ഭക്ഷ്യവിഷബാധയെ തുടർന്ന് യുവതി മരിച്ച കോട്ടയം സംക്രാന്തിയിലെ പാർക്ക് ഹോട്ടലിനെതിരെ കൂടുതൽ പരാതികൾ പുറത്തുവരുകയാണ്. വാർത്ത വന്നതിന് പിന്നാലെ തകൃതിയായി തന്നെ പരിശോധനകൾ നടന്നുവരുകയാണ്. 'ആർക്കെങ്കിലും എന്തെങ്കിലും പറ്റുമ്പോൾ മാത്രമാണ്‌ ഇവിടെ നിയമങ്ങളും പരിശോധനകളുമൊക്കെ സർക്കാരിനും അധികൃതർക്കും ഓർമ്മ വരുന്നത്‌' എന്ന് കുറിക്കുകയാണ് ഡോ. ഷിംനാ അസീസ്.

ഫേസ്ബുക്ക് കുറിപ്പ് ഇങ്ങനെ;

എന്തൊരു പ്രഹസനമാണ്‌!! ആർക്കെങ്കിലും എന്തെങ്കിലും പറ്റുമ്പോൾ മാത്രമാണ്‌ ഇവിടെ നിയമങ്ങളും പരിശോധനകളുമൊക്കെ സർക്കാരിനും അധികൃതർക്കും ഓർമ്മ വരുന്നത്‌. ഹോട്ടലുകളിലെ പരിശോധനകളുടെ തകൃതിയായ വാർത്തകളാണ്‌ ചുറ്റും.

ഇതൊക്കെ ആദ്യമേ കൃത്യമായി ചെയ്‌തിരുന്നേൽ കോട്ടയത്തെ ആ നഴ്‌സിന്‌ ഇന്ന്‌ ഈ ഗതി വരുമായിരുന്നോ? ഭക്ഷണം കഴിച്ച്‌ മരിക്കുന്നതൊക്കെ എങ്ങനെയാണ്‌ ന്യായീകരിക്കാനാവുക?

ഇനിയിപ്പോ പൂട്ടിക്കലായി, കുറച്ചീസം കഴിഞ്ഞാൽ തുറക്കലായി...നല്ല മേളം. എത്ര നാൾ കാണുമോ എന്തോ! ആരെ പറ്റിക്കാനാണ്‌ ഇതൊക്കെ? നിയമങ്ങൾ പാലിക്കാനും പാലിച്ചു കൊണ്ടേ ഇരിക്കാനുമുള്ളതാണ്‌... മരണപ്പെട്ട സഹപ്രവർത്തകക്ക്‌ ആദരാഞ്ജലികൾ.