ശ്രീകാര്യത്തെ മൈനര്‍ പെണ്‍കുട്ടിയോട് ഇന്റര്‍നെറ്റിലൂടെ പൂവാലശല്യവും രാത്രിയില്‍ ഭവന കൈയ്യേറ്റവും നടത്തിയെന്ന കേസില്‍ 19 കാരനായ പിറവം സ്വദേശി റിജോഷ് ഹാജരാകാന്‍ തലസ്ഥാന ജില്ലാ പോക്‌സോ കോടതി ഉത്തരവിട്ടു. പ്രതി ഡിസംബര്‍ 7 ന് ഹാജരാകാന്‍ പോക്‌സോ ജഡ്ജി എം.പി. ഷിബു ആണ് ഉത്തരവിട്ടത്.


ഓഡിയോ ക്ലിപ്പുകള്‍ , ശബ്ദ സാമ്പിളുകള്‍ , മൊബൈല്‍ ഫോണുകള്‍ എന്നിവയുടെ ഫോറന്‍സിക് സയന്‍സ് ലബോറട്ടറി പരിശോധനാ റിപ്പോര്‍ട്ട് ഹാജരാക്കാന്‍ എഫ് എസ് എല്‍ ഡയറക്ടറോടും കോടതി ഉത്തരവിട്ടു. സമൂഹമാധ്യമം വഴിപരിചയപ്പെട്ട പ്രായ പൂര്‍ത്തിയാകാത്ത പെണ്‍കുട്ടിക്ക് അശ്ലീല സന്ദേശങ്ങള്‍ അയച്ച് ശല്യപ്പെടുത്തുകയും രാത്രി പതുങ്ങിയിരുന്ന് ഭവന കൈയ്യേറ്റം നടത്തിയെന്നുമാണ് കേസ്.


2021 ഒക്ടോബര്‍ 19 ലാണ് കേസിനാസ്പദമായ സംഭവം നടന്നത്. പൗഡിക്കോണം സ്വദേശിനിയായ 15 കാരി പഠനത്തിനായി ഉപയോഗിച്ചിരുന്ന ഫോണില്‍ റിജോഷ് നിരന്തരം സന്ദേശം അയച്ച് പരിചയപ്പെടുകയും തുടര്‍ന്ന് അശ്ലീല സന്ദേശങ്ങള്‍ അയക്കുകയും വിളിച്ച് ശല്യപ്പെടുത്തുകയും ചെയ്തിരുന്നു. പിന്നീട് രാത്രി പതുങ്ങിയിരുന്നു കൊണ്ടുള്ള ഭവന കൈയ്യേറ്റം നടത്തിയെന്നും കാട്ടി വീട്ടുകാര്‍ നല്‍കിയ പരാതിയിലാണ് പോക്‌സോ കേസ്. 19 നാണ് ശ്രീകാര്യം പോലീസ് പ്രതിയെ അറസ്റ്റ് ചെയ്തത്.



ഇന്ത്യന്‍ ശിക്ഷാ നിയമത്തിലെ 354 - ഡി ( ഒരു സ്ത്രീ ഇന്റര്‍നെറ്റോ ഇ-മെയിലോ മറ്റ് ഇലക്ട്രോണിക് വിനിമയ രൂപമോ ഉപയോഗിക്കുന്നത് നിരീക്ഷിച്ചു കൊണ്ടുള്ള പൂവാലശല്യക്കുറ്റം) , 457 ( രാത്രി പതുങ്ങിയിരുന്നു കൊണ്ടുള്ള ഭവന കൈയ്യേറ്റവും ഭവനഭേദനവും) , പോക്‌സോ നിയമത്തിലെ 12 , 11 (4) എന്നീ വകുപ്പുകള്‍ പ്രകാരമാണ് കോടതി കേസെടുത്തത്.