കഠിനംകുളത്ത് ഒഡീഷ സ്വദേശി ബിപിൻ മഹാപാത്രയെ കൊലപ്പെടുത്തിയ കേസിൽ പ്രതി ബലിയാ നായക്കിനെ ജുഡീഷ്യൽ കസ്റ്റഡിയിൽ ജയിലിലിട്ട് വിചാരണ ചെയ്യാൻ തലസ്ഥാന വിചാരണ കോടതി ഉത്തരവിട്ടു. തിരുവനന്തപുരം രണ്ടാം അഡീ. ജില്ലാ സെഷൻസ് കോടതിയാണ് പ്രതിക്ക് ജാമ്യം നിരസിച്ച് കൽതുറുങ്കിലിട്ട് വിചാരണ ചെയ്യാൻ ഉത്തരവിട്ടത്. ഒഡീഷ നയാഗർഹ് ജില്ലയിൽ ഗോലഗോള ഖണ്ഡുഗ്വാൺ സ്വദേശി അച്യൂത് നായക് മകൻ ബി ലിയനായക് (26) ആണ് വിചാരണ നേരിടുന്നത്.

ഗൗരവമേറിയ കുറ്റകൃത്യത്തിലുൾപ്പെട്ട അന്യ സംസ്ഥാനക്കാരനായ പ്രതിയെ ജാമ്യത്തിൽ വിട്ടയച്ചാൽ ശിക്ഷ ഭയന്ന് ഒളിവിൽ പോകാനും സാക്ഷികളെ ഭീഷണിപ്പെടുത്താനും സ്വാധീനിക്കാനും തെളിവു നശിപ്പിക്കാനുമുള്ള സാധ്യതയുണ്ടെന്ന് നിരീക്ഷിച്ചാണ് പ്രതിക്ക് കോടതി ജാമ്യം നിരസിച്ചത്.

സാക്ഷി വിസ്താര വിചാരണക്കായി ഒറീസക്കാരായ 6 കൃത്യ സ്ഥല സാക്ഷികളെ ഹാജരാക്കാനും ജഡ്ജി കെ സനിൽകുമാർ ഉത്തരവിട്ടു. ഒക്ടോബർ 6 ന് സാക്ഷികളെ ഹാജരാക്കാൻ കഴക്കൂട്ടം പോലീസ് സർക്കിൾ ഇൻസ്പെക്ടറോടാണ് കോടതി ഉത്തരവിട്ടത്. സാക്ഷി മൊഴി തർജമ ചെയ്യാൻ ഹിന്ദി പരിഭാഷകനെ നിയമിക്കാൻ ജില്ലാ ലീഗൽ സർവീസസ് അതോറിറ്റിക്ക് കോടതി നിർദ്ദേശം നൽകി.

ഒഡീഷക്കാരായ അന്യസംസ്ഥാന തൊഴിലാളികൾ താമസിച്ച മേനംകുളം കഠിനംകുളത്തെ വീട്ടിൽ 2018 ഡിസംബർ 23 ന് രാത്രി 9.30 മണിക്കാണ് സംഭവം നടന്നത്. കൊല്ലപ്പെട്ട ബിപിൻ മഹാപാത്രയോടും പ്രതി ബിലാ നായക്കിനുമൊപ്പം താമസിച്ചിരുന്ന ഒഡീഷ സ്വദേശി പ്രദിപ്ത കുമാർ ജേന (30) പാചകം ചെയ്യുന്ന ഭക്ഷണം മോശമാണെന്നും സമയത്തിന് ഭക്ഷണം പാചകം ചെയ്യുന്നില്ലായെന്നും പറഞ്ഞ് ബിപിൻ പ്രദീപ്ത കുമാറിനെ വഴക്കു പറഞ്ഞതിനെ പ്രതി ബിലാ ചോദ്യം ചെയ്തു. തുടർന്ന് ബിപിൻ പ്രതിയെ ചീത്ത വിളിക്കുകയും ചെകിട്ടത്തടിച്ചതിലുമുള്ള വിരോധത്താൽ ബിപിനെ കൊലപ്പെടുത്തണമെന്ന ഉദ്ദേശ്യത്തോടെ അടുക്കള മുറിക്കകത്ത് വച്ച് സലാഡിന് ക്യാരറ്റ് അരിഞ്ഞു കൊണ്ടിരുന്ന കത്തികൊണ്ട് ബിപിൻ്റെ വയറിലും ഇടത് വിലാപ്പുറത്തും നെഞ്ചിൽ ഇടതു ഭാഗത്തുമായി കുത്തി മാരകമായ പരിക്കുകൾ ഏൽപ്പിച്ച് കൊലപ്പെടുത്തി കൃത്യ സ്ഥലത്തു നിന്ന് രക്ഷപ്പെട്ട് ഒളിവിൽ പോയി ഒഡീഷയിൽ ഒരു കെട്ടിട നിർമ്മാണ സൈറ്റിലെ ലേബർ ക്യാമ്പിൽ ഒളിവിൽ പാർത്തുവെന്നാണ് പ്രോസിക്യൂഷൻ കേസ്.

ബിപിൻ്റെ ശരീരത്തിൽ എട്ടോളം മുറിവുകൾ ഉണ്ടായിരുന്നതായും അവയിൽ നെഞ്ച് , വയറ് എന്നിവിടങ്ങളിൽ ആഴത്തിൽ ഉണ്ടായ 4 മുറിവുകൾ ആണ് മരണകാരണമായതെന്നും കൃത്യ സ്ഥലത്തു നിന്നു വീണ്ടെടുത്ത കത്തി ഉപയോഗിച്ച് പരിക്കുകളേൽപ്പിച്ചാൽ അത്തരത്തിലുള്ള പരിക്കുകൾ സംഭവിക്കാൻ സാധ്യതയുണ്ടെന്നും മൃതദേഹം പോസ്റ്റ്മോർട്ട് ചെയ്ത് സർട്ടിഫിക്കറ്റ് ഹാജരാക്കിയ മെഡിക്കൽ കോളേജ് ഹോസ്പിറ്റൽ ഫോറൻസിക് അസി.പ്രൊഫസർ ഡോ. സീന. എം. എം. മൊഴി നൽകിയിട്ടുണ്ട്.

കൈലി ,കൃത്യ സ്ഥലത്തു നിന്ന് ഫോറൻസിക് സയൻ്റിഫിക് ഓഫീസർ ശേഖരിച്ച രക്തക്കറ പുരണ്ട കോട്ടൺ ഗോസ് , ലോഹ പിടിയുള്ളതും തുരുമ്പെടുത്തതും മൂർച്ചയേറിയതുമായ കത്തി പരിശോധിച്ചതിൽ എ ഗ്രൂപ്പ് ഇനത്തിൽ പെട്ട മനുഷ്യ രക്തമാണ് അവയിൽ കാണപ്പെട്ടതെന്ന് ഫോറൻസിക് ലബോറട്ടറി സെറോളജി ഡിപ്പാർട്ട്മെൻ്റ് അസിസ്റ്റൻറ് ഡയറക്ടർ വി.ബി. സുനിത ഫോറൻസിക് റിപ്പോർട്ട് കോടതിയിൽ ഹാജരാക്കിയിട്ടുണ്ട്. കൊല്ലപ്പെട്ട ബിപിൻ്റെ രക്തസാമ്പിൾ പരിശോധിച്ചതിൽ 100 മി.ലി രക്തത്തിൽ 54 മില്ലി.ഗ്രാം% ഈഥൈൽ ആൽക്കഹോൾ ഉണ്ടായിരുന്നതായി ചീഫ് കെമിക്കൽ എക്സാമിനേഴ്സ് ലബോറട്ടറി അസി.എക്സാമിനർ എം.ആർ. യുറേക കണ്ടെത്തി തയ്യാറാക്കിയ കെമിക്കൽ റിപ്പോർട്ട് കോടതിയിൽ സമർപ്പിച്ചിട്ടുണ്ട്.