കന്യാകുമാരി മുതല്‍ കശ്മീര്‍ വരെ രാഹുല്‍ ഗാന്ധി നയിക്കുന്ന ഭാരത് ജോഡോ കാല്‍നടയാത്ര ഇന്നു മുതല്‍ കേരളത്തില്‍. കേരളത്തിലെത്തുന്നതോടെ കാല്‍നടയാത്രയുടെ രൂപം മാറും. കൂടെ നടക്കാന്‍ കാത്തിരിക്കുകയാണ് പതിനായിരങ്ങള്‍. അതോടെ സ്‌കൂള്‍, ഓഫീസ്, ജോലിക്ക് പോകുന്നവരും വരുന്നവരും സര്‍വത്ര വലയും. മൊത്തം ബ്ലോക്കാവും. 300 പേര്‍ മാത്രമേ ഉണ്ടാകുകയുള്ളൂവെന്ന് സുധാകരന്‍ പറഞ്ഞെങ്കിലും നടക്കാന്‍ പോകുന്നില്ല. 19 ദിവസം കേരളത്തെ ബ്ലോക്കിലാക്കും. വണ്ടികള്‍ വഴി തിരിച്ച് വിടും.

തമിഴ്‌നാട് പിന്നിട്ട യാത്ര ഇന്നു രാവിലെ 7ന് അതിര്‍ത്തിയായ പാറശാലയില്‍ നിന്നു തുടങ്ങും. രാഹുലിനെയും സംഘാംഗങ്ങളെയും കെപിസിസി പ്രസിഡന്റ് കെ.സുധാകരന്റെ നേതൃത്വത്തില്‍ കേരളത്തിലേക്കു വരവേല്‍ക്കും. നെയ്യാറ്റിന്‍കരയ്ക്കു സമീപം ഊരൂട്ടുകാല മാധവി മന്ദിരത്തില്‍ ഉച്ചയ്ക്കു യാത്രയ്ക്കു ഇടവേള.

തുടര്‍ന്ന് നെയ്യാറ്റിന്‍കരയിലെ പരമ്പരാഗത നെയ്ത്തു തൊഴിലാളികളുമായി രാഹുല്‍ സംവദിക്കും. വൈകിട്ട് 4ന് നെയ്യാറ്റിന്‍കര മൂന്നുകല്ലിന്‍മൂട്ടില്‍ നിന്നു പുനരാരംഭിക്കുന്ന യാത്ര രാത്രി നേമത്തു സമാപിക്കും. നാളത്തെ ആദ്യയാത്ര രാവിലെ 7നു നേമത്തു നിന്നു തുടങ്ങി പട്ടം സെന്റ് മേരീസ് സ്‌കൂള്‍ വരെയാണ്. 3ന് പട്ടത്തു നിന്നു കഴക്കൂട്ടം വരെ.

13ന് രാവിലെ 7ന് കഴക്കൂട്ടത്തു നിന്നു തിരിച്ച് മാമം വരെയും 3ന് മാമത്തു നിന്നു തിരിച്ച് കല്ലമ്പലം വരെയും രാഹുലും സംഘവും നടക്കും. 14നു രാവിലെ കല്ലമ്പലത്തു നിന്നു തിരിക്കുന്ന യാത്ര ഉച്ചയോടെ കൊല്ലം ജില്ലയില്‍ പ്രവേശിക്കും. ഈ മാസം 29 വരെ ആകെ 19 ദിവസമാണ് കേരളത്തില്‍ രാഹുലും സംഘവും പദയാത്ര നടത്തുക.



അതേസമയം ഭാരത് ജോഡോ യാത്രക്കിടെ രാഹുല്‍ ഗാന്ധിയും വൈദികനും തമ്മിലുള്ള സംഭാഷണം വിവാദമാക്കി ബിജെപി. വിദ്വേഷ പ്രസംഗത്തെതുടര്‍ന്ന് നേരത്തെ അറസ്റ്റിലായ കന്യാകുമാരിയിലെ വൈദികന്‍ ജോര്‍ജ് പൊന്നയ്യയുമായുള്ള കൂടിക്കാഴ്ചയുടെ വീഡിയോയാണ് ബിജെപി നേതാക്കള്‍ പങ്കുവച്ചത്.

രാഹുല്‍ ആദ്യം ചരിത്രം പഠിക്കണമെന്ന പരിഹാസവുമായി അമിത്ഷായും യാത്രക്കെതിരെ ആഞ്ഞടിച്ചു. രാഹുലും വൈദികനും തമ്മിലുള്ള കൂടിക്കാഴ്ചയില്‍ 'ജീസസ് ഒരേയൊരു ദൈവമെന്ന്' വൈദികന്‍ പറഞ്ഞിരുന്നു. സംഭാഷണത്തിന്റെ വീഡിയോ ബിജെപി പ്രചരിപ്പിച്ചു

ഭാരത് ജോഡോ യാത്ര നാലാം ദിവസം പിന്നിട്ട് കേരളത്തിലേക്ക് പ്രവേശിക്കാനിരിക്കെയാണ് രാഹുല്‍ ഗാന്ധിക്കെതിരെ വീഡിയോ ബിജെപി ആയുധമാക്കുന്നത്. കന്യാകുമാരിയില്‍വച്ചാണ് രാഹുല്‍ വൈദികനുമായി കൂടികാഴ്ച നടത്തിയത്. യേശുക്രിസ്തുവാണ് ഏക ദൈവമെന്നാണ് വീഡിയോയില്‍ രാഹുലിനോട് വൈദികന്‍ പറയുന്നത്.

കന്യാകുമാരി ആസ്ഥാനമാക്കി പ്രവര്‍ത്തിക്കുന്ന ജനനായക ക്രൈസ്തവ പേരവൈ സംഘടനയിലെ അംഗവും വൈദികനുമായ ജോര്‍ജ് പൊന്നയ്യ നേരത്തെ പ്രധാനമന്ത്രി നരേന്ദ്രമോദിക്കെതിരായ വിവാദ പ്രസംഗത്തെ തുടര്‍ന്ന് അറസ്റ്റിലായിരുന്നു. വിഡീയോ ബിജെപി നേതാക്കള്‍ വ്യാപകമായി പ്രചരിപ്പിക്കുന്നുണ്ട്.

ക്ഷേത്രത്തില്‍ പോകാന്‍ സമയമില്ലാത്ത രാഹുലിന് ഹിന്ദു വിരുദ്ധരുമായി കൂടിക്കാഴ്ച നടത്താന്‍ സമയമുണ്ടെന്നും ബിജെപി നേതാക്കള്‍ ട്വീറ്റ് ചെയ്തു. പിന്നാലെ മറുപടിയുമായി ജയറാം രമേശ് രംഗത്തെത്തി. കൂടിക്കാഴ്ചയുമായി യാതൊരു ബന്ധവുമില്ലാത്ത വീഡിയോയാണ് പ്രചരിക്കുന്നത്. ഭാരത് ജോഡോ യാത്രക്ക് കിട്ടുന്ന സ്വീകാര്യത കണ്ടാണ് ബിജെപി സ്ഥിരം വിദ്വേഷ പ്രചാരണം തുടങ്ങിയിരിക്കുന്നതെന്നും ജയറാം രമേശ് തിരിച്ചടിച്ചു. ഇന്നലെ രാജസ്ഥാനില്‍ നടന്ന പൊതുയോഗത്തില്‍ അമിത് ഷായും രാഹുലിനെ പരിഹസിച്ചു. ഭാരത് ജോഡോ യാത്ര നടത്തുന്നതിന് മുന്‍പ് രാഹുല്‍ ഇന്ത്യയുടെ ചരിത്രം പഠിക്കണമെന്നും, വിദേശ നിര്‍മിത് ടീഷര്‍ട്ടിട്ടാണ് രാഹുല്‍ ഭാരതത്തെ ഒന്നിപ്പിക്കാന്‍ യാത്ര നടത്തുന്നതെന്നും അമിത് ഷാ പറഞ്ഞു.