കണ്ണീര്‍ക്കാഴ്ചയായി.... എടത്വ നീരേറ്റുപുറത്ത് സ്‌കൂട്ടറില്‍ ഇടിച്ച ടിപ്പറിന്റെ ചക്രത്തിനടിയില്‍ പെട്ട് യുവതിക്ക് ദാരുണാന്ത്യം. ചങ്ങംകരി മുരളി സദനത്തില്‍ മഞ്ജുമോള്‍ (42) ആണ് ഒന്‍പതരയോടെ ഉണ്ടായ അപകടത്തില്‍ മരിച്ചത്. അപകടത്തിനു പിന്നാലെ ടിപ്പര്‍ ഡ്രൈവര്‍ ഇറങ്ങിയോടി.


അപകടമുണ്ടാക്കിയ ടിപ്പറിനൊപ്പമെത്തിയ 4 ടിപ്പറുകള്‍ക്കു പോകാന്‍ പൊലീസ് സൗകര്യമൊരുക്കിയെന്നു പറഞ്ഞു പ്രതിഷേധിച്ച ഇരുചക്രവാഹനക്കാരുടെ താക്കോല്‍ ഊരിയത് സംഘര്‍ഷാവസ്ഥയുണ്ടാക്കി.

എസ്‌ഐയെ യാത്രക്കാരും നാട്ടുകാരും തടഞ്ഞു. നിരയായെത്തിയ ടിപ്പറുകളില്‍ ഒരെണ്ണം സ്‌കൂട്ടറിനെ മറികടന്നെത്തിയാണ് മഞ്ജുവിനെ ഇടിച്ചു വീഴ്ത്തിയത്. ടിപ്പറിന്റെ ചക്രം മഞ്ജുവിന്റെ തലയിലൂടെ കയറിയിറങ്ങി.

മഞ്ജുവിനെ പരുമലയിലെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. പൊടിയാടിയില്‍ സ്വകാര്യ ബാങ്ക് ജീവനക്കാരിയാണ് മഞ്ജു. അമ്പലപ്പുഴ തിരുവല്ല റോഡിലാണ് അപകടം നടന്നത്. റോഡിന്റെ ഓരം ചേര്‍ന്നാണ് മഞ്ജു സ്‌കൂട്ടര്‍ ഓടിച്ചിരുന്നതെന്ന് സ്ഥലത്തുണ്ടായിരുന്നവര്‍ പറയുകയാണ്.