മകന്റെ ഭാര്യയോട് അപമര്യാദയായി പെരുമാറിയ അച്ഛനെ കൊലപെടുത്തിയ കേസിലെ പ്രതിയായിരുന്ന മകന്‍ രാജേഷിനെ (43) തെളിവുകളുടെ അഭാവത്തില്‍ വെറുതെ വിട്ടു. പ്രതി കൊലപാതകം നടത്തി എന്ന കുറ്റകൃത്യം തെളിയിക്കുവാന്‍ പ്രോസീക്യൂഷന് കഴിഞ്ഞില്ല എന്ന കാര്യം ചുണ്ടികാട്ടിയാണ് കോടതി പ്രതിയെ വിട്ടയച്ചത്. തിരുവനന്തപുരം ആറാം അഡിഷണല്‍ സേഷന്‍സ് കോടതി ജഡ്ജി വിഷ്ണുവിന്റേതാണ് ഉത്തരവ്.


നെയ്യാറ്റിന്‍കര താലൂക്കില്‍ ശിവശൈലം വീട്ടില്‍ രാജേഷിനെയാണ് കോടതി വെറുതെ വിട്ടത്. 2014 ഡിസംബര്‍ 17 ന് രാത്രി 11 മണിക്കാണ് സംഭവം.സ്വന്തമായി വീട് ഇല്ലായിരുന്ന കൊല്ലപ്പെട്ട രവീന്ദ്രന്‍ നായര്‍ കരമന തളിയല്‍ എന്ന സ്ഥലത്ത് സ്വകാര്യ ലോഡ്ജിലാണ് താമസിച്ചിരുന്നത്. ഇവിടെ വച്ചാണ് കൊലപാതകം നടക്കുന്നത്.


കൊലപാതകത്തിന് ശേഷം രാജേഷ് കരമന പോലീസ് സ്റ്റേഷനില്‍ എത്തി കുറ്റം സമ്മതിക്കുകയായിരുന്നു. തോര്‍ത്ത് ഉപയോഗിച്ചാണ് രവീന്ദ്രന്‍ നായരെ രാജേഷ് കൊലപെടുത്തിയത് എന്നാണ് പ്രൊസീക്യൂഷന്‍ കേസ്.

രാജേഷിന്റെ ഭാര്യയോട് അപമര്യാദയായി പെരുമാറിയ പിതാവ് തന്റെ കുടുംബ ജീവിതം തകര്‍ക്കാന്‍ ശ്രമിക്കുകയും ഇത് പല തവണ പറഞ്ഞു വിലക്കിയിട്ടും ആവര്‍ത്തിച്ചു ഇത് കാരണമാണ് കൊലപ്പെടുത്തിയത് എന്ന് രാജേഷ് പറഞ്ഞിരുന്നതായി കുറ്റപത്രത്തില്‍ പറയുന്നത്. കരമന പോലീസ് അന്വേഷണം പൂര്‍ത്തിയാക്കി 2014 ല്‍ കുറ്റപത്രം സമര്‍പ്പിച്ചു.