ആക്കുളത്ത് വാണിജ്യ അളവായ 74 ഗ്രാം മാരക എം.ഡി.എം.എ. ഡ്രഗ്‌സ് പിടികൂടിയ കേസില്‍ യുവതിയടക്കം നാലു പേര്‍ക്കെതിരെ ശ്രീകാര്യം പോലീസ് കുറ്റപത്രം സമര്‍പ്പിച്ചു. തിരുവനന്തപുരം രണ്ടാം അഡീ. ജില്ലാ സെഷന്‍സ് കോടതിയിലാണ് കുറ്റപത്രം സമര്‍പ്പിച്ചത്. ആക്കുളത്ത് വാടക വീട്ടില്‍ 74 ഗ്രാം മാരക മയക്കുമരുന്നായ എം.ഡി.എം.എ കൈവശം സൂക്ഷിച്ചുവെന്നാണ് കേസ്.




തലശ്ശേരി വിളക്കോടന്‍ ഹൗസില്‍ അഷ്‌കര്‍ (40 ആക്കുളം ഷാസ് വീട്ടില്‍ മുഹമ്മദ് ഷാരോണ്‍ (27) , കോഴിക്കോട് കണിയാറക്കണ്ടില്‍ ഹൗസില്‍ ഫഹദ് അലി, ആറ്റിങ്ങല്‍ മണനാക്ക് ചന്തവിള വീട്ടില്‍ സീന (27) എന്നിവരാണ് 1 മുതല്‍ 4 വരെയുള്ള പ്രതികള്‍.



2022 ജൂലൈ 31നാണ് ഇവര്‍ ഒരു കാറും ബൈക്കും സഹിതം കസ്റ്റഡിയിലായത്. ആക്കുളം പെട്രോള്‍ പമ്പിനെതിര്‍വശത്ത് റോഡരികിലെ വീട്ടില്‍നിന്നാണ് മയക്കുമരുന്ന് പിടിച്ചത്. അഷ്‌കര്‍ സംഭവത്തിന് ഒരു മാസം മുമ്പു വരെ അല്പം അകലെ വേറൊരു വീട്ടിലാണ് താമസിച്ചിരുന്നത്. ഇയാള്‍ക്ക് മയക്കുമരുന്നു കച്ചവടവുമായി ബന്ധമുണ്ടെന്ന സൂചനയെത്തുടര്‍ന്ന് പോലീസ് നിരീക്ഷിക്കാന്‍ തുടങ്ങിയപ്പോള്‍ താമസം മാറ്റുകയായിരുന്നു. അഷ്‌കറും ഭാര്യയുംകൂടിയാണ് ആക്കുളം പമ്പിനടുത്തുള്ള വീട് വാടകയ്ക്കെടുത്തത്. പിന്നീട് ഭാര്യ നാട്ടിലേക്കു പോയി.


കണ്‍ട്രോള്‍ റൂമില്‍ കിട്ടിയ രഹസ്യവിവരത്തെത്തുടര്‍ന്ന് പോലീസ് സ്ഥലത്ത് എത്തിയപ്പോള്‍ അഷ്‌കറും മറ്റു മൂന്നു പേരുമാണ് വീട്ടിലുണ്ടായിരുന്നത്.


1985 ലെ നര്‍ക്കോട്ടിക് ഡ്രഗ്‌സ് ആന്റ് സൈക്കോട്രോപ്പിക് സബ്സ്റ്റന്‍സ് നിയമപ്രകാരം എംഡിഎം എ 0. 5 ഗ്രാം ചെറിയ അളവും 10 ഗ്രാം മുതല്‍ വാണിജ്യ അളവുമാണ്
അളവിനനുസരിച്ചാണ് ശിക്ഷയുടെ തോത് നിയമത്തില്‍ പറയുന്നത്. 0.5 ഗ്രാം അളവ് കൈവശം വച്ചാല്‍ ചെറിയ അളവെന്ന നിലയ്ക്ക് 22 (എ) പ്രകാരം 6 മാസം കഠിന തടവും പതിനായിരം രൂപ പിഴയും ശിക്ഷ

0.5 ഗ്രാമിനും 10 ഗ്രാമിനും ഇടക്കുള്ള ഇന്റര്‍മീഡിയറി ക്വാണ്ടിറ്റി അളവ് കൈവശം വച്ചാല്‍ 22 (ബി) പ്രകാരം10 വര്‍ഷം കഠിന തടവും ഒരു ലക്ഷം രൂപ പിഴയും ശിക്ഷ

10 ഗ്രാമിന് മേല്‍ കൈവശം വച്ചാല്‍ വാണിജ്യ അളവെന്ന നിലക്ക് 22 (സി) പ്രകാരം 20 വര്‍ഷം കഠിന തടവും 2 ലക്ഷം രൂപ പിഴയുമാണ് ശിക്ഷ.