ തെരച്ചിലില്‍ അരകിലോമീറ്റര്‍ അകലെ നിന്നാണ് ഫാത്തിമയെ കണ്ടെത്തിയത്. ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. നാട്ടുകാരുടെ സഹായത്തോടെ പൊലീസും ഫയര്‍ഫോഴ്‌സും ഷാനിയ്ക്കായി രാത്രി വൈകിയും തെരച്ചില്‍ നടത്തിയെങ്കിലും കണ്ടെത്താനായിട്ടില്ല. ശക്തമായ ഒഴുക്ക് തെരച്ചിലിന് തടസ്സമായി.