സാങ്കേതിക സര്വകലാശാല വിസി ആയി ഡോ സിസ തോമസിനെ നിയമിച്ച ഗവര്ണ്ണറുടെ ഉത്തരവ് റദ്ദാക്കണമെന്നാവശ്യപ്പെട്ട് സര്ക്കാര് നല്കിയ ഹര്ജി ഇന്ന് വീണ്ടും ഹൈക്കോടതി പരിഗണനയില്
സാങ്കേതിക സര്വകലാശാല വിസി ആയി ഡോ സിസ തോമസിനെ നിയമിച്ച ഗവര്ണ്ണറുടെ ഉത്തരവ് റദ്ദാക്കണമെന്നാവശ്യപ്പെട്ട് സര്ക്കാര് നല്കിയ ഹര്ജി ഇന്ന് വീണ്ടും ഹൈക്കോടതി പരിഗണനയില്.
വിസിയെ ശുപാര്ശ ചെയ്യേണ്ടത് സര്ക്കാരാണെന്നും എന്നാല് സിസ തോമസിനെ ഗവര്ണ്ണര് സ്വന്തം ഇഷ്ടപ്രകാരം നിയമിക്കുകയായിരുന്നുവെന്നുമാണ് സര്ക്കാരിന്റെ വാദം. നിയമ വിരുദ്ധമായ ഗവര്ണ്ണറുടെ ഉത്തരവ് റദ്ദാക്കണമെന്നാണ് സര്ക്കാരിന്റെ ആവശ്യം. നിയമനം സ്റ്റേ ചെയ്യണം എന്ന സര്ക്കാര് ആവശ്യം കോടതി നിരാകരിച്ചിരുന്നു.
വിസി നിയമനത്തിനായി സര്ക്കാര് മുന്നോട്ടുവച്ച ശുപാര്ശകള് തള്ളിക്കൊണ്ടായിരുന്നു സാങ്കേതിക വിദ്യാഭ്യാസ വകുപ്പില് സീനിയര് ജോയിന്റ് ഡയറക്ടറായ സിസ തോമസിന് കെടിയു വിസിയുടെ ചുമതല ഗവര്ണ്ണര് നല്കിയത്.
ഹര്ജിയില് യുജിസിയെ കോടതി സ്വമേധയാ കക്ഷി ചേര്ത്തിട്ടുണ്ട്. ചട്ടങ്ങള്ക്ക് വിരുദ്ധമാണോ ഗവര്ണ്ണറുടെ ഉത്തരവെന്ന കാര്യത്തിലാണ് യുജിസി ഇന്ന് നിലപാട് അറിയിക്കേണ്ടത്. ജസ്റ്റിസ് ദേവന് രാമചന്ദ്രന്റെ ബഞ്ചാണ് ഹര്ജി പരിഗണിക്കുന്നത്.
അതേസമയം, ഗവര്ണറെ ചാന്സലര് സ്ഥാനത്ത് നിന്ന് ഒഴിവാക്കിയുള്ള ഓര്ഡിനന്സ് സര്ക്കാര് ഉടന് ആരിഫ് മുഹമ്മദ് ഖാന് അയച്ചേക്കും. രണ്ട് ദിവസം മുമ്പ് ചേര്ന്ന മന്ത്രിസഭാ യോഗമാണ് ഓര്ഡിന്സ് പാസ്സാക്കിയതെങ്കിലും ഇന്നലെ രാത്രി വരെ ഗവര്ണര്ക്ക് അയച്ചിട്ടില്ല.
ഓര്ഡിനന്സ് രാഷ്ട്രപതിക്ക് അയച്ചാല് നിയമസഭ സമ്മേളനം വിളിച്ച് ചേര്ത്ത് ബില് പാസ്സാക്കാന് കഴിയുമോ ചോദ്യം ഉയരുന്നുണ്ടെങ്കിലും സര്ക്കാര് പിന്നോട്ട് പോകാന് സാധ്യതയില്ല. അതിനിടെ, കലാമണ്ഡലം കല്പിത സര്വകലാശാല ചാന്സലര് സ്ഥാനത്ത് നിന്നും ഗവര്ണ്ണറെ മാറ്റി ഇന്നലെ സര്ക്കാര് ഉത്തരവ് ഇറക്കിയിരുന്നു.
സര്ക്കാര് ഗവര്ണര് പോര് കനക്കുന്നതിനിടെയാണ് കലാമണ്ഡലം സര്വ്വകലാശാലയില് നിന്ന് ഗവര്ണറെ വെട്ടിയുള്ള സര്ക്കാര് ഉത്തരവ്. യുജിസി ചട്ടപ്രകാരം കല്പ്പിത സര്വകലാശാലകളിലെ ചാന്സിലറെ സ്പോണ്സര്ക്ക് തീരുമാനിക്കാവുന്നതാണ്.
കലാമണ്ഡലത്തിന്റെ സ്പോണ്സര് സര്ക്കാരാണ്. 2006 മുതല് കലാമണ്ഡലം ചാന്സിലര് ഗവര്ണറാണ്. അഞ്ച് വര്ഷത്തേക്കായിരുന്നു നിയമനം എങ്കിലും കാലാവധി നീട്ടി നല്കുകയായിരുന്നു. യുജിസി മാര്ഗ്ഗ നിര്ദ്ദേശ പ്രകാരം കലാമണ്ഡലത്തിലെ മാറ്റത്തിന് ഗവര്ണറുടെ അനുമതി പോലും വേണ്ടെന്നതാണ് സര്ക്കാരിന് പഴുതായത്. പുതിയ ചാന്സിലര് വരും വരെ പ്രൊചാന്സിലര് കൂടിയായ സാംസ്കാരിക മന്ത്രിക്കാകും ചാന്സലര് ചുമതലയുള്ളത്.
"
https://www.facebook.com/Malayalivartha
