നഴ്സിനെ തട്ടിക്കൊണ്ട് പോയി വിവാഹം കഴിക്കാൻ ശ്രമിച്ച സംഭവത്തിൽ കഞ്ചാവ് കേസിലെ പ്രതി പോലീസ് പിടിയിൽ. തിരുവനന്തപുരം ആര്യനാട് തടത്തഴികത്ത് അനന്തു (23)യാണ് അഞ്ചാലുംമൂട് പൊലീസ് അറസ്റ്റ് ചെയ്തത്. സോഷ്യൽ മീഡിയയിലൂടെയാണ്‌ ഇയാൾ നഴ്സിനെ പരിചയപ്പെട്ടത്. തുടർന്ന് ഈ സൗഹൃദം പ്രണയത്തിലേയ്ക്ക് വഴി മാറുകയായിരുന്നു. . ഇതിനിടെ അനന്തു കഞ്ചാവ് കേസിലെ പ്രതിയാണെന്ന് മനസ്സിലാക്കിയതോടെ യുവതി ബന്ധത്തിൽ നിന്നു പിൻമാറി.

ഇത് മനസിലാക്കിയ അനന്തു കഴിഞ്ഞ ദിവസം യുവതി ജോലി ചെയ്യുന്ന ആശുപത്രിയിലെത്തി യുവതിയെ ബൈക്കിൽ കയറ്റി കൊണ്ടുപോയി. കല്ലമ്പലത്ത് എത്തിയതോടെ യുവതിയെ വിവാഹം കഴിക്കാനാണ് കൂട്ടിക്കൊണ്ട് പോകുന്നതെന്ന് പറഞ്ഞു. ഇതോടെ യുവതി ബഹളം വയ്ക്കുകയും വിവരം വീട്ടുകാരെ വിളിച്ചറിയിക്കുകയും ചെയ്തു.

അതിൽ പ്രകോപിതനായ യുവാവ് യുവതിയെ മർദിച്ച ശേഷം പാരിപ്പള്ളിയിൽ എത്തിച്ച് റോഡ് വശം ഉപേക്ഷിച്ച് കടന്നു കളഞ്ഞു. തുടർന്ന് ബസിൽ കൊട്ടിയത്ത് എത്തിയ യുവതിയെ വീട്ടുകാരെത്തി കൊണ്ടുപോവുകയായിരുന്നു. തുടർന്ന് യുവതി നൽകിയ പരാതിയിൽ ഇന്നലെ രാവിലെയോടെ അഞ്ചാലുംമൂട് എസ്.എച്ച്.ഒ സി.ദേവരാജന്റെ നേതൃത്വത്തിൽ അനന്തുവിനെ പൊലീസ് അറസ്റ്റ് ചെയ്യുകയായിരുന്നു.