ഗുരുവായൂർ ക്ഷേത്രത്തിൽ ദർശനം നടത്തി റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി. ഇളയ മകൻ ആനന്ദിന്റെ പ്രതിശ്രുത വധു രാധികാ മർച്ചൻ്റ്, റിലയൻസ് ഡയറക്ടർ മനോജ് മോദി എന്നിവർക്കൊപ്പമാണ് ഇന്നലെ ഗുരുവായൂർ ദർശനം നടത്തിയത്. തുടർന്ന് അന്നദാന ഫണ്ടിലേക്ക് 1.51 കോടി സംഭാവന നൽകി.

കഴിഞ്ഞ ദിവസം വൈകിട്ട് അഞ്ച് മണിക്കായിരുന്നു സന്ദർശനം. തുടർന്ന് 20 മിനിട്ടോളം ക്ഷേത്രത്തിൽ ചെലവഴിച്ചു. കൂടാതെ നമസ്ക്കാര മണ്ഡപ സമീപത്തെ വിളക്കിൽ നെയ്യർപ്പിച്ചു. ദേവസ്വം ചെയർമാൻ ഡോ: വി.കെ. വിജയന്റെ നേതൃത്വത്തിൽ ഗുരുവായൂരപ്പന്റെ പ്രസാദക്കിറ്റ് നൽകിയാണ് സ്വീകരിച്ചത്.

"കുറച്ചു കാലമായി ഇവിടെ വന്നിട്ട് ഇപ്പോൾ വരാനായി. വളരെ സന്തോഷമെന്നും, സ്വീകരണത്തിന് നന്ദി" എന്നും മുകേഷ് അംബാനി പറഞ്ഞു. തുടർന്നാണ് ക്ഷേത്രത്തിലെത്തിയത്. പിന്നാലെ ക്ഷേത്ര കാര്യങ്ങൾ ചോദിച്ചറിഞ്ഞ മുകേഷ് അംബാനി കാണിക്കയായി 1.51 കോടിയുടെ ചെക്ക് അന്നദാനഫണ്ടിലേക്ക് നൽകി. തുടർന്ന് ദർശനം പൂർത്തിയാക്കിയ ശേഷം കിഴക്കേ ഗോപുര കവാടത്തിന് മുന്നിൽ ചെയർമാൻ ദേവസ്വത്തിന്റെ ഉപഹാരവും നൽകിയാണ് യാത്രയാക്കിയത്.