തിരുവോണം ബമ്പര്‍ വില്‍പ്പന റെക്കോര്‍ഡ് നേട്ടത്തില്‍... 25 കോടി സമ്മാനത്തുകയുള്ള തിരുവോണം ബമ്പറിന്റെ 59 ലക്ഷം ടിക്കറ്റുകളാണ് വിറ്റുപോയത്, ബമ്പര്‍ നറുക്കെടുപ്പ് ഈ മാസം 18 ന്.

60 ലക്ഷം ടിക്കറ്റുകളാണ് ആദ്യഘട്ടം അച്ചടിച്ചത്. മൊത്ത വില്‍പ്പനക്കാരുടെയും ലോട്ടറി ഏജന്റുമാരുടെയും ആവശ്യാനുസരണം അഞ്ചുലക്ഷം ടിക്കറ്റുകള്‍കൂടി വിപണിയിലെത്തിച്ചു. 2021ല്‍ ഓണം ബമ്പറിന്റെ 54 ലക്ഷം ടിക്കറ്റാണ് വിറ്റത്. ടിക്കറ്റു വില 300 രൂപയായിരുന്നു. ഇത്തവണ ടിക്കറ്റൊന്നിന് 500 രൂപയായിട്ടും കൂടുതല്‍ വിറ്റഴിക്കുന്നുണ്ട്.

ടിക്കറ്റ് വിപണിയിലെത്തിയപ്പോള്‍ ആളുകള്‍ ടിക്കറ്റെടുക്കുമോയെന്ന ആശങ്കകള്‍ ഉയര്‍ന്നിരുന്നെങ്കിലും വില്‍പ്പന തുടങ്ങി ദിവസങ്ങള്‍ക്കകം തന്നെ ആശങ്കയൊഴിഞ്ഞു. അഞ്ച് കോടിയാണ് ഓണം ബമ്പറിന്റെ രണ്ടാം സമ്മാനം. അഞ്ച് കോടി വെച്ച് പത്ത് പേര്‍ക്ക് മൂന്നാം സമ്മാനവും ഒരു കോടി വീതം വെച്ച് 90 പേര്‍ക്ക് നാലാം സമ്മാനവും ലഭിക്കും.

സമ്മാനാര്‍ഹമാകുന്ന ടിക്കറ്റ് വില്‍ക്കുന്ന ഏജന്റിന് 2.50 കോടി രൂപയാണ് കമ്മീഷനായി ലഭിക്കുക. ടിക്കറ്റ് വില ഉയര്‍ന്നതിനാല്‍ സാധാരണക്കാരായ തൊഴിലാളികള്‍ക്കും വാങ്ങാനുള്ള സൗകര്യം കൂടി കണക്കിലെടുത്ത് അഞ്ച് ലീഫുകള്‍ അടങ്ങിയ ബുക്ക്ലെറ്റാണ് ഇത്തവണ പുറത്തിറക്കിയത്.