ആ യാത്ര പറച്ചില്‍ അവസാനയാത്ര പറച്ചിലായിരുന്നെന്ന് അവരറിഞ്ഞില്ല.... ദേശീയപാതയിലേക്കിറങ്ങിയ അച്ഛനും മകളും കണ്ണില്‍നിന്നു മറയുന്നതുവരെ അമ്മയും മകനും വീടിനു മുന്നില്‍ തന്നെയായിരുന്നു, അകത്തേക്ക് കയറുന്നതിനിടെ പെട്ടെന്നൊരു ശബ്ദം കേട്ട് വിഷ്ണു റോഡിലേക്ക് ഓടിയെത്തിയപ്പോള്‍ കണ്ട കാഴ്ച... അലറിക്കരഞ്ഞ് വീട്ടിലേക്കോടിക്കയറി വിഷ്ണു, നാടൊന്നാകെ ദുരന്തവാര്‍ത്തയറിഞ്ഞ് കണ്ണീര്‍ക്കയത്തിലായി.

അമ്മ കവിതയോടും ജ്യേഷ്ഠന്‍ വിഷ്ണുവിനോടും യാത്രപറഞ്ഞ് എന്നത്തെയും പോലെ ഗൗരി അച്ഛനോടൊപ്പം ബൈക്കില്‍ സ്‌കൂളിലേക്ക് തിരിച്ചതാണ്. ദേശീയപാതയ്ക്ക് തൊട്ടടുത്തു തന്നെയാണ് വീട്. അവര്‍ പോകുന്നതു വരെ രണ്ടു പേരും വീട്ടു മുറ്റത്തു നിന്നു. അമ്മ അകത്തേക്ക് കയറുന്നതിനായി തിരിഞ്ഞ ഉടന്‍തന്നെ വലിയ ശബ്ദം കേട്ടു.

ശബ്ദംകേട്ട് വിഷ്ണു റോഡിലേക്ക് ഓടിയെത്തുമ്പോള്‍ കണ്ടത് കൂറ്റന്‍ കണ്ടെയ്നര്‍ വാഹനത്തിന്റെ അടിയില്‍പ്പെട്ട ബൈക്കും അതിനടിയില്‍ കുരുങ്ങിക്കിടന്ന അച്ഛനെയും സഹോദരിയെയും വലിച്ചിഴച്ചുകൊണ്ടുപോകുന്ന കൂറ്റന്‍ വാഹനവുമാണ്.

വിഷ്ണു അലറിക്കരഞ്ഞ് വീട്ടിലേക്ക് ഓടിക്കയറിയതോടെയാണ് വീട്ടുകാരും അയല്‍ക്കാരും ഇടിത്തീപോലെ ആ ദുരന്തവാര്‍ത്ത അറിയുന്നത്.

അപകടസ്ഥലത്തേക്ക് പരിസരത്തുള്ളവര്‍ ഓടിയടുക്കുമ്പോഴേക്കും കൂറ്റന്‍ കണ്ടെയ്നര്‍ മൈലക്കാട് കയറ്റത്തിന്റെ മുക്കാല്‍ പങ്കും പിന്നിട്ടിരുന്നു. ഗോപകുമാറിനെയും ഗൗരിയെയും നാട്ടുകാര്‍ ഉടന്‍തന്നെ അടുത്തുള്ള സ്വകാര്യ ആശുപത്രിയിലെത്തിച്ചെങ്കിലും മരിച്ചിരുന്നു.

വൈകുന്നേരം് ആറരയോടെയാണ് മൃതദേഹങ്ങള്‍ വീട്ടുമുറ്റത്തൊരുക്കിയ പന്തലില്‍ എത്തിച്ചത്. അടുത്തടുത്തുള്ള കട്ടിലുകളിലേക്ക് പൊതുദര്‍ശനത്തിനായി മൃതദേഹങ്ങള്‍ വെച്ചതോടെ വീടും പരിസരവും ഒന്നാകെ കൂട്ടക്കരച്ചിലായി. കൂട്ടുകാരിയെ അവസാനമായി ഒരുനോക്കുകാണാന്‍ കാത്തുനിന്ന വിദ്യാര്‍ഥികള്‍ വാവിട്ടു നിലവിളിക്കുകയായിരുന്നു. ഇരുവര്‍ക്കും ആദരാഞ്ജലികളുമായി നാടൊന്നാകെ എത്തി. പഴയ സഹപ്രവര്‍ത്തകന് പുഷ്പചക്രം അര്‍പ്പിച്ച്, സല്യൂട്ട് നല്‍കി വിമുക്തഭടന്മാരുടെ സംഘടന ആദരം കാട്ടി.

അതേസമയം അപകടത്തില്‍പ്പെട്ട നാഗാലാന്‍ഡ് രജിസ്ട്രേഷനുള്ള കണ്ടെയ്നര്‍ ലോറിയുടെ ഡ്രൈവറായ ബിഹാര്‍ സ്വദേശിയെ കൊട്ടിയം പോലീസ് അറസ്റ്റ് ചെയ്തു. ബിഹാര്‍ ബെറുണ ചോര്‍വാര്‍ ഷെയ്ക്ക്പുര്‍ സ്വദേശിയായ ഗൗരവ് കുമാറാ(27)ണ് അറസ്റ്റിലായത്. ഇയാളെ പോലീസ് ചോദ്യംചെയ്തുവരുന്നു. മോട്ടോര്‍വാഹനവകുപ്പും സംഭവത്തെക്കുറിച്ച് അന്വേഷണംതുടങ്ങി.