ഒഡീഷയിലെ വനത്തിൽ ബോധം പോയ നിലയിൽ ആനകൾ. വാറ്റ് ചാരായം കുടിച്ചതിനെ തുടർന്ന് ബോധം പോയ അവസ്ഥയിലാണ് 24ഓളം ആനകളെ കണ്ടെത്തിയത്. ഒഡീഷയിലെ പരമ്പരാഗത നാടൻ മദ്യമായ മഹുവ കുടിച്ചാണ് ആനകൾക്ക് ബോധം പോയതെന്നാണ് പുറത്ത് വരുന്ന റിപ്പോർട്ട്.

അതേസമയം സമീപ ഗ്രാമത്തിലെ ആളുകൾ തയ്യാറാക്കി വനത്തിൽ സൂക്ഷിച്ച മദ്യം തിരിച്ചെടുക്കുന്നതിനായി വനത്തിനുള്ളിലേക്ക് പോയപ്പോഴാണ് മത്ത് പിടിച്ച് ഉറങ്ങുന്ന ആനകളെ കാണാനിടയായത്. മാത്രമല്ല കിയോഞ്ജർ ജില്ലയിലെ ശിലിപദ കശുവണ്ടി വനത്തിന് സമീപം താമസിക്കുന്നവർ തയ്യാറാക്കിയ മദ്യമാണ് ആനകൾ കുടിച്ചത്.

ഇവിടെ താമസിക്കുന്നവർ വീര്യം വെയ്ക്കുന്നതിനായി പാത്രങ്ങളിലാക്കി വനത്തിൽ മഹുവ സൂക്ഷിച്ചിരുന്നു. ഇത് എടുക്കാനായി പോയതാണ് പ്രദേശവാസികൾ. എന്നാൽ മദ്യം സൂക്ഷിച്ചിരുന്ന എല്ലാ പാത്രങ്ങളും പൊട്ടിയിരുന്നു. മാത്രമല്ല മഹുവ സൂക്ഷിച്ചിരുന്ന സ്ഥലത്തിന് സമീപം ബോധംകെട്ട് ഉറങ്ങുന്ന ആനകളെയാണ് അവർ കണ്ടത്.

ഇതോടെ ആനകളെ ഉണർത്താൻ ശ്രമിച്ചിരുന്നെങ്കിലും ഫലം കാണാതെ വന്നതോടെ വനം വകുപ്പിനെ വിവരം അറിയിക്കുകയായിരുന്നു. തുടർന്ന് ഡ്രം അടിച്ചാണ് വനംവകുപ്പ് ഉദ്യോഗസ്ഥർ ആനകളെ ഉണർത്തിയതെന്ന് പ്രദേശവാസികൾ വ്യക്തമാക്കി.