കണ്ടക്ടറില്ല..... പുത്തന്‍ പരിഷ്‌ക്കാരവുമായി കെ.എസ്.ആര്‍.ടി.സി..... ദീര്‍ഘദൂര യാത്രക്കാര്‍ക്ക് അതിവേഗം തിരുവനന്തപുരത്ത് നിന്നും എറണാകുളത്തേക്കും തിരികെയും എത്തുന്നതിനായി പുതിയ സര്‍വ്വീസൊരുങ്ങുന്നു... ടിക്കറ്റ് ഓണ്‍ലൈനായി എടുക്കാം.

കണ്ടക്ടര്‍ ഇല്ലാ്ത്ത ബസ് സര്‍വീസുമായി കെ എസ് ആര്‍ ടി സി. ദീര്‍ഘദൂര യാത്രക്കാര്‍ക്ക് അതിവേഗം തിരുവനന്തപുരത്ത് നിന്നും എറണാകുളത്തേക്കും തിരികെയും പോകാന്‍ എന്‍ഡ് ടു എന്‍ഡ് സംവിധാനമാണ ആരംഭിക്കുന്നത്. അവധി ദിവസങ്ങള്‍ ഒഴികെ മറ്റെല്ലാ ദിവസങ്ങളിലും സര്‍വീസ് നടത്താനാണ് ആലോചനയിലുള്ളത്.

ഇത്തരത്തില്‍ സര്‍വീസ് നടത്താനായി എസി ലോ ഫ്‌ലോര്‍ ബസുകളാണ് തിരഞ്ഞെടുത്തിരിക്കുന്നത്. തിരുവനന്തപുരത്ത് നിന്നും രാവിലെ 5.10ന് ആരംഭിച്ച് 9.40ന് എറണാകുളത്ത് എത്തുകയും തിരിച്ച് വൈകിട്ട് 5.20ന് എറണാകുളത്ത് നിന്നും ആരംഭിച്ച് 9.50ന് തിരുവനന്തപുരത്ത് എത്തുകയും ചെയ്യുന്ന തരത്തിലാണ് ക്രമീകരണമുള്ളത്.

യാത്രക്കാരെ കയറ്റുന്നതിനായി കൊല്ലം അയത്തില്‍ ഫീഡര്‍ സ്റ്റേഷനിലും ആലപ്പുഴ കൊമ്മാടി ഫീഡര്‍ സ്റ്റേഷനിലും ഒരു മിനിട്ട് മാത്രമായിരിക്കും ബസുകള്‍ നിര്‍ത്തുക. യാത്രക്കാര്‍ക്ക് ഞായറാഴ്ച മുതല്‍ ഓണ്‍ലൈനായി ടിക്കറ്റുകള്‍ ബുക്ക് ചെയ്യുവാന്‍ കഴിയും .

പുഷ് ബാക്ക് സീറ്റുള്ള രണ്ട് ബസ്സുകളാണ് എന്‍ഡ് ടു എന്‍ഡ് സര്‍വീസിനായി മാറ്റി വെച്ചിട്ടുള്ളത്. ഓഫ് ലൈനായി, ബസ് പുറപ്പെടുന്നതിന് അര മണിക്കൂര്‍ മുന്‍പ് തിരുവനന്തപുരം സെന്‍ട്രല്‍ ബസ് സ്റ്റാന്‍ഡില്‍ നിന്നും കൊല്ലം അയത്തില്‍, ആലപ്പുഴ കൊമ്മാടി ഫീഡര്‍ സ്റ്റേഷനുകളില്‍ നിന്നും ടിക്കറ്റുകള്‍ ബുക്ക് ചെയ്യാന്‍ കഴിയും.