നീറ്റ് കോച്ചിംഗ് ക്ലാസിനായി സഹോദരനെ സ്‌കൂളില്‍ വിടാന്‍ പോകവേ റോഡിലെ കുഴി ഒഴിവാക്കാനായി സ്‌കൂട്ടര്‍ വെട്ടിച്ച യുവതിക്ക് ട്രക്കിടിച്ച് ദാരുണാന്ത്യം.... അപകടത്തിന് പിന്നാലെ ഒരു മണിക്കൂറിനുള്ളില്‍ അധികൃതര്‍ റോഡിലെ കുഴിയടച്ചു.

ചെന്നൈയ്ക്ക് സമീപമുള്ള മധുരവോയലിന് സമീപമാണ് സംഭവം നടന്നത്. സഹോദരനൊപ്പം സ്‌കൂട്ടറില്‍ യാത്ര ചെയ്യുകയായിരുന്ന ശോഭന (22)യ്ക്കാണ് അപകടത്തില്‍ ജീവന്‍ നഷ്ടമായത്.

സ്വകാര്യ കമ്പനിയില്‍ സോഫ്റ്റ്വയര്‍ എഞ്ചിനീയറായി ജോലി ചെയ്യുകയായിരുന്നു യുവതി. അപകടമുണ്ടായതിന് പിന്നാലെ ട്രക്ക് ഡ്രൈവര്‍ ഓടി രക്ഷപ്പെട്ടെങ്കിലും പിന്നീട് ഇയാളെ പൊലീസ് അറസ്റ്റ് ചെയ്തു.

നിറയെ കുഴികളുള്ള റോഡില്‍ വീണ യുവതിയുടെ ശരീരത്തിലൂടെ മണല്‍ കയറ്റി വന്ന ലോറിയാണ് ഇടിച്ച് കയറിയത്. ശോഭന സംഭവസ്ഥലത്ത് വച്ച് തന്നെ മരിച്ചു, അതേസമയം റോഡില്‍ വീണ സഹോദരന്‍ അത്ഭുതകരമായി രക്ഷപ്പെട്ടു.

റോഡിന്റെ ശോചനീയാവസ്ഥയാണ് യുവതിയുടെ മരണത്തിന് കാരണമായതെന്നാണ് നാട്ടുകാരുടെ ആരോപണം.