ആഹാരം പാഴാക്കല്‍.... എട്ടു ശുചീകരണ തൊഴിലാളികള്‍ കുറ്റക്കാരാണെന്ന് കണ്ടെത്തി.... ഓണാഘോഷത്തില്‍ മുഴുവന്‍ സമയം പങ്കെടുക്കാനായി കഴിയാത്ത ദേഷ്യത്തില്‍ സദ്യ മാലിന്യക്കുഴിയില്‍ തള്ളിയ സംഭവത്തില്‍ ഹെല്‍ത്ത് ഇന്‍സ്‌പെക്ടര്‍ ഇന്ന് റിപ്പോര്‍ട്ട് നല്‍കും.

ശനിയാഴ്ചയാണ് സംഭവം നടന്നത്. ചാല സര്‍ക്കിള്‍ എച്ച്.ഐ. ആണ് ഹെല്‍ത്ത് സൂപ്പര്‍വൈസര്‍ക്ക് കൈമാറുന്നത്. ആഹാരം പാഴാക്കാനുണ്ടായ സാഹചര്യത്തെ ക്കുറിച്ചാണ് അന്വേഷണം നടക്കുന്നത്.

സദ്യ കളയുന്നതിന്റെ ദൃശ്യം പ്രചരിച്ചതോടെ ജീവനക്കാര്‍ക്കെതിരേ കടുത്ത പ്രതിഷേധമുണ്ടായി. സംഭവം ശ്രദ്ധയില്‍പ്പെട്ട ആരോഗ്യ സ്റ്റാന്‍ഡിങ് കമ്മിറ്റി അധ്യക്ഷ റിപ്പോര്‍ട്ട് ആവശ്യപ്പെട്ടിരുന്നു. താത്കാലിക ജീവനക്കാരാണ് പ്രതിഷേധിച്ചത്. അച്ചടക്ക നടപടിയുടെ ഭാഗമായി ചാല ഹെല്‍ത്ത് സര്‍ക്കിളിലേക്കു മാറിയെത്തിയയാളാണ് നേതൃത്വം നല്‍കിയത്.

നിര്‍ദേശങ്ങള്‍ ലംഘിച്ച് ആഘോഷം നടത്താന്‍ ശ്രമിച്ചത് അംഗീകരിക്കാനാകില്ലെന്നും ആഹാരം കളഞ്ഞത് വലിയ തെറ്റാണെന്നും സെക്രട്ടറി പറഞ്ഞു.
പ്രധാന ഓഫീസില്‍ വെള്ളിയാഴ്ചയും സോണല്‍ ഓഫീസുകളില്‍ ശനിയാഴ്ചയും ഓണാഘോഷം നടത്താനായിരുന്നു തീരുമാനം.

പൂക്കളമിട്ടശേഷം ജോലിക്ക് ഇറങ്ങണമെന്നായിരുന്നു നിര്‍ദേശം. രാവിലെ ഏഴുമുതല്‍ ഉച്ചയ്ക്ക് ഒരുമണിവരെയാണ് ശുചീകരണ ത്തൊഴിലാളികളുടെ ജോലിസമയം.
പൂക്കളമിട്ടശേഷം പതിവുപോലെ ജോലി ചെയ്യണമെന്നും പിന്നീട് സദ്യവിളമ്പണമെന്നുമായിരുന്നു സര്‍ക്കുലരിലുണ്ടായിരുന്നത്. ശനിയാഴ്ച ഓണാഘോഷത്തിനെത്തിയപ്പോള്‍ ജോലിചെയ്യാന്‍ നിര്‍ദേശിച്ചു എന്നാരോപിച്ചാണ് ഒരു വിഭാഗം ജീവനക്കാര്‍ പ്രതിഷേധിച്ചത്. തുടര്‍ന്ന് ചോറും കറികളും മാലിന്യത്തിനൊപ്പം തള്ളുകയായിരുന്നു.യൂണിയന്‍ പ്രവര്‍ത്തകര്‍ തമ്മിലുള്ള ചേരിപ്പോരാണ് പ്രശ്‌നങ്ങള്‍ക്കു കാരണമെന്നാണ്് ഒരുവിഭാഗം പറയുന്നത്.