സംശയത്തെത്തുടർന്ന് വര്‍ക്കലയില്‍ നവവധുവിനെ ഭർത്താവ് തലയ്ക്കടിച്ച് കൊലപ്പെടുത്തി. ഭർത്താവ് അനീഷിനെ (35) വർക്കല പൊലീസ് കസ്റ്റഡിയിലെടുത്തു. പുലർച്ചെ രണ്ടു മണിയോടെ ഭർത്തൃഗൃഹത്തിൽ ആണ് നിഖിത കൊല്ലപ്പെട്ടത്. നിലവിളക്ക് ഉപയോഗിച്ച് തലയ്ക്ക് അടിച്ചു കൊലപ്പെടുത്തി എന്നാണ് പ്രാഥമിക വിവരം. രണ്ടുമാസം മുമ്പായിരുന്നു അനീഷിനെയും നിഖിതയുടെയും വിവാഹം നടന്നത്.

ഭാര്യയോടുള്ള അനീഷിന്റെ സംശയമാണ് കൊലപാതകത്തിന് കാരണമെന്ന് പൊലീസ് പറഞ്ഞു. സംഭവം നടക്കുന്ന സമയത്ത് അനീഷിന്റെ മാതാപിതാക്കളും വീട്ടിൽ ഉണ്ടായിരുന്നു. പുലർച്ചെ ഇരുവരും തമ്മിൽ വഴക്കുണ്ടാകുകയായിരുന്നു.

ഇതിനിടയിൽ അനീഷ് നിലവിളക്കുകൊണ്ട് ഭാര്യയുടെ തലയ്ക്കടിച്ചു, പിന്നാലെ ​ വയറിന് കുത്തുകയും ചെയ്‌തു. ഗുരുതരമായി പരിക്കേറ്റ നിഖിതയെ ബന്ധുക്കൾ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

വിവാഹ ശേഷം വിദേശത്തു പോവുകയും 10 ദിവസം മുൻപ് അനീഷിന്റെ കാലിന്റെ വേദനയുടെ ചികിത്സയ്ക്കായി നാട്ടിൽ വരികയും ആയിരുന്നു. സയന്റിഫിക് വിഭാഗം എത്തിയതിനുശേഷം മാത്രമേ കൂടുതൽ വിവരങ്ങൾ പറയാൻ കഴിയൂ എന്ന് പൊലീസ് അറിയിച്ചു.