ഛത്തീസ്ഗഡിലെ ജാഷ്പുര്‍ ജില്ലയില്‍ ചാര്‍ട്ടേഡ് വിമാനം കുന്നിലിടിച്ച് തകര്‍ന്ന് രണ്ടു പൈലറ്റുമാര്‍ കൊല്ലപ്പെട്ടു. ഉച്ചയ്ക്ക് ശേഷം നാരായണ്‍പുര്‍ പൊലീസ് സ്‌റ്റേഷന്‍ പരിധിയിലുള്ള ആര കുന്നിനു സമീപമാണ് അപകടമുണ്ടായത്. അമിതമായി താഴ്ന്നു പറന്നതാണ് അപകടത്തിന് കാരണമായതെന്നാണ് പ്രാഥമിക നിഗമനം.

നിലത്തുനിന്ന് ഏകദേശം 30 അടി മാത്രം ഉയരത്തില്‍ പറക്കുകയായിരുന്ന വിമാനം കുന്നിലിടിച്ച ശേഷം തകര്‍ന്നു വീഴുകയായിരുന്നുവെന്ന് ഉദ്യോഗസ്ഥര്‍ പറഞ്ഞു. അപകടത്തിനു തൊട്ടുമുന്‍പ് വിമാനം മരങ്ങള്‍ക്ക് മുകളിലൂടെ അസ്വാഭാവികമായ രീതിയില്‍ താഴ്ന്നു പറക്കുന്നതിന്റെ ദൃശ്യങ്ങള്‍ പുറത്തുവന്നിട്ടുണ്ട്. ഒരൊറ്റ എന്‍ജിന്‍ മാത്രമുള്ള ചെറിയ വിമാനമാണ് അപകടത്തില്‍പ്പെട്ടത്.

സംഭവസ്ഥലത്തേക്ക് രക്ഷാപ്രവര്‍ത്തകര്‍ എത്തിയിട്ടുണ്ട്. പൈലറ്റുമാരുടെ മരണവിവരവും അപകടത്തിന്റെ വ്യാപ്തിയും ഔദ്യോഗികമായി സ്ഥിരീകരിക്കാനുള്ള നടപടികള്‍ പുരോഗമിക്കുകയാണെന്നും കൂടുതല്‍ വിവരങ്ങള്‍ ലഭ്യമാകുന്നതേയുള്ളൂവെന്നും അധികൃതര്‍ അറിയിച്ചു.