ദമ്പതിമാര്‍ പഴനിയിലെ ലോഡ്ജില്‍ തൂങ്ങി മരിക്കാനിടയായത് ലക്ഷങ്ങളുടെ കടബാദ്ധ്യതയെന്ന് പോലീസ്.... അഴകിയകാവ് ക്ഷേത്രത്തിനു സമീപത്തായി കണ്ടത്തിപറമ്പ് വീട്ടില്‍ രഘുരാമന്‍ (46), ഭാര്യ ഉഷ (44) എന്നിവര്‍ പഴനിയിലെ ലോഡ്ജില്‍ തൂങ്ങി മരിക്കാന്‍ കാരണം ലക്ഷങ്ങളുടെ കടബാദ്ധ്യതയെന്ന് പൊലീസ്.

ഇവര്‍ പലരില്‍ നിന്നായി പണവും സ്വര്‍ണവും വാങ്ങിയിട്ടുണ്ടായിരുന്നു. ഇവ തിരികെ കിട്ടാത്തതു സംബന്ധിച്ച് പൊലീസില്‍ പരാതി ലഭിച്ചതും കോടതി കയറേണ്ടി വന്നതും മാനസിക സംഘര്‍ഷത്തിന് കാരണമായെന്നും പൊലീസ് .

കല്‍പ്പണിക്കാരനായ രഘുരാമന്റെ പള്ളുരുത്തിയിലെ വീട് വിറ്റ ശേഷം ഉഷയുടെ വീട്ടിലായിരുന്നു താമസിച്ചു വന്നിരുന്നത്. കഴിഞ്ഞ തിങ്കളാഴ്ചയാണ് ഇവര്‍ അഴകിയകാവ് ക്ഷേത്ര ദര്‍ശനം കഴിഞ്ഞ് പഴനിക്ക് വണ്ടി കയറിയത്. മക്കളായ ദേവനന്ദയെയും ദേവ കൃഷ്ണയെയും വീട്ടില്‍ ഉഷയുടെ പിതാവിനൊപ്പം നിര്‍ത്തിയിട്ടാണ് അവര്‍ യാത്രയായത്.

പുലര്‍ച്ചെ പഴനി ദര്‍ശനം കഴിഞ്ഞ് അടിവാരത്ത് മുറിയെടുത്തു. വൈകുന്നേരം 5 മണിയായിട്ടും മുറി തുറക്കാത്തതിനെ തുടര്‍ന്ന് ലോഡ്ജ് നടത്തിപ്പുകാരാണ് വിവരം പഴനി പൊലീസില്‍ അറിയിച്ചത്. പൊലീസ് നടത്തിയ പരിശോധനയില്‍ ഫാനില്‍ തൂങ്ങി മരിച്ച നിലയില്‍ ഇരുവരെയും കണ്ടെത്തി.

രഘുരാമന്റെ പോക്കറ്റില്‍ നിന്ന് ലഭിച്ച ആത്മഹത്യാ കുറിപ്പില്‍ പള്ളുരുത്തിയിലെ രാഷ്ട്രീയ പ്രവര്‍ത്തകര്‍ ഭീഷണിപ്പെടുത്തുന്നതായും പണവും സ്വര്‍ണവും നല്‍കിയവര്‍ മാനസികമായി പീഡിപ്പിക്കുന്നതായും പറഞ്ഞിരുന്നു. പഴനി ആശുപത്രിയില്‍ പോസ്റ്റ്‌മോര്‍ട്ടത്തിനു ശേഷം മൃതദേഹങ്ങള്‍ വീട്ടിലെത്തിച്ച് സംസ്‌കാരചടങ്ങുകള്‍ ഇന്ന് നടത്തും.