കോട്ടയം മീനടത്ത് കലത്തിൽ കുടുങ്ങിയ മൂന്നു വയസുകാരൻ രക്ഷപ്പെട്ടു. അലൂമിനിയം കലത്തിൽ കുടുങ്ങിയ മൂന്നു വയസുകാരൻ നീരജിനെ ആരോഗ്യപ്രവർത്തകരും അഗ്നിരക്ഷാസേനയും ചേർന്ന് രക്ഷപ്പെടുത്തി.

കഴിഞ്ഞ ദിവസം രാവിലെ 11 മണിയോടെയാണ് സംഭവം നടന്നത്. കിടപ്പ് രോഗിയെ പരിചരിക്കുന്നതിനെത്തിയ മീനടം പഞ്ചായത്ത് പാലിയേറ്റീവ് പരിചരണവിഭാഗം നഴ്സും ആരോഗ്യപ്രവർത്തകരുമാണ് സംഭവം ആദ്യം കാണുന്നത്.

ഇതോടെ ആരോഗ്യപ്രവർത്തകരായ സൂസൻ, ഷീല, ജിജിമോൻ എന്നിവർ വിവരം പഞ്ചായത്ത് പ്രസിഡന്റ് മോനിച്ചൻ കിഴക്കേടത്തെ അറിയിക്കുകയും ചെയ്തു. തുടർന്ന് അദ്ദേഹം പഞ്ചായത്ത് വക ആംബുലൻസിൽ കുട്ടിയെ പാമ്പാടി അഗ്നിരക്ഷാ ആസ്ഥാനത്ത് എത്തിക്കാനുള്ള ഏർപ്പാടുണ്ടാക്കുകയായിരുന്നു. പിന്നാലെ അവിടെവെച്ച് കലം മുറിക്കാതെയും കുട്ടിക്ക് പരിക്കൊന്നുമില്ലാതെയും കുട്ടിയെ പുറത്തെടുത്ത് മാതാപിതാക്കളെ ഏൽപ്പിക്കുകകയായിരുന്നു.