തലസ്ഥാനത്ത് സ്വര്‍ണ്ണക്കവര്‍ച്ചാ തൊണ്ടി റിക്കവറി (വീണ്ടെടുക്കല്‍) തെളിവെടുപ്പിന് കൊണ്ടു വന്ന ബംഗ്‌ളുരു മോഷണക്കേസ് പ്രതി കര്‍ണ്ണാടക പോലീസ് കസ്റ്റഡിയില്‍ നിന്ന് ചാടിപ്പോയ കേസില്‍ പ്രതി വലിയതുറ സ്വദേശി വിനോദിനെതിരെ സിറ്റി തമ്പാനൂര്‍ പോലീസ് കുറ്റപത്രം സമര്‍പ്പിച്ചു.

തിരുവനന്തപുരം മൂന്നാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് കോടതിയിലാണ് കുറ്റപത്രം സമര്‍പ്പിച്ചത്. ഇന്ത്യന്‍ ശിക്ഷാ നിയമത്തിലെ 353 (പൊതുസേവകന്‍ തന്റെ കര്‍ത്തവ്യത്തില്‍ നിന്ന് ഭയന്ന് പിന്തിരിയുവാന്‍ വേണ്ടി കൈയ്യേറ്റവും ബലപ്രയോഗവും നടത്തല്‍) , 225 (ബി) ( നിയമാനുസൃതം പിടി കൂടുന്നതിനെ ചെറുക്കുകയും തടസ്സപ്പെടുത്തുകയും രക്ഷപ്പെടുകയും ചെയ്യല്‍) , 324 ( ആയുധമുപയോഗിച്ച് ദേഹോപദ്രവമേല്‍പ്പിക്കല്‍) എന്നീ കുറ്റങ്ങളാണ് പ്രതിക്കെതിരെ കുറ്റപത്രത്തില്‍ പോലീസ് ആരോപിച്ചിട്ടുള്ളത്.

കസ്റ്റഡിയില്‍ നിന്ന് രക്ഷപ്പെട്ട തമ്പാനൂര്‍ ക്രൈം കേസില്‍ 2022 ജൂണ്‍ 30 മുതല്‍ റിമാന്റിലായിരുന്നു പ്രതി. കര്‍ണ്ണാടക കോടതിയില്‍ നിലവിലുള്ള ഭവന ഭേദന കവര്‍ച്ചാ കേസില്‍ 200 ഗ്രാം സ്വര്‍ണ്ണ തെളിവെടുപ്പിന് കൊണ്ടുവന്ന് തമ്പാനൂര്‍ ലോഡ്ജില്‍ തങ്ങവേയാണ് കസ്റ്റഡി ചാടിപ്പോയത്. കര്‍ണ്ണാടക പോലീസ് വ്യാജ എന്‍കൗണ്ടറില്‍ കൊലപ്പെടുത്തുമെന്ന് ഭയന്നാണ് കസ്റ്റഡി ചാടിപ്പോയതെന്നായിരുന്നു പ്രതിയുടെ വാദം.

2022 ജൂണ്‍ 29 രാവിലെ 8 നാണ് കേസിനാസ്പമായ സംഭവം നടന്നത്. കര്‍ണ്ണാടക ഹെന്നൂര്‍ പോലീസ് തൊണ്ടി റിക്കവറി തെളിവെടുപ്പിന് കൊണ്ടു വന്ന പ്രതി തമ്പാനൂര്‍ അരിസ്റ്റോ ജംഗ്ഷനിലെ ലോഡ്ജില്‍ നിന്ന് ഓടിപ്പോയെന്നാണ് കേസ്.

ബംഗ്‌ളുരുവില്‍ ഭവനഭേദനം നടത്തി വീടു കുത്തിത്തുറന്ന് 200 ഗ്രാം (25 പവന്‍) സ്വര്‍ണ്ണം മോഷ്ടിച്ച കേസില്‍ വിനോദ് ജൂണ്‍ 27 ന് ബംഗ്‌ളുരുവില്‍ അറസ്റ്റിലായിരുന്നു. സ്വര്‍ണ്ണം തിരുവനന്തപുരത്തെ ജ്വല്ലറിയില്‍ വിറ്റെന്ന കുറ്റസമ്മത മൊഴി പ്രകാരം ബെംഗ്‌ളുരു ഹെന്നൂര്‍ മജിസ്‌ട്രേട്ട് കോടതി പ്രതിയെ തൊണ്ടി മുതല്‍ വീണ്ടെടുക്കാനായി ഹെന്നൂര്‍ എസ്‌ഐ അടങ്ങുന്ന അഞ്ചംഗ പോലീസിന്റെ കസ്റ്റഡിയില്‍ വിട്ടു നല്‍കി. 29 ന് പുലര്‍ച്ചെ ഹെന്നൂര്‍ പോലീസ് തമ്പാനൂരിലെ ഹോട്ടലില്‍ മുറിയെടുത്തു. രാവിലെ 8 ന് കടന്നു കളഞ്ഞപ്പോള്‍ വെളുത്ത ടീ ഷര്‍ട്ടും ഓറഞ്ച് നിറത്തിലുള്ള ബര്‍മുഡയുമാണ് ധരിച്ചിരുന്നത്.

പുറത്ത് കടന്ന ഇയാള്‍ മോഡല്‍ സ്‌കൂള്‍ ജംഗ്ഷന്‍ ഭാഗത്തേക്ക് ഓടുന്ന സി സി ടി വി ദ്യശ്യങ്ങളും കര്‍ണ്ണാടക പോലീസ് കൊല്ലുമെന്ന ഭീതിയിലാണ് രക്ഷപ്പെട്ടതെന്നും ഇയാള്‍ അഭിഭാഷകനോട് പറയുന്ന ഓഡിയോ ക്ലിപ്പും പുറത്തു വന്നിരുന്നു.

കേരള പോലീസ് പ്രത്യേക അന്വേഷണ സംഘം രൂപീകരിച്ച് അന്വേഷിക്കവേ ജൂലൈ 1 രാത്രി 7 മണിയോടെ അമ്മയോടൊപ്പം എത്തി തമ്പാനൂര്‍ പോലീസ് സ്റ്റേഷനില്‍ കീഴടങ്ങി. വിനോദിനെ പിടികൂടാനായി കര്‍ണ്ണാടകയില്‍ നിന്നും 4 പോലീസുകാര്‍ കൂടി എത്തിയിരുന്നു. ഇയാളുടെ ബന്ധു വീടുകളിലും പരിചയക്കാരുടെ വീടുകളിലും കേരള - കര്‍ണ്ണാടക പോലീസ് പരിശോധന നടത്തുന്നതിനിടെയാണ് ഇയാള്‍ കീഴടങ്ങിയത്.