മുൻ മന്ത്രിയും എം എൽ എയുമായ കെ ടി ജലീലിന്റെ കാശ്മീർ പരാമർശങ്ങൾ വളരെ വിവാദമായിരുന്നു. കേസ് എടുക്കേണ്ട തരത്തിലൊക്കെ കാര്യങ്ങൾ നീങ്ങിയിരുന്നു. ഇപ്പോൾ ഇതാ ഈ വിഷയത്തിൽ ഡൽഹി പൊലീസ് നിലപാടറിയിച്ചിരിക്കുകയാണ്. കോടതി ഉത്തരവിട്ടാൽ മാത്രമേ ജലീലിനെതിരെ കേസെടുക്കുകയുള്ളൂവെന്നാണ് പൊലീസ് വ്യക്തമാക്കിയിരിക്കുന്നത്. കേസിൽ റോസ് അവന്യു കോടതി തിങ്കളാഴ്ച വാദം കേൾക്കുവാനിരിക്കുകയാണ്.

തിരുവല്ല ഒന്നാം ക്ലാസ് ജുഡീഷ്യൽ മജിസ്‌‌ട്രേറ്റിന്റെ ഉത്തരവിന്റെ അടിസ്ഥാനത്തിൽ ജലീലിനെതിരെ നേരത്തെ കീഴ്‌വായ്പുർ പൊലീസ് കേസെടുത്തിരുന്നു എന്നതാണ് ശ്രദ്ധേയമായ കാര്യം. ഈ കേസിൽ അന്വേഷണം നടക്കുകയാണ്. അതിനിടയിൽ ഡൽഹിയിൽ പുതിയ കേസ് രജിസ്റ്റർ ചെയ്യുന്നത് എന്തിനാണെന്ന് ഡൽഹി പൊലീസ് കോടതിയിൽ സമർപ്പിച്ച റിപ്പോർട്ടിൽ ചോദ്യം ഉന്നയിച്ചിരിക്കുകയാണ്.

.കാശ്‌മീർ സന്ദർശനത്തിനിടെയുള്ള ചിത്രങ്ങൾ ജലീൽ ഫേസ്ബുക്കിൽ പങ്കുവച്ചിട്ടുണ്ട്. ചിത്രങ്ങൾക്കൊപ്പം പങ്കു വച്ച കുറിപ്പാണ് ഇപ്പോൾ വിവാദമായത്. പാക് അധിനിവേശ കാശ്‌മീരിനെ 'ആസാദ് കാശ്‌മീർ' എന്നും ഇന്ത്യയുടെ കാശ്‌മീരിനെ 'ഇന്ത്യൻ അധീന കാശ്‌മീർ' എന്നുമായിരുന്നു ജലീൽ വിശേഷിപ്പിച്ചത്. വിവാദമായതിന് പിന്നാലെ അദ്ദേഹം പോസ്റ്റ് ഡിലീറ്റ് ചെയ്‌തിരുന്നു.

അതേസമയം മുൻ മന്ത്രി കെടി ജലീലിന്റെ വിവാദ പരമർശത്തിൽ തൽസ്ഥിതി റിപ്പോർട്ട് ഫയൽ ചെയ്യാൻ ഡൽഹി കോടതി. സെപ്തംബർ 6 ന് മുൻപ് തൽസ്ഥിതി റിപ്പോർട്ട് ഫയൽ ചെയ്യാൻ കോടതി നിർദ്ദേശം നൽകി. വിഷയത്തിൽ അന്വേഷണം പുരോഗമിക്കുകയാണെന്ന് ഡൽഹി പൊലിസ് റോസ് അവന്യു കോടതിയിൽ പറഞ്ഞു. പരാമർശം നടന്നിട്ടുണ്ടെങ്കിൽ ഗൗരവകരമെന്ന് കോടതി വാക്കാൽ പരാമർശം നടത്തി.

കെടി ജലീലിനെതിരെ കേസെടുക്കണമെന്ന ഹർജിയിൽ ഡൽഹി പൊലീസ് അന്വേഷണ സംഘത്തെ നിയോഗിച്ചിരുന്നു. രാജ്യദ്രോഹം ഉൾപ്പെടെയുള്ള വകുപ്പുകൾ ചുമത്തി കേസെടുക്കണമെന്ന ഹർജിയിൽ റോസ് അവന്യൂ കോടതി ഇന്ന് വാദം കേൾക്കാനിരിക്കെയായിരുന്നു പൊലീസിൻ്റെ നടപടി.