ശബരിമലയില്‍ വന്‍ ഭക്തജനതിരക്ക് .... ഇന്ന് വിര്‍ച്ച്വല്‍ ക്യൂ വഴി ബുക്ക് ചെയ്തിരിക്കുന്നത് 89,971 പേര്‍,ഭക്തരുടെ ഒഴുക്ക് തുടരുന്നു
ഇന്നലെ രാവിലെ തിരക്ക് അല്‍പം കുറഞ്ഞെങ്കിലും രാത്രിയോടെ വലിയതോതില്‍ തീര്‍ത്ഥാടകരെത്തി.

ഇന്നും അതിന് തന്നെയാണ് സാധ്യത. പരമ്പരാഗത കാനനപാത വഴിയെത്തുന്നവരുടെ എണ്ണത്തിലും റെക്കോര്‍ഡ് വര്‍ദ്ധനയാണ് ഈ ദിവസങ്ങളിലുണ്ടായത്. അതേസമയം ശബരിമല സന്നിധാനത്തെ രണ്ട് കതിനപ്പുരകളും പ്രവര്‍ത്തിച്ചത് മതിയായ സുരക്ഷാ ക്രമീകരണങ്ങളില്ലാതെയാണ് എന്ന ആക്ഷേപം ശക്തമാണ്.

കഴിഞ്ഞ ദിവസം കതിനയ്ക്ക് തീപിടിച്ച് അപകടമുണ്ടായപ്പോള്‍. തീയണക്കയ്ക്കാനുള്ള വെള്ളം പോലും പരിസരത്ത് ഉണ്ടായിരുന്നില്ല. സന്നിധാനത്തെ കെട്ടിടങ്ങളിലും ഹോട്ടലുകളിലും അവസ്ഥ ഇത് തന്നെ.

മാളികപ്പുറം വെടിപ്പുരയില്‍ കഴിഞ്ഞ ദിവസമാണ് കതിന പൊട്ടി അപകടമുണ്ടായത്. സംഭവത്തില്‍ മൂന്ന് പേര്‍ക്ക് പരിക്കേറ്റിരുന്നു. ജയകുമാര്‍ (47), അമല്‍ (28), രജീഷ് (35) എന്നിവര്‍ക്കാണ് പരിക്കേറ്റത്. ഇതില്‍ ജയകുമാറിന്റെ നില ഗുരുതരമാണ്.

മൂന്ന് പേരെയും കോട്ടയം മെഡിക്കല്‍ കോളേജിലേക്ക് കൊണ്ടുപോയി. സന്നിധാനം സര്‍ക്കാര്‍ ആശുപത്രിയിലായിരുന്നു ആദ്യം പ്രവേശിപ്പിച്ചത്. പിന്നീട് പമ്പ ആശുപത്രിയിലേക്കും അവിടെ നിന്ന് കോട്ടയം മെഡിക്കല്‍ കോളേജിലേക്കും റഫര്‍ ചെയ്യുകയായിരുന്നു.



അതേസമയം ദര്‍ശനസമയം കൂട്ടിയതും തിരക്ക് ഒഴിവാക്കുന്നതിന് കാരണമായി. മാത്രമല്ല കുട്ടികള്‍ക്കും വയോജനങ്ങള്‍ക്കും അംഗപരിമിതര്‍ക്കുമായി വലിയ നടപന്തലില്‍ പ്രത്യേക ക്യൂ സംവിധാനവും ഒരുക്കിയിട്ടുണ്ട്.പുലര്‍ച്ചെ 2.30ന് ആരംഭിക്കുന്ന ദര്‍ശനം ഉച്ചക്ക് 1.30നാണ് അവസാനിക്കുന്നത്. തുടര്‍ന്ന് വൈകിട്ട് 3ന് തുറക്കുന്ന നട രാത്രി 11.30വരെ ദര്‍ശനത്തിനായി തുറന്നുവയ്ക്കും. വെര്‍ച്ച്വല്‍ ക്യൂ ബുക്കുചെയ്തും സ്‌പോട്ട് ബുക്ക് ചെയ്തും തീര്‍ത്ഥാടകര്‍ സന്നിധാനത്ത് എത്തുന്നുണ്ട്.