സജി ചെറിയാന്റെ മന്ത്രിസഭ പുനപ്രവേശനത്തില്‍ നിയമോപദേശം തേടുന്നത് സ്വാഭാവിക നടപടിയാണെന്ന് ഗവര്‍ണര്‍ ആരിഫ് മുഹമ്മദ് ഖാന്‍. സജി ചെറിയാന്റെ മന്ത്രിസഭാ പ്രവേശനം ഒരു സാധാരണ വിഷയമല്ലെന്നും വിശദമായി പരിശോധിക്കേണ്ടതുണ്ടെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു.


സജി ചെറിയാന്‍ രാജിവെച്ചത് ഭരണഘടനാ ലംഘനത്തിനും സത്യപ്രതിജ്ഞാ ലംഘനത്തിനുമാണ്. സാധാരണ ഗതിയില്‍ മുഖ്യമന്ത്രിയുടെ ശുപാര്‍ശ ഗവര്‍ണര്‍ അംഗീകരിക്കണ്ടതാണ്. എന്നാല്‍ ഇത് അത്തരം ഒരു സാധാരണ സാഹചര്യമല്ല.

അദ്ദേഹം പറഞ്ഞത് എന്ത് തന്നെയും ആവട്ടെ, അതാണ് അദ്ദേഹത്തിന്റെ രാജിയിലേക്ക് നയിച്ചത്. അതില്‍ കഴമ്പുണ്ടെന്ന് കണ്ടാണ് മുഖ്യമന്ത്രി സജി ചെറിയാന്റെ രാജി ആവശ്യപ്പെട്ടത്. രാജിവെച്ച സാഹചര്യത്തില്‍ എന്ത് മാറ്റമാണുണ്ടായത് എന്ന് വിശദമായി പരിശോധിക്കേണ്ടതുണ്ട്. അതിന് ശേഷമാവും തുടര്‍ നടപടികളെന്നും ഡല്‍ഹിയില്‍ നിന്ന് തിരിച്ചെത്തിയ ഗവര്‍ണര്‍ മാധ്യമപ്രവര്‍ത്തകരോട് പറഞ്ഞു.


അതേസമയം ചീഫ്‌സെക്രട്ടറിയും പൊതുഭരണ അഡി.ചീഫ്‌സെക്രട്ടറിയും ഇന്നലെ പലവട്ടം സമ്മര്‍ദ്ദം ചെലുത്തിയിട്ടും ഗവര്‍ണര്‍ തീരുമാനം അറിയിക്കാന്‍ തയ്യാറായില്ല. ക്ഷണക്കത്ത് അച്ചടിക്കാനും അതിഥികളെ ക്ഷണിക്കാനും ഒരുക്കങ്ങള്‍ നടത്താനും സമയം വേണ്ടതിനാല്‍ തീരുമാനം അറിയിക്കണമെന്ന് പൊതുഭരണ അഡി.ചീഫ് സെക്രട്ടറി നേരിട്ട് അഭ്യര്‍ത്ഥിച്ചിട്ടും ഗവര്‍ണര്‍ മനസു തുറന്നില്ല.

പൊതുഭരണ സെക്രട്ടറി പലവട്ടം അഭ്യര്‍ത്ഥിച്ചതിനെത്തുടര്‍ന്ന് രാജ്ഭവന്റെ ഒരുവശത്ത് ചെറിയ ഷാമിയാന പന്തല്‍ സജ്ജമാക്കാന്‍ പൊതുമരാമത്ത് വകുപ്പിന് അനുമതി നല്‍കി. പൊലീസ്, ബാന്‍ഡ് അംഗങ്ങള്‍, അതിഥികള്‍ക്ക് ചടങ്ങ് കാണാനുള്ള സി.സി.ടി.വി സൗകര്യമൊരുക്കല്‍ എന്നിവയ്ക്കായാണ് പന്തലിടുന്നത്.മന്ത്രിയായി സത്യപ്രതിജ്ഞ ചെയ്യിക്കാനുള്ള മുഖ്യമന്ത്രിയുടെ ശുപാര്‍ശ സാധാരണഗതിയില്‍ അംഗീകരിക്കുകയാണ് പതിവെന്നും ഇത് അസാധാരണ സാഹചര്യമാണെന്നും ഗവര്‍ണര്‍ മാദ്ധ്യമങ്ങളോട് പറഞ്ഞു.



നാളെ വൈകിട്ട് 4ന് സത്യപ്രതിജ്ഞ ചെയ്യാനാണ് സര്‍ക്കാര്‍ അനുമതി തേടിയത്. രമേശ് ചെന്നിത്തല, മുന്‍ ചീഫ്‌സെക്രട്ടറി ജിജി തോംസണ്‍ എന്നിവരുമായി രണ്ട് സ്വകാര്യ കൂടിക്കാഴ്ചകള്‍ മാത്രമാണ് ഇന്ന് ഗവര്‍ണറുടെ പരിപാടികള്‍.


മകന്റെ വിവാഹത്തിന് ക്ഷണിക്കാനാണ് ചെന്നിത്തല എത്തുന്നത്. നാളെ കണ്ണൂര്‍, എം.ജി സര്‍വകലാശാലാ വൈസ്ചാന്‍സലര്‍മാരെ പുറത്താക്കുന്നതിന് മുന്നോടിയായുള്ള ഹിയറിംഗ് നിശ്ചയിച്ചിട്ടുണ്ട്. 6ന് ഗവര്‍ണര്‍ ഡല്‍ഹിക്ക് പോവുകയും ചെയ്യും.