ഭക്തിസാന്ദ്രം.... ശബരിമല മകരവിളക്ക് മഹോത്സവത്തിന് മുന്നോടിയായി എരുമേലിയില്‍ പേട്ടതുള്ളല്‍ നടന്നു. അമ്പലപ്പുഴ സംഘത്തിന്റെ പേട്ടതുള്ളലോടെയാണ് ചടങ്ങ് ആരംഭിച്ചത്.

ഗുരുസ്വാമി എ.എന്‍ ഗോപാല കൃഷ്ണപിള്ളയുടെ നേതൃത്വത്തിലുള്ള ആമ്പലപ്പുഴ സംഘം രാവിലെ 11.30 ന് കൊച്ചമ്പലത്തിലെത്തിയതോടെ ആചാരപരമായ ചടങ്ങുകള്‍ക്ക് തുടക്കം കുറിച്ചു.

ക്ഷേത്രത്തിലെ തിടമ്പ് പൂജാ സമയത്ത് ആകാശത്ത് പരുന്ത് വട്ടമിട്ട് പറന്നതോടെ പേട്ടതുള്ളല്‍ തുടങ്ങി. ഭക്തിസാന്ദ്രമായ അന്തരീക്ഷത്തില്‍ രണ്ട ു വര്‍ഷത്തെ ഇടവേളയ്ക്ക് ശേഷമാണ് വലിയ തീര്‍ത്ഥാടക പങ്കാളിത്തത്തോടെയുള്ള പേട്ടതുള്ളല്‍ നടന്നത്.ഗജവീരന്‍മാരുടെ അകമ്പടിയോടെ കൊച്ചമ്പലത്തില്‍ നിന്നും പേട്ട തുള്ളിയെത്തിയ അമ്പലപ്പുഴ സംഘത്തെ നൈനാര്‍ പള്ളിക്ക് മുന്നില്‍ ജമാ അത്ത് ഭാരവാഹികള്‍ സ്വീകരിച്ചു.

പള്ളിയില്‍ കാണിക്ക അര്‍പ്പിച്ച സംഘം വാവരുടെ പ്രതിനിധിയായ താഴത്ത് വീട്ടില്‍ ടി. എച്ച് ആസാദിനെ കൂട്ടിയാണ് വല്യമ്പലത്തിലേക്ക് പേട്ട തുള്ളിയത്. വൈകിട്ട് മൂന്നരയോടെ ആലങ്ങാട്ട് സംഘത്തിന്റെ പേട്ടതുള്ളല്‍ തുടങ്ങി. ഗുരുസ്വാമി എ.കെ വിജയകുമാര്‍ നേതൃത്വം നല്‍കി. ഇരു സംഘങ്ങളും നാളെ കാനന പാതയിലൂടെ ശബരിമലയിലേക്ക് യാത്ര തിരിക്കും. മകര വിളക്ക് ദിവസമായ ശനിയാഴ്ച ഇരു സംഘങ്ങളും സന്നിധാനത്ത് എത്തും.