യുവ സംവിധായിക നയന സൂര്യയുടെ മരണം കൊലപാതകമെന്ന സംശയം കൂടുതൽ ബലപ്പെടുന്നതായി റിപ്പോർട്ട്. പ്രത്യേക സംഘത്തിന്റെ പരിശോധനയിൽ മരണത്തിൽ നിഗൂഢതയുണ്ടെന്ന് കണ്ടെത്തിയതായുള്ള സൂചനകളും പുറത്ത് വരുകയാണ്. ആയതിനാൽ തന്നെ ആഴത്തിലുള്ള അന്വേഷണം വേണമെന്നാണ് വിലയിരുത്തൽ. ഇതേതുടർന്ന് കേസിൽ പ്രത്യേക സംഘം നാളെ റിപ്പോർട്ട് നൽകും.

അതോടൊപ്പം തന്നെ നയന സൂര്യയുടെ സുഹൃത്തുക്കളെ വീണ്ടും ചോദ്യംചെയ്യാനാണ് അന്വേഷണ സംഘത്തിന്റെ നീക്കം. നയനയുടെ മുറിയിൽ ആദ്യം പ്രവേശിച്ചവരെയാണ് ചോദ്യംചെയ്യുന്നത്. സുഹൃത്തുക്കളുടെ മൊഴിയിൽ അവ്യക്തതയുണ്ടെന്നും അന്വേഷണസംഘം സംശയിക്കുന്നുമുണ്ട്. അന്വേഷണ സംഘം നയനയുടെ പോസ്റ്റ്‌മോർട്ടം ചെയ്ത ഡോക്ടറിൽ നിന്നും വിവരങ്ങൾ ശേഖരിക്കുകയും ചെയ്തു.

ആദ്യ അന്വേഷണത്തിൽ തന്നെ ഗുരുതര വീഴ്ചയുണ്ടായി. മഹസർ തയ്യാറാക്കുന്നതിലടക്കം വീഴ്ചയുണ്ടെന്നാണ് പുതിയ കണ്ടെത്തൽ. നയനയുടെ മുറി പൂട്ടിയിരുന്നെങ്കിലും സുരക്ഷിതമല്ലെന്നാണ് വിലയിരുത്തൽ. പുറത്ത് നിന്ന് അകത്ത് കടക്കാൻ വഴിയുണ്ടെന്നും കണ്ടെത്തിയിട്ടുണ്ട്. എന്നാൽ മുറി തുറന്നത് എങ്ങനെയെന്നത് മഹസറിൽ വ്യക്തമാക്കിയിട്ടില്ല.