aനെഞ്ചുപൊട്ടി നിലവിളിച്ച് മാതാപിതാക്കള്‍.... പ്രാര്‍ഥനയും വഴിപാടുമായി ആറ്റുനോറ്റുണ്ടായ ഏകമകന്‍ ആദിത്യനെ നഷ്ടപ്പെട്ടതിന്റെ ആഘാതത്തില്‍ നിലവിളിച്ച് മാതാപിതാക്കള്‍..... പത്തു വര്‍ഷത്തെ കാത്തിരിപ്പിനൊടുവിലാണ് ആദിത്യനെ കിട്ടിയത്..... ആശ്വസിപ്പിക്കാനാവാതെ ബന്ധുക്കളും നാട്ടുകാരും

മകനുവേണ്ടി നേര്‍ന്ന വള്ളസദ്യയടക്കം പള്ളിയോടക്കരയിലെ വീട്ടില്‍ നടത്തിയിരുന്നു. ചെന്നിത്തല പഞ്ചായത്ത് 17-ാം വാര്‍ഡ് പരിയാരത്തുവീട്ടില്‍ സതീശന്‍-ശ്രീകല ദമ്പതിമാര്‍ക്ക് ഒരാണ്‍കുഞ്ഞു ജനിച്ചത് പത്തുവര്‍ഷത്തെ കാത്തിരിപ്പിനു ശേഷമാണ്.. കുഞ്ഞ് ആദിത്യന്‍ വളര്‍ന്നിപ്പോള്‍ പതിനെട്ടുകാരനായിരുന്നു. പള്ളിയോടം മറിഞ്ഞതോടെ അവരുടെ ആദിത്യന്‍ എന്നേക്കുമായി അവരെ വിട്ടു പോയി. ആ വാര്‍ത്ത മാതാപിതാക്കള്‍ക്ക് ഉള്‍ക്കൊള്ളാനാവുന്നില്ല.

മറുകരയില്‍ പള്ളിയോടച്ചടങ്ങുകള്‍ നടന്ന പന്തലില്‍ മാതാപിതാക്കള്‍ നെഞ്ചുപൊട്ടിക്കരയുമ്പോള്‍ ആശ്വസിപ്പിക്കാനാകാതെ ബന്ധുക്കളും നിലവിളിച്ചുപോയി. ഒപ്പമുണ്ടായിരുന്ന ആദിത്യന്റെ അമ്മൂമ്മ ശാന്തമ്മ ബോധരഹിതയായി വീണു. കുഞ്ഞിക്കാലിനായുള്ള വള്ളസദ്യ അമ്മൂമ്മയുടെ ആഗ്രഹപ്രകാരമാണു നടത്തിയത്.

ഉത്രട്ടാതി വള്ളംകളിക്കായി ശനിയാഴ്ച ആറന്മുളയ്ക്കു യാത്രതിരിക്കുന്നതിനുമുമ്പ് ചെന്നിത്തല പള്ളിയോടം അച്ചന്‍കോവിലാറ്റില്‍ പ്രദക്ഷിണം നടത്തുമ്പോള്‍ അതില്‍ ആദിത്യനുമുണ്ടായിരുന്നു. അപ്രതീക്ഷിതമായി പള്ളിയോടം മറിഞ്ഞതോടെ ആദിത്യന്‍ ആറിന്റെ കയങ്ങളില്‍പ്പെട്ടു. രണ്ടര മണിക്കൂറിന്റെ തിരിച്ചിലിനുശേഷമാണു മൃതശരീരം കണ്ടെത്തി കരയിലെത്തിച്ചത്.



അതേസമയം നേരത്തേ ആറന്മുള വള്ളംകളിക്കുമുന്നോടിയായി നടത്തിയ വഞ്ചിപ്പാട്ടു മത്സരത്തിലടക്കം ആദിത്യന്‍ പങ്കെടുത്തിരുന്നു. പ്ലസ്ടു ജയിച്ച ആദിത്യന്‍ ചൊവ്വാഴ്ച എന്‍ജിനിയറിങ് ബിരുദപഠനത്തിനു ചേരാനിരിക്കുകയായിരുന്നു. സംസ്‌കാരം ഞായറാഴ്ച നടത്തും.