സങ്കടം അടക്കാനാവാതെ.... ആറന്മുള ഉതൃട്ടാതി ജലോത്സവത്തില് പങ്കെടുക്കാനുള്ള തയ്യാറെടുപ്പിനിടെ അച്ചന്കോവിലാറ്റിലെ വലിയപെരുമ്പുഴക്കടവില് ചെന്നിത്തല പള്ളിയോടം മറിഞ്ഞ് രണ്ടുപേര് മരിച്ചു.... ഒരാള്ക്കായി തിരച്ചില് തുടരുന്നു
സങ്കടം അടക്കാനാവാതെ.... ആറന്മുള ഉതൃട്ടാതി ജലോത്സവത്തില് പങ്കെടുക്കാനുള്ള തയ്യാറെടുപ്പിനിടെ അച്ചന്കോവിലാറ്റിലെ വലിയപെരുമ്പുഴക്കടവില് ചെന്നിത്തല പള്ളിയോടം മറിഞ്ഞ് രണ്ടുപേര് മരിച്ചു. ഒരാള്ക്കായി തിരച്ചില് തുടരുന്നു.
ചെന്നിത്തല സൗത്ത് പതിനേഴാം വാര്ഡ് ആഴാത്ത്പടി പരിയാരത്ത് സതീശന്- കല ദമ്പതികളുടെ ഏകമകന് ആദിത്യന് (18), ചെറുകോല് മനാശ്ശേരില് വിജയകുറുപ്പിന്റെ മകന് വിനീഷ് (35) എന്നിവരാണ് മരിച്ചത്. കാണാതായ ചെന്നിത്തല കിഴക്കേവഴിമുറി വൃന്ദാവനത്തില് രാകേഷിനായി (45) നാവികസേന, സ്കൂബാ ടീം, ഫയര്ഫോഴ്സ്, പൊലീസ് എന്നിവയുടെ നേതൃത്വത്തില് തെരച്ചില് തുടരുന്നു.
ഇന്നത്തെ ആറന്മുള ഉതൃട്ടാതി ജലോത്സവത്തില് പങ്കെടുക്കാനായി പുറപ്പെടുന്നതിനു മുന്പായി ചെന്നിത്തല പള്ളിയോടക്കടവില് വഴിപാടുകള് സ്വീകരിച്ച് കര്പ്പൂരാരാധനയ്ക്കുശേഷം ആറന്മുള ദര്ശനത്തിനുള്ള ഭക്തജനങ്ങള് പള്ളിയോടത്തില് കയറി അച്ചന്കോവിലാറ്റില് പ്രദക്ഷിണം വയ്ക്കുന്ന ചടങ്ങിനിടെയാണ് മറിഞ്ഞത്. വഴിപാടായി വള്ളത്തില് കയറിയതാണ് ആദിത്യനും വിനീഷും. അറുപതോളം തുഴച്ചിലുകാര്ക്ക് കയറാവുന്നതാണ് ചെന്നിത്തല തെക്ക് 93 -ാം നമ്പര് എന്.എസ്.എസ് കരയോഗത്തിന്റെ പള്ളിയോടം.
എണ്പത് കിലോമീറ്റര് അകലെയാണ് വള്ളം കളി. ആചാരപരമായി കുറച്ചുദൂരം തുഴഞ്ഞശേഷം ബോട്ടിന്റെ സഹായത്തോടെയാണ് കൊണ്ടുപോകുന്നത്. ദുരന്തം നടന്നത് ആലപ്പുഴ ജില്ലയിലും ജലോല്സവം പത്തനംതിട്ട ജില്ലയിലുമാണ്. വന് പൊലീസ്സംഘം സ്ഥലത്ത് ക്യാമ്പ് ചെയ്തിട്ടുണ്ട്.
പോസ്റ്റുമോര്ട്ടത്തിന് ശേഷം ഇന്നലെ വൈകിട്ട് അഞ്ചോടെ വീട്ടിലെത്തിച്ച ആദിത്യന്റെ മൃതദേഹം ഇന്ന് രാവിലെ 11 നു സംസ്കരിക്കും. വിനീഷിന്റെ മൃതദേഹം ഇടപ്പോണ് സ്വകാര്യ ആശുപത്രിയിലെ മോര്ച്ചറിയില്. മാതാവ്: രമ. ഭാര്യ: മായ. മക്കള്: ദേവയാന് (2), ദേവാത്മിക (7മാസം).
" f
https://www.facebook.com/Malayalivartha
