സ്‌കൂളിന് നേരെ കല്ലേറ് നടത്തി അജ്ഞാതരുടെ ആക്രമണം. നാദാപുരം വളയം ഗവൺമെന്‍റ് ഹയർ സെക്കണ്ടറി സ്കൂളിന് നേരെയാണ് ആക്രമണം. ഇന്ന് പുലർച്ചയോടെയാണ് സംഭവമെന്ന് കരുതുന്നു. രാവിലെ സ്ക്കൂൾ അധികൃതർ എത്തിയപ്പോഴാണ് ഹെഡ് മിസ്ട്രസിന്റ ഓഫീസിനോട് ചേർന്ന ജനൽ ചില്ലുകൾ എറിഞ്ഞ് തകർത്തതായി കണ്ടത്. സ്കൂളിന് നേരെ ഉണ്ടായ ആക്രമണത്തിൽ സ്കൂൾ അധികൃതർ വളയം പൊലീസിൽ പരാതി നൽകി.

ഇതിന് പിന്നാലെ വളയം എസ് ഐ അനീഷ് വടക്കേടത്തിന്‍റെ നേതൃത്വത്തിൽ പൊലീസ് സ്ഥലത്ത് പരിശോധന നടത്തി. അന്വേഷണം തുടരുകയാണെന്നും പ്രതികളെ എത്രയും വേഗം പിടികൂടുമെന്നും പൊലീസ് പ്രതികരിച്ചു. കല്ലേറിൽ ജനൽ ചില്ലുകൾ തകർന്നിട്ടുണ്ട്.

ഈ അദ്ധ്യയന വർഷത്തിന്‍റെ ആരംഭത്തിൽ സ്കൂളിന് നേരെ അക്രമം ഉണ്ടായിരുന്നു. അന്ന് കമ്പ്യൂട്ടറും കുടിവെള്ള പൈപ്പുകളും ഭക്ഷണ ശാല ഉൾപ്പെടെയുള്ളവ നശിപ്പിക്കുകയും സ്ഥലം മലിനമാക്കുകയും ചെയ്തിരുന്നു. ഇതുവരെ ആക്രമണം നടത്തിയ ആരെയും പോലീസ് അറസ്റ്റ് ചെയ്തിട്ടില്ല.