യു.ജി.സി ചട്ടപ്രകാരമല്ലാതെ നിയമിതരായ എട്ടു വൈസ്ചാന്സലര്മാരെ പുറത്താക്കുന്നതിന്റെ മുന്നോടിയായി രണ്ടു വിസിമാര്ക്ക് ഗവര്ണര് ഇന്ന് ഹിയറിംഗ് നടത്തും
യു.ജി.സി ചട്ടപ്രകാരമല്ലാതെ നിയമിതരായ എട്ടു വൈസ്ചാന്സലര്മാരെ പുറത്താക്കുന്നതിന്റെ മുന്നോടിയായി എം.ജി വി. സി പ്രൊഫ. സാബുതോമസ്. കണ്ണൂര് വി. സി ഡോ.ഗോപിനാഥ് രവീന്ദ്രന് എന്നിവര്ക്ക് ഗവര്ണര് ഇന്ന് ഹിയറിംഗ് നടത്തും.
റഷ്യന് സന്ദര്ശനത്തിലായിരുന്നതിനാല് കഴിഞ്ഞ 12ന് നടത്തിയ ഹിയറിംഗില് സാബുതോമസ് ഹാജരായിരുന്നില്ല. അദ്ദേഹത്തിന്റെ ആവശ്യപ്രകാരമാണ് സമയം കൊടുത്തത്. 12ലെ ഹിയറിംഗില് കണ്ണൂര് വി.സി ഗോപിനാഥ് രവീന്ദ്രന് വേണ്ടി ഹാജരായ അഡ്വ. സുനില്കുമാര് വി.സി പുനര്നിയമനത്തിന്റെ രേഖകള് ആവശ്യപ്പെട്ടിരുന്നു.
ഏതാനും രേഖകള് രാജ്ഭവന് കൈമാറി. അതിനു ശേഷമാണ് ഇന്നത്തെ ഹിയറിംഗില് ഹാജരാകാന് നിര്ദ്ദേശിച്ചത്. അതേസമയം, ഹിയറിംഗിന് ഹാജരാകാനായി കണ്ണൂര് വി.സിയുടെ അഭിഭാഷകന് കൂടുതല് സമയം ആവശ്യപ്പെട്ടിട്ടുണ്ട്.
ഗോപിനാഥ് രവീന്ദ്രന്റേത് പുനര്നിയമനമായതിനാല് യു.ജി.സി ചട്ടങ്ങള് ബാധകമാവില്ലെന്നും സര്വകലാശാലാ നിയമം മാത്രമാണ് ബാധകമെന്നുമാണ് അഭിഭാഷകന് ആദ്യ ഹിയറിംഗില് നിലപാടെടുത്തത്. നിയമനരേഖകള് ലഭിക്കാതെ ആദ്യ ഹിയറിംഗില് പങ്കെടുക്കില്ലെന്ന് കണ്ണൂര് വി.സി അറിയിച്ചിരുന്നെങ്കിലും അഭിഭാഷകനെ നിയോഗിക്കുകയായിരുന്നു.
എം.ജി, കാലിക്കറ്റ്, കുസാറ്റ്, സംസ്കൃതം, കണ്ണൂര്, മലയാളം, ഓപ്പണ്, ഡിജിറ്റല് സര്വകലാശാലാ വി.സിമാര്ക്കും കേരള വി.സിയായി വിരമിച്ച ഡോ.വി.പി.മഹാദേവന് പിള്ളയ്ക്കുമാണ് ഗവര്ണര് നോട്ടീസ് നല്കിയത്.
വിരമിച്ചെങ്കിലും നിയമവിരുദ്ധമായ നിയമനം അസാധുവാക്കാനായി ഗവര്ണര്ക്ക് കഴിയും. നിയമന ശുപാര്ശ തെറ്റായതിനാല് എല്ലാ വി.സിമാരുടെയും നിയമനം അസാധുവാണെന്നാണ് ഗവര്ണറുടെ നിലപാട്.
ഹിയറിംഗിന് അവസരം നല്കിയശേഷം പിരിച്ചുവിടാനാണ് ഗവര്ണര് നീക്കം നടത്തുന്നത് .ഗവര്ണര് നേരത്തേ നോട്ടീസ് നല്കിയിരുന്ന ഫിഷറീസ് വി.സി റിജി ജോണിനെ ഹൈക്കോടതി പുറത്താക്കി. നിയമനത്തില് ക്രമക്കേടുള്ളതിനാല് എം.എസ്.രാജശ്രീയെ (സാങ്കേതിക സര്വകലാശാല) സുപ്രീംകോടതി പിരിച്ചുവിട്ടിട്ടുണ്ടായിരുന്നു.
"
https://www.facebook.com/Malayalivartha
