ശബരിമല തീര്‍ത്ഥാടകര്‍ സഞ്ചരിച്ച മിനി ബസും ജീപ്പും കൂട്ടിയിടിച്ച് എട്ടുപേര്‍ക്ക് പരിക്കേറ്റു. ശബരിമലയിലേക്ക് പോകുകയായിരുന്ന മിനി ബസ്സും ദര്‍ശനം കഴിഞ്ഞു മടങ്ങുകയായിരുന്ന കാറുമാണ് കൂട്ടിയിടിച്ചത്.

പുനലൂര്‍ മുവാറ്റുപുഴ സംസ്ഥാനപാതയില്‍ തോട്ടമണ്‍ ജങ്ഷനു സമീപം വളവിലാണ് അപകടം. ചൊവ്വാഴ്ച വൈകീട്ട് 3.15ഓടെ വാഹനങ്ങള്‍ കൂട്ടിയിടിക്കുകയായിരുന്നു.ഇടിയുടെ ആഘാതത്തില്‍ തെങ്കാശി സ്വദേശികളായ മുത്തയ്യ (50), ഐശ്വര്യ (9), ചിന്നസ്വാമി (60), പ്രേംകുമാര്‍ (38), ചന്ദ്രദേവി (68), മിത്രതന്‍ (29), കലൈമകള്‍ (54), ചെന്നൈ സ്വദേശി രാജേന്ദ്രന്‍ (60) എന്നിവര്‍ക്കാണ് പരിക്കേറ്റത്.

പരിക്കേറ്റവരെ നാട്ടുകാരും യാത്രക്കാരും ചേര്‍ന്ന് ആദ്യം റാന്നി താലൂക്ക് ആശുപത്രിയില്‍ എത്തിച്ചു. തുടര്‍ന്ന് സാരമായി പരിക്കേറ്റവരെ പത്തനംതിട്ട ജനറല്‍ ആശുപത്രിയിലേക്ക് മാറ്റി.

അതേസമയം ശബരിമല തീര്‍ത്ഥാടകര്‍ സഞ്ചരിച്ച മിനി ബസ് ഇന്നലെ വീടിന് മുകളിലേയ്ക്ക് മറിഞ്ഞ് 16പേര്‍ക്ക് പരിക്ക്. കട്ടപ്പന പാറക്കടവ് ബൈപ്പാസ് റോഡിലാണ് സംഭവം. ഇന്നലെ പുലര്‍ച്ചെ 3.45നാണ് തമിഴ്‌നാട് സ്വദേശികളായ തീര്‍ത്ഥാടകര്‍ സഞ്ചരിച്ച മിനി ബസ് അപകടത്തില്‍പ്പെട്ടത്.

ഇറക്കത്തില്‍ വാഹനത്തിന്റെ നിയന്ത്രണം നഷ്ടപ്പെടുകയായിരുന്നു. തുടര്‍ന്ന് വളവിലുണ്ടായിരുന്ന വീടിന്റെ കാര്‍ പോര്‍ച്ചിന് മുകളിലേയ്ക്ക് വാഹനം പതിക്കുകയായിരുന്നു. കാപ്പാട് ഷഫീഖ് എന്നയാളുടേതാണ് വീട്. വലിയ ശബ്ദം കേട്ട് വീട്ടുകാര്‍ പുറത്തിറങ്ങിയപ്പോഴാണ് അപകടം നടന്നത് അറിഞ്ഞത്. തുടര്‍ന്ന് പൊലീസിനെയും ഫയര്‍ഫോഴ്‌സിനെയും വിവരമറിയിക്കുകയായിരുന്നു.