ഇന്ത്യന്‍ കമ്യൂണിസ്റ്റ് പാര്‍ട്ടിയുടെ യുവജന സംഘടനയായ ഓള്‍ ഇന്ത്യാ യൂത്ത് ഫെഡറേഷന്‍ (എ ഐ വൈ എഫ്) സംസ്ഥാന പ്രസിഡന്റും സി പി ഐ സംസ്ഥാ കൗണ്‍സില്‍ അംഗവുമായ ജി. കൃഷ്ണപ്രസാദിനെ യൂത്ത് കോണ്‍ഗ്രസുകാര്‍ കഠിന ദേഹോപദ്രവമേല്‍പ്പിച്ച് നരഹത്യ ചെയ്യാന്‍ ശ്രമിച്ച കേസില്‍ കോടതിയില്‍ ഹാജരാകാത്ത യൂത്ത് കോണ്‍ഗ്രസ് നേമം നിയമസഭാ മണ്ഡലം സെക്രട്ടറി ഷൈന്‍ലാലടക്കം 3 പ്രതികള്‍ക്കെതിരെ കോടതി ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചു.


തിരുവനന്തപുരം മൂന്നാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയുടേതാണുത്തരവ്. ഒന്നാം പ്രതി ഷൈന്‍ലാലിനെ കൂടാതെ മൂന്നാം പ്രതി അഭിലാഷ് , എട്ടാം പ്രതി സനില്‍കുമാര്‍ എന്നിവരെ അറസ്റ്റ് ചെയ്യാനാണുത്തരവ്. 2013 ജൂലൈ 8 നാണ് സംഭവം നടന്നത്. ഒക്ടോബര്‍ 31നാണ് ഷൈന്‍ലാല്‍ അറസ്റ്റിലായി റിമാന്റ് ചെയ്യപ്പെട്ടത്.


സരിതാ നായര്‍ ഉള്‍പ്പെട്ട സോളാര്‍ തട്ടിപ്പു കേസില്‍ അന്നത്തെ മുഖ്യമന്ത്രി ഉമ്മന്‍ ചാണ്ടിയുടെ രാജി ആവശ്യപ്പെട്ട് എ ഐ വൈ എഫ് നടത്തിയ നിയമസഭാ മാര്‍ച്ച് പാളയം എല്‍ എം എസ് കോമ്പൗണ്ടിന് സമീപമെത്തിയപ്പോള്‍ മാരകായുധങ്ങളുമായി സംഘം ചേര്‍ന്ന് അവിടെയുണ്ടായിരുന്ന യൂത്ത് കോണ്‍ഗ്രസ് പ്രവര്‍ത്തകരും ഇവരും തമ്മില്‍ സംഘര്‍ഷമുണ്ടായി.


സംഘര്‍ഷത്തിനിടെയാണ് കൃഷ്ണപ്രസാദ് ഉള്‍പ്പെടെയുള്ളവര്‍ക്ക് മര്‍ദ്ദനമേറ്റത്. തലക്ക് പരിക്കേറ്റ കൃഷ്ണപ്രസാദിനെയും ഏതാനും എ ഐ വൈ എഫ് പ്രവര്‍ത്തകരെയും മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചിരുന്നു. കൃഷ്ണപ്രസാദിനെ മര്‍ദ്ദിച്ചയാളെ മാധ്യമങ്ങളില്‍ വന്ന ചിത്രങ്ങളിലൂടെയും മറ്റുമാണ് തിരിച്ചറിഞ്ഞത്. സംഭവം നടന്ന് മൂന്നര മാസത്തിന് ശേഷം തിരുമലയില്‍ നിന്നാണ് ഷൈന്‍ലാലിനെ അറസ്റ്റ് ചെയ്തത്.

കേസില്‍ നെടുമങ്ങാട് പുഞ്ഞന്‍കോട് പുലിയൂര്‍കോണം നിവാസി ഷൈന്‍ലാല്‍ (28/2013) , സന്തോഷ് , അഭിലാഷ് , പ്രസാദ് , ഷിബു , എ.ശശികുമാര്‍ , രാജേഷ് , സനില്‍കുമാര്‍ എന്നീ 8 യൂത്ത് കോണ്‍ഗ്രസ് പ്രവര്‍ത്തകരാണ് പ്രതികള്‍. 2015 ജൂലൈ 25 നാണ് മ്യൂസിയം പോലീസ് കുറ്റപത്രം സമര്‍പ്പിച്ചത്. ഇന്ത്യന്‍ ശിക്ഷാ നിയമത്തിലെ 143 (ന്യായവിരോധ സംഘത്തിലെ അംഗമാകല്‍) , 147 ( ലഹളയുണ്ടാക്കല്‍) , 148 (മാരകായുധങ്ങളുമായി സംഘം ചേരല്‍) , 149 (പൊതു ലക്ഷൃത്തിലേക്കായി സംഘത്തിലെ അംഗമാകല്‍), 341 (അന്യായമായി തടസം ചെയ്യല്‍) , 326 (കഠിന ദേഹോപദ്രവമേല്‍പ്പിക്കല്‍) , 354 ( വനിതാ പ്രവര്‍ത്തകരെ കൈയ്യേറ്റവും ബലപ്രയോഗവും നടത്തി സ്ത്രീത്വത്തെ അപമാനിക്കല്‍) , 294 (ബി) (അസഭ്യം വിളിക്കല്‍), 308 (നരഹത്യാശ്രമം) എന്നീ കുറ്റങ്ങള്‍ ചുമത്തിയാണ് കുറ്റപത്രം സമര്‍പ്പിച്ചത്.