സി.പി.എമ്മിന്റെ ഇസ്ലാമോഫോബിയ അറിയണമെങ്കിൽ വിഴിഞ്ഞം തുറമുഖ വിരുദ്ധ സമരത്തോടും ആവിക്കൽതോട് മാലിന്യ പ്ലാന്റ് വിരുദ്ധ സമരത്തോടും അവർ കാണിക്കുന്ന വ്യത്യസ്ത സമീപനം പരിശോധിച്ചാൽ മതിയെന്ന വിമർശനവുമായി ഫാത്തിമ താഹിലിയ രംഗത്ത് വന്നിരിക്കുകയാണ് ഫാത്തിമ ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ; സി.പി.എമ്മിന്റെ ഇസ്ലാമോഫോബിയ അറിയണമെങ്കിൽ വിഴിഞ്ഞം തുറമുഖ വിരുദ്ധ സമരത്തോടും ആവിക്കൽതോട് മാലിന്യ പ്ലാന്റ് വിരുദ്ധ സമരത്തോടും അവർ കാണിക്കുന്ന വ്യത്യസ്ത സമീപനം പരിശോധിച്ചാൽ മതി.

വിഴിഞ്ഞം തുറമുഖ പദ്ധതിക്ക് എതിരെ ലത്തീൻ കത്തോലിക്കാ സഭ പ്രത്യക്ഷ സമരത്തിലാണ്. അവരുടെ സമരം തീർത്തും ന്യായമാണ് താനും. പുരോഹിതർ ളോഹ അണിഞ്ഞു സമരത്തിൽ പങ്കെടുക്കുന്നു. അവർക്കെതിരെ തീവ്രവാദ - വർഗീയവാദ ആരോപണങ്ങൾ സി.പി.എമ്മിന്റെ ഭാഗത്ത് നിന്ന് ഉയരുന്നില്ല എന്നത് ശ്രദ്ധേയമാണ്. ഇതേ സമരം മലബാറിലായിരുന്നു നടന്നിരുന്നത് എന്നും മുസ്ലിം മതസംഘടനകൾ പ്രത്യക്ഷ സമരത്തിലേക്ക് വന്നു എന്നും കരുതുക.

എന്തൊക്കെ പുകിലാകും സി.പി.എം ഉണ്ടാക്കുക. ഗെയിൽ, ആവിക്കൽതോട് മാലിന്യ പ്ലാന്റ് വിരുദ്ധ സമരങ്ങളോടുള്ള സി.പി.എമ്മിന്റെ ഇസ്ലാമോഫോബിക് പ്രതികരണങ്ങൾ ഓർമയില്ലേ. നമ്മുടെ സമൂഹത്തിൽ ഇസ്ലാമോഫോബിയ വളർത്തിയതിൽ ചെറുത് അല്ലാത്ത പങ്ക് സി.പി.എമ്മിനുണ്ട്.