സിബിഐ മോഡലില്‍ എന്‍ഐഎയെ ശക്തിപ്പെടുത്താന്‍ കേന്ദ്ര സര്‍ക്കാര്‍. കൂടുതല്‍ അധികാരങ്ങള്‍ നല്‍കിയാണ് ശക്തിപ്പെടുത്തുന്നത്. എന്‍ഐഎക്ക് വിശാല അധികാരം നല്‍കിയിട്ടുണ്ടെന്നും 2024 ഓടെ എല്ലാ സംസ്ഥാനങ്ങളിലും എന്‍ഐഎ ബ്രാഞ്ചുകള്‍ തുടങ്ങാന്‍ തീരുമാനിച്ചതായും ആഭ്യന്തരമന്ത്രി അമിത് ഷാ അറിയിച്ചു. ഇത് തീവ്രവാദികള്‍ക്ക് ശക്തമായ മുന്നറിയിപ്പാകും.

അതിര്‍ത്തി കടന്നുള്ള കുറ്റകൃത്യങ്ങള്‍ തടയാന്‍ സംസ്ഥാനങ്ങളും കേന്ദ്രവും കൂട്ടായി പ്രവര്‍ത്തിക്കണമെന്നും അമിത്ഷാ ആവശ്യപ്പെട്ടു. ആര്‍ട്ടിക്കിള്‍ 370 റദ്ദാക്കിയതിന് ശേഷം ജമ്മു കശ്മീരില്‍ 34 ശതമാനത്തോളം തീവ്രവാദ കേസുകള്‍ കുറഞ്ഞതായി അമിത് ഷാ അവകാശപ്പെട്ടു. ജമ്മു കശ്മീരില്‍ സുരക്ഷാ സേനയിലെ അംഗങ്ങള്‍ കൊല്ലപ്പെടുന്നതില്‍ 64 ശതമാനത്തോളം കുറവുണ്ടായി. സാധാരണക്കാര്‍ കൊല്ലപ്പെടുന്നതില്‍ 90 ശതമാനം കുറവുണ്ടായെന്നും അമിത് ഷാ അവകാശപ്പെട്ടു.

ഇന്ത്യയിലെ ദേശീയ കുറ്റാന്വേഷണ വിഭാഗമാണ് ദേശീയ അന്വേഷണ ഏജന്‍സി അഥവാ എന്‍.ഐ.എ. അമേരിക്കയിലെ എഫ്ബിഐ യെ മാതൃകയാക്കി 2009 ല്‍ രൂപീകരിച്ച എന്‍.ഐ.എ.യുടെ പ്രധാന ജോലി രാജ്യത്തിന്റെ സുരക്ഷയെ ബാധിക്കുന്ന തരത്തിലുള്ള കേസുകള്‍ പ്രത്യേകിച്ച് ഭീകര പ്രവര്‍ത്തനത്തെ കുുറിച്ച് അന്വേഷിക്കലാണ്.

തീവ്രവാദത്തിനെതിരെ പ്രവര്‍ത്തിക്കുവാന്‍ പരമ്പരാഗത മാര്‍ഗ്ഗം പോരെന്ന തിരിച്ചറിവാണ് ഈ സംഘടനയുടെ പിറവിക്കുപിന്നില്‍. ഭീകര പ്രവര്‍ത്തനം മാത്രമല്ല രാജ്യരക്ഷയ്ക്കു ഭീക്ഷണിയാകുന്ന എല്ലാ കുറ്റകൃത്യവും എന്‍.ഐ.എ യ്ക്ക് അന്വേഷിക്കാം. കള്ളനോട്ട്, വിമാനം റാഞ്ചല്‍, ആണവോര്‍ജ്ജ നിയമത്തിന്റെ ലംഘനം, മയക്കുമരുന്ന്, സ്വര്‍ണ്ണം എന്നിവയുടെ കള്ളക്കടത്ത്, അന്താരാഷ്ട്ര ഭീകര സംഘങ്ങളിലേക്കുള്ള യുവാക്കളുടെ ചേരല്‍, നാശക ശേഷിയുള്ള ആയുധങ്ങളുടെ ഉപയോഗം എന്നിവ എന്‍.ഐ.എ യുടെ അധികാരപരിധിയില്‍ വരുന്നതാണ്. കേന്ദ്ര ആഭ്യന്തര മന്ത്രിക്കാണ് ഇതിന്റെ നിയന്ത്രണം. പല വിധ കേസുകള്‍ തെളിയിക്കാനും ദേശീയ സുരക്ഷ ഉറപ്പാക്കാനും ഈ ഏജന്‍സിക്ക് സാധിക്കുന്നുണ്ട്.

തീവ്രവാദം അതിരുകടന്ന് മുംബെ ഭീകരാക്രമണത്തില്‍ എത്തിയപ്പോളാണ് ഇത്തരം സംഘടനയുടെ ആവശ്യകതയെപ്പറ്റി ഭരണ കര്‍ത്താക്കള്‍ ബോധവാന്മാരായത്. ഏതു സംസ്ഥാനത്തുമുണ്ടാകുന്ന ഭീകരാക്രമണങ്ങള്‍ അതതു സംസ്ഥാനങ്ങളുടെ അനുമതി കൂടാതെ അന്വേഷിക്കാന്‍ എന്‍.ഐ.എ യ്ക്കാകും. അമേരിക്കയുടെ എഫ്. ബി. ഐ-നെപ്പോലെയൊരു ഫെഡറല്‍ അന്വേഷണ ഏജന്‍സിയായാണ് എന്‍.ഐ.എ യെ വിഭാവനം ചെയ്തിരിക്കുന്നത്.

ഈ ഏജന്‍സി രൂപവത്കരിച്ചുള്ള ബില്ലില്‍ 2008 ഡിസംബര്‍ 30-നു രാഷ്ട്രപതി ഒപ്പുവെച്ചു. 2009 നിലവില്‍ വന്നു. 1975 ബാച്ചിലെ ഐ പി എസ് ഓഫീസര്‍ രാധാ വിനോദ് രാജുവാണ് എന്‍.ഐ.എ മേധാവി. നിലവിലുള്ള സുരക്ഷാസേനയില്‍ നിന്നാണ് എന്‍.ഐ.എയില്‍ ഇപ്പോള്‍ നിയമനം നടത്തുന്നത്. സംസ്ഥാനങ്ങളില്‍ പോലീസില്‍ നിന്നു ഡെപ്യൂട്ടേഷന്‍ വഴിയും ജീവനക്കാരെ നിയമിക്കും.

കോഴിക്കോട് ഇരട്ട സ്‌ഫോടനത്തിന്റെ അന്വേഷണത്തിലൂടെയും ലഷ്‌കര്‍ ഇ തോയ്ബ അംഗം എന്നു കരുതുന്ന തടിയന്റവിട നസീറിലൂടെയും എന്‍.ഐ.എയുടെ അന്വേഷണം കേരളത്തില്‍ എത്തിയിരിക്കുന്നു.
കേരളത്തില്‍ സിമി ക്യാമ്പ് നടത്തിയെന്ന പേരില്‍ ആദ്യമായി ഏറ്റെടുത്ത തീവ്രവാദ കേസില്‍ 16 പേര്‍ അറസ്റ്റ് ചെയ്യുകയും എന്നാല് അവര് നിരപരാധികളാണെന്ന് പറഞ്ഞ് കേരള ഹൈക്കോടതി വെറുതെ വിടുകയും ചെയ്തു.

2020 ജൂണില്‍ കേരളത്തില്‍ നടന്ന സ്വര്‍ണ്ണം കടത്ത് കേസിലെ പ്രതികളെ 2020 ജൂലൈ 12 ന് ദേശീയ അന്വേഷണ വിഭാഗം ബാംഗ്ലൂരില്‍ നിന്നും പിടികൂടി.

ഏറ്റവും അവസാനം കോയമ്പത്തൂര്‍ സ്‌ഫോടനക്കേസില്‍ എന്‍ഐഎ അന്വേഷണത്തിന് കേന്ദ്രസര്‍ക്കാര്‍ ഉത്തരവ്. തമിഴ്‌നാട് സര്‍ക്കാര്‍ എന്‍ഐഎ അന്വേഷണത്തിന് ശുപാര്‍ശ നല്‍കിയിരുന്നു. പ്രതികളില്‍ ഒരാളുടെ ഐ എസ് ബന്ധവും ചാവേര്‍ ആക്രമണ സംശയവും ബലപ്പെടുത്തുന്ന തെളിവുകള്‍ പൊലീസിന് കിട്ടിയ സാഹചര്യത്തിലാണ് ശുപാര്‍ശ നല്‍കിയത്. എന്‍ഐഎ സംഘം ഇന്നലെ തന്നെ കോയമ്പത്തൂരെത്തി പ്രാഥമിക വിവരശേഖരണം തുടങ്ങിയിരുന്നു. അറസ്റ്റിലായ അഞ്ച് പ്രതികളെയും എന്‍ഐഎ ചോദ്യം ചെയ്തിരുന്നു.