തിരുവനന്തപുരത്ത് അപകടത്തിൽപ്പെട്ട കാറിൽ നിന്ന് ലക്ഷങ്ങൾ വിലവരുന്ന തിമിംഗല ഛർദി പിടികൂടി. ആറ്റിങ്ങൽ കല്ലമ്പലത്ത് വച്ച് പ്രതികൾ അടങ്ങുന്ന സംഘം സഞ്ചരിച്ച കാർ മറ്റൊരു വാഹനത്തിൽ ഇടിച്ചതോടെ ഇവരുടെ യാത്ര മുടങ്ങുകയായിരുന്നു. സംഭവത്തിൽ ഇരട്ട സഹോദരങ്ങളെ വനം വകുപ്പ് അറസ്റ്റ് ചെയ്തു.

കൊല്ലം ആശ്രാമം വയലിൽ പുത്തൻവീട്ടിൽ ദീപു, ദീപക് എന്നിവരെയാണ് വനം വകുപ്പിന്‍റെ പിടിയിലായത്. സംഭവത്തിൽ ചവറ സ്വദേശി മനോജ്, മാർത്താണ്ഡം സ്വദേശി മരിയദാസ് എന്നിവർ ഒളിവിലാണെന്ന് വനം വകുപ്പ് അറിയിച്ചു. പ്രതികളിൽ നിന്ന് വിൽപനയ്ക്കായി കൊണ്ട് പോയ അഞ്ചേ മുക്കാൽ കിലോ തിമിംഗല ഛർദിയാണ് പിടികൂടിയത്.

അപകട വിവരം അറിഞ്ഞ് പൊലീസ് സ്ഥലത്ത് എത്തിയതോടെ പ്രതികൾ വാഹനത്തിൽ മൂന്ന് പൊതികളിലായി സൂക്ഷിച്ചിരുന്ന തിമിംഗല ഛർദി പുറത്തേക്ക് വലിച്ചെറിയുകയായിരുന്നു. ഇതിനിടയിൽ സംഘത്തിലെ രണ്ട് പേർ പിന്നാലെ വന്ന മറ്റൊരു വാഹനത്തിൽ കയറി രക്ഷപ്പട്ടു.

ഇവരുടെ പെരുമാറ്റത്തില്‍ സംശയം തോന്നിയ പൊലീസ് സംഘം ഇരട്ട സഹോദരങ്ങളെ തടഞ്ഞ് വെച്ചു ഇവർ വലിച്ചെറിഞ്ഞ പൊതികൾ പൊലീസ് പരിശോധിച്ചു. തുടർന്നാണ് തിമിംഗല ഛർദ്ദിയാണ് ഇവര്‍ വലിച്ചെറിഞ്ഞതെന്ന് പൊലീസിന് വ്യക്തമായത്. തുടർന്ന് പാലോട് വനം വകുപ്പ് ഉദ്യോഗസ്ഥരെ വരുത്തി ഇവരെ കൈമാറുകയായിരുന്നു.