അവസാനം കാത്ത് കാത്തിരുന്ന കെപിസിസിയുടെ 282 അംഗ പട്ടികയ്ക്ക് ഹൈക്കമാന്‍ഡിന്റെ അംഗീകാരമായി. പക്ഷെ ഉടനൊന്നും പട്ടിക പുറത്ത് വിടാന്‍ സാധ്യതയില്ല. രാഹുല്‍ ഗാന്ധി ഉള്ള സമയത്ത് പുറത്തായവര്‍ കട്ട അടിയുണ്ടാക്കും. അത് നാണക്കേടുമാകും.

പട്ടിക രണ്ടു ദിവസത്തിനകം പ്രഖ്യാപിക്കുമെന്നാണ് കെപിസിസി പ്രസിഡന്റ് കെ. സുധാകരന്‍ അറിയിച്ചത്. യുവാക്കളും വനിതകളും കുറവാണെന്ന പരാതിയെ തുടര്‍ന്നു പട്ടിക ഹൈക്കമാന്‍ഡ് നേരത്തെ തിരിച്ചയച്ചിരുന്നു. തുടര്‍ന്ന് കുടുതല്‍ പുതുമുഖങ്ങളെ ഉള്‍പ്പെടുത്തി പുതുക്കി നല്‍കിയ പട്ടികയ്ക്കാണ് ഇപ്പോള്‍ അംഗീകാരം ലഭിച്ചത്. 282 അംഗ പട്ടികയില്‍ 75 പുതുമുഖങ്ങളുണ്ടെന്ന് അറിയുന്നു.

കോണ്‍ഗ്രസ് പ്രസിഡന്റ് തിരഞ്ഞെടുപ്പില്‍ ഇവര്‍ക്കായിരിക്കും വോട്ടവകാശം. പട്ടിക ഇന്നലെ പ്രഖ്യാപിക്കാനായിരുന്നു മുന്‍ തീരുമാനം. എന്നാല്‍ രാഹുല്‍ ഗാന്ധിയുടെ ഭാരത് ജോഡോ യാത്ര നടക്കുമ്പോള്‍, പുറത്താകുന്നവരുടെ പ്രതിഷേധം ഒഴിവാക്കാനായി പ്രഖ്യാപനം നീട്ടിവയ്ക്കുകയായിരുന്നു.

കോണ്‍ഗ്രസ് പ്രസിഡന്റ് സ്ഥാനത്തേക്കു ശശി തരൂര്‍ മത്സരിക്കുന്നതില്‍ തെറ്റില്ലെന്നു പറഞ്ഞ സുധാകരന്‍, പാര്‍ട്ടിക്ക് ഒരു ഔദ്യോഗിക സ്ഥാനാര്‍ഥി ഉണ്ടെങ്കില്‍ അതിനൊപ്പം നില്‍ക്കുന്നതാണ് ഉചിതമെന്നും വ്യക്തമാക്കി.

അതേസമയം കോണ്‍ഗ്രസ് തെരഞ്ഞെടുപ്പിലെ വോട്ടര്‍ പട്ടിക വിവാദം അവസാനിപ്പിക്കുന്നു എന്ന് ശശി തരൂര്‍ വ്യക്തമാക്കി. വോട്ടര്‍ പട്ടിക പുറത്തുവിടണമെന്ന അഞ്ച് എംപിമാരുടെ കത്തിന് തെരഞ്ഞെടുപ്പ് ചുമതലയുള്ള മധുസൂദന്‍ മിസ്ത്രി മറുപടി നല്‍കിയ പശ്ചാത്തലത്തിലാണ് ശശി തരൂരിന്റെ പ്രതികരണം. വോട്ടര്‍ പട്ടിക 20ആം തീയതി മുതല്‍ എഐസിസിയിലെ തന്റെ ഓഫീസിലുണ്ടാകും എന്നും ഏത് നേതാവിനും വന്ന് പരിശോധിക്കാമെന്നും മധുസൂദന്‍ മിസ്ത്രി കത്ത് നല്‍കിയ എംപിമാരെ അറിയിച്ചു.

ഓരോ പിസിസിയിലെയും പട്ടിക അവിടെയും പരിശോധിക്കാവുന്നതാണെന്നും മധുസൂദനന്‍ മിസ്ത്രിയുടെ കത്തില്‍ പറയുന്നു. എന്നാല്‍ വോട്ടര്‍ പട്ടിക ഇപ്പോള്‍ പ്രസിദ്ധീകരിക്കില്ലെന്ന് എഐസിസി നേതൃത്വം ആവര്‍ത്തിച്ചു. മത്സരിക്കുന്നവര്‍ക്ക് പിന്നീട് പട്ടിക പൂര്‍ണമായും നല്‍കുമെന്നും എഐസിസി വ്യക്തമാക്കി. ഉന്നയിച്ച വിഷയങ്ങള്‍ക്ക് കിട്ടിയ മറുപടിയില്‍ തൃപ്തനാണെന്നും അതിനാല്‍ വിവാദം അവസാനിപ്പിക്കുകയാണെന്നും ശശിതരൂര്‍ ട്വീറ്റ് ചെയ്തു.

അതേസമയം രാഹുല്‍ഗാന്ധി നയിക്കുന്ന ഭാരത് ജോഡോ യാത്രയുടെ കേരള പര്യടനത്തിന് ഇന്ന് തുടക്കമായി. രാവിലെ പാറശാലയില്‍ നിന്നാണ് കേരള യാത്ര ആരംഭിച്ചത്. കെപിസിസി പ്രസിഡന്റ് കെ.സുധാകരന്‍, പ്രതിപക്ഷ നേതാവ് വി.ഡി. സതീശന്‍ എന്നിവരുടെ നേതൃത്വത്തില്‍ അതിര്‍ത്തിയില്‍ സ്വീകരണം നല്‍കി.

രാവിലെ പൊതുജനങ്ങള്‍ക്ക് തടസ്സമില്ലാത്ത വിധം, പരമാവധി ആള്‍ക്കൂട്ടമില്ലാതെയായിരിക്കും യാത്രയെന്ന് കെപിസിസി അറിയിച്ചു. എന്നാല്‍, വൈകീട്ട് സംസ്ഥാനത്തെ കോണ്‍ഗ്രസ് കമ്മിറ്റികളുടെയും പ്രവര്‍ത്തകരുടെയും ശക്തിപ്രകടനമാക്കി യാത്രയെ മാറ്റാനാണ് തീരുമാനം. കേരളത്തില്‍ 19 ദിവസമാണ് പര്യടനം. ഇതിനിടയില്‍ 7 ജില്ലകളിലൂടെ ഭാരത് ജോഡോ യാത്ര കടന്നു പോകും.

നെയ്യാറ്റിന്‍കരയ്ക്കു സമീപം ഊരൂട്ടുകാല മാധവി മന്ദിരത്തില്‍ ഉച്ചയ്ക്കു യാത്രയ്ക്കു ഇടവേള. തുടര്‍ന്ന് നെയ്യാറ്റിന്‍കരയിലെ പരമ്പരാഗത നെയ്ത്തു തൊഴിലാളികളുമായി രാഹുല്‍ സംവദിക്കും. വൈകിട്ട് 4ന് നെയ്യാറ്റിന്‍കര മൂന്നുകല്ലിന്‍മൂട്ടില്‍ നിന്നു പുനരാരംഭിക്കുന്ന യാത്ര രാത്രി നേമത്തു സമാപിക്കും. നാളത്തെ ആദ്യയാത്ര രാവിലെ 7നു നേമത്തു നിന്നു തുടങ്ങി പട്ടം സെന്റ് മേരീസ് സ്‌കൂള്‍ വരെയാണ്. 3ന് പട്ടത്തു നിന്നു കഴക്കൂട്ടം വരെ.

13ന് രാവിലെ 7ന് കഴക്കൂട്ടത്തു നിന്നു തിരിച്ച് മാമം വരെയും 3ന് മാമത്തു നിന്നു തിരിച്ച് കല്ലമ്പലം വരെയും രാഹുലും സംഘവും നടക്കും. 14നു രാവിലെ കല്ലമ്പലത്തു നിന്നു തിരിക്കുന്ന യാത്ര ഉച്ചയോടെ കൊല്ലം ജില്ലയില്‍ പ്രവേശിക്കും. ഈ മാസം 29 വരെ ആകെ 19 ദിവസമാണ് കേരളത്തില്‍ രാഹുലും സംഘവും പദയാത്ര നടത്തുക.