തിരുവനന്തപുരം പൊഴിയൂരില്‍ ലോകകപ്പ് ഫൈനല്‍ മത്സരത്തിനിടെയുണ്ടായ സംഘര്‍ഷത്തില്‍ പൊലീസ് ഉദ്യോഗസ്ഥന് സാരമായ പരുക്ക്, പ്രതി പോലീസ് കസ്റ്റഡിയില്‍
തിരുവനന്തപുരം പൊഴിയൂരില്‍ ലോകകപ്പ് ഫൈനല്‍ മത്സരത്തിനിടെയുണ്ടായ സംഘര്‍ഷത്തില്‍ പൊലീസ് ഉദ്യോഗസ്ഥന് സാരമായ പരുക്ക്. അക്രമം നടത്തിയ യുവാവിനെ പൊലീസ് പിടികൂടി. ലോകകപ്പ് ഫുട്‌ബോള്‍ മത്സരം കാണാന്‍ തിരുവനന്തപുരം പൊഴിയൂര്‍ ജംഗ്ഷനില്‍ നാട്ടുകാര്‍ സ്‌ക്രീന്‍ സ്ഥാപിച്ചിരുന്നു.
ഇവിടെ ഇന്നലെ ഫൈനല്‍ മത്സരം കാണാനായി ധാരാളം ആളുകള്‍ എത്തുകയും ചെയ്തു. ഇതിനിടെയാണ് രാത്രി പതിനൊന്നര മണിയോടെ രണ്ട് യുവാക്കള്‍ മദ്യപിച്ചെത്തി പ്രശ്‌നമുണ്ടാക്കാനായി ആരംഭിച്ചത്.
വിവരമറിഞ്ഞ് സ്ഥലത്ത് എത്തിയ പൊഴിയൂര്‍ പൊലീസ് കസ്റ്റഡിയിലെടുക്കാനായി ശ്രമിച്ചപ്പോള്‍ പൊഴിയൂര്‍ സ്വദേശിയായ ജസ്റ്റിന്‍ പൊലീസുകാരെയും ആക്രമിക്കുകയായിരുന്നു. പൊഴിയൂര്‍ എസ്.ഐ സജിയെ ജസ്റ്റിന്‍ മര്‍ദ്ദിച്ചു. എസ്‌ഐയെ ചവിട്ടി തറയില്‍ തള്ളുകയും തുടര്‍ന്ന് കൈയില്‍ ചവിട്ടുകയും ചെയ്തു.
തുടര്‍ന്ന് പൊലീസുകാര്‍ ബലം പ്രയോഗിച്ച് അക്രമിയായ ജസ്റ്റിനെ പിടികൂടുകയും ഇയാളെ പിന്നീട് പാറശ്ശാല പൊലീസ് സ്റ്റേഷനിലേക്ക് മാറ്റി. അക്രമത്തില്‍ പരുക്കേറ്റ എസ്.ഐ സജിയെ പാറശ്ശാല താലൂക്കാശുപത്രിയില്‍ പ്രവേശിപ്പിച്ചു. എസ്.ഐയ്ക്ക് കൈയ്ക്കും, തലയ്ക്കും പരുക്കേറ്റിട്ടുണ്ട്. പ്രതി ജസ്റ്റിന്‍ പാറശാല പോലീസ് കസ്റ്റഡിയിലാണ്.
https://www.facebook.com/Malayalivartha
