ഓരോ തെരഞ്ഞെടുപ്പിനും എന്തൊക്കെ പയറ്റിയാലും ബിജെപിക്ക് കാര്യമായ മുന്നേറ്റമൊന്നും കാഴ്ച വെയ്ക്കാൻ സാധിക്കാത്ത ഏക സംസ്ഥാനമെന്ന് തന്നെ കേരളത്തെ എടുത്തുപറയാം. 2019 ലെ ലോക്സഭ തിരഞ്ഞെടുപ്പിൽ ശബരിമല വിഷയം ആയുധമാക്കി വൻ പ്രചരണം ബിജെപി നടത്തിയിട്ട് കൂടി കനത്ത തിരിച്ചടിയായിരുന്നു നേരിട്ടത്. എന്നാൽ ഇത്തവണ നടക്കാൻ പോകുന്നത് വേറെ ലെവൽ തന്നെ. അതായത് എന്ത് വിലകൊടുത്തും കേരളത്തിൽ താമര വിരിയിക്കുമെന്നാണ് ബി ജെ പി അവകാശപ്പെടുന്നത്. പ്രത്യേക മണ്ഡലങ്ങൾ കേന്ദ്രീകരിച്ച് പ്രവർത്തനം നടത്തുന്ന കേരളത്തിലെ പതിവ് തിരുത്തി 20 മണ്ഡലങ്ങളിലും ഒരുപോലെ ശ്രദ്ധ പതിപ്പിച്ച് മുന്നോട്ട് പോകാനാണ് നേതൃത്വത്തിന്റെ തീരുമാനം എന്നത്.

മുൻകാലങ്ങളെ എടുത്തുനോക്കിയാൽ 2019 ൽ അഞ്ച് മണ്ഡലങ്ങളായിരുന്നു ബി ജെ പി തങ്ങളുടെ ലിസ്റ്റിൽ 'എ പ്ലസ്' മണ്ഡലങ്ങളായി ഉൾപ്പെടുത്തിയത്. തിരുവനന്തപുരം, ശബരിമല വിവാദം കൊഴുത്ത പത്തനംതിട്ട, കാസർഗോഡ്,തൃശ്ശൂർ, പാലക്കാട് മണ്ഡലങ്ങളിലായിരുന്നു ബി ജെ പി പ്രതീക്ഷ വയ്ക്കുന്നത്. എന്നാൽ ഇതിൽ തന്നെ തൃശ്ശൂരും പത്തനംതിട്ടയിലും അട്ടിമറിയായിരുന്നു ബി ജെ പി പ്രതീക്ഷിച്ചത്. പിന്നെ വിജയം ഉണ്ടായില്ലെന്ന് മാത്രമല്ല കാര്യമായ മത്സരം ഇവിടങ്ങളിൽ കാഴ്ച വെയ്ക്കാൻ പോലും ബിജെപിക്ക് കഴിഞ്ഞില്ല.

പക്ഷേ ഇത്തവണ കേരളത്തിൽ താമര വിരിയിക്കും എന്നാണ് ദേശീയ നേതൃത്വത്തിന്റെ തീരുമാനം. ഇതിനായി 20 മണ്ഡലങ്ങളും കേന്ദ്രീകരിച്ചുള്ള പ്രവർത്തനങ്ങളാണ് പാർട്ടി നടത്താൻ പദ്ധതിയിട്ടിരിക്കുന്നത്. ഇവിടങ്ങളിലെല്ലാം തന്നെ ഒരേ കൊടുത്ത് പ്രവർത്തിക്കാനാണ് തീരുമാനം. ഇതിന്റെ ഭാഗമായി താഴെ തട്ടുമുതൽ പാർട്ടിയെ ശക്തിപ്പെടുത്താനുള്ള നടപടികൾ ആരംഭിക്കുകയും ചെയ്യും . അതോടൊപ്പം തന്നെ പ്രതീക്ഷ കൂടുതൽ ഉള്ള മണ്ഡലങ്ങളിൽ കേന്ദ്ര മന്ത്രിമാർക്ക് ചുമതലയും നൽകി കഴിഞ്ഞിരിക്കുകയാണ്.

അങ്ങനെ മൂന്ന് കേന്ദ്രമന്ത്രിമാരെയാണ് ചുമതലപ്പെടുത്തിയിരിക്കുന്നത്. വിദേശകാര്യ മന്ത്രി എസ് ശങ്കറിനാണ് തിരുവനന്തപുരം മണ്ഡലത്തിന്റെ ചുമതല എന്നത്. ശോഭ കരന്തജെക്ക് ആറ്റിങ്ങല്‍, പത്തനംതിട്ട മണ്ഡലങ്ങളുടെ ചുമതലയും ഭഗവന്ത കുബ്ബെക്ക് മാവേലിക്കര, തൃശ്ശൂര്‍, പാലക്കാട് മണ്ഡലങ്ങളുടെ ചുമതലയും നൽകി കഴിഞ്ഞതായാണ് അറിയാൻ കഴിയുന്നത്. ഈ മണ്ഡലങ്ങളിൽ തന്നെ മാസത്തിൽ ഒന്ന് എന്ന നിലയ്ക്ക് നേതാക്കൾ എത്തുകയും തിരഞ്ഞെടുപ്പ് പ്രവർത്തനങ്ങൾ വിലയിരുത്തുകയും ചെയ്യണം.