ടെറസ്സില്‍ പ്രാവ് വളര്‍ത്തിയ വിരോധത്താല്‍ സഹോദരങ്ങളെ വധിക്കാന്‍ ശ്രമിച്ച ബീമാപ്പള്ളി പത്തേക്കര്‍ നരഹത്യാശ്രമക്കേസില്‍ ഒളിവില്‍ പോയ രണ്ട് പ്രതികള്‍ക്കെതിരെ അറസ്റ്റുവാറണ്ടും ജപ്തി വാറണ്ടും കോടതി പുറപ്പെടുവിച്ചു.

തിരുവനന്തപുരം അഞ്ചാം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയുടേതാണുത്തരവ്. രണ്ടാം പ്രതി ബീമാപ്പള്ളി ഹൈസ്‌ക്കൂളിന് സമീപം പുതുവല്‍ ഹൗസില്‍ സമീര്‍ സുലൈമാന്‍(24) , അഞ്ചാം പ്രതി വിഴിഞ്ഞം ടൗണ്‍ഷിപ്പ് കോളനി നിവാസി അല്‍ത്താഫ് (32) എന്നിവരെ ജനുവരി 31 നകം അറസ്റ്റ് ചെയ്യാനും ഇവരുടെ സ്ഥാവരജംഗമ സ്വത്തുക്കള്‍ ജപ്തി ചെയ്യാനുമാണ് കോടതി ഉത്തരവ്.


2021 ജൂലൈ 20ന് രാത്രി 9 മണിക്കാണ് കേസിനാസ്പദമായ സംഭവം നടന്നത്. ബീമാപ്പള്ളി ഈസ്റ്റ് മാണിക്യ വിളാകം വീട്ടില്‍ സഹോദരങ്ങളായ അഫ്‌സല്‍ ഖാന്‍ (41) , അജ്മല്‍ ഖാന്‍ (32) എന്നിവരെ ആക്രമിച്ച് നരഹത്യ ചെയ്യാന്‍ ശ്രമിച്ചുവെന്നാണ് കേസ്.


പത്തേക്കര്‍ തൈക്കാപ്പള്ളി അല്‍ഫര്‍ റോഡില്‍ വച്ചാണ് സംഭവം നടന്നത്. ഒന്നാം പ്രതി ബീമാപ്പള്ളി സ്വദേശി സുഹൈല്‍ സുലൈമാനും രണ്ടാം പ്രതി സമീര്‍ സുലൈമാനും അജ്മല്‍ ഖാനെ ദേഹോപദ്രവം ഏല്‍പ്പിക്കാന്‍ ശ്രമിക്കുന്നത് കണ്ട് തടയാന്‍ ശ്രമിച്ച സഹോദരന്‍ അഫ്‌സല്‍ ഖാനെ ഒന്നും രണ്ടും പ്രതികള്‍ മര്‍ദ്ദിക്കുകയും ഒന്നാം പ്രതി ഒരു കല്ലെടുത്ത് തലക്ക് നേരേ അടിക്കുകയും അടി തലയില്‍ കൊള്ളാതിരിക്കാന്‍ അഫ്‌സല്‍ കൈ കൊണ്ട് തടുത്ത് കല്ലടക്കം താഴെയിടുകയും 1 മുതല്‍ 5 വരെ പ്രതികള്‍ ചേര്‍ന്ന് അഫ്‌സലിന്റെ മുന്നിലും പുറകിലും നിന്ന് നെഞ്ചിലും ഷോള്‍ഡറിലും ഇടിക്കുകയും താഴെ വീണ അഫ്‌സലിന്റെ മുഖത്തും നെഞ്ചിലും തലയുടെ പുറക് വശത്ത് ചവിട്ടുകയും ഇടിക്കുകയും ചെയ്തതില്‍ വച്ച് അഫ്‌സലിന്റെ ഇടത് മൂക്കെല്ലിനും മാക്‌സില്ലക്കും പൊട്ടല്‍ സംഭവിക്കുന്നതിനിട വരുത്തിയും അജ്മലിനെയും ദേഹോപദ്രവം ഏല്‍പ്പിക്കുകയും അഫ്‌സല്‍ കൈ കൊണ്ട് തടുത്തില്ലായിരുന്നെങ്കില്‍ മുഖത്തും തലയിലും മാരകമായ കൂടതല്‍ മുറിവുകള്‍ പറ്റി മരണം വരെ സംഭവിക്കത്തക്ക വിധം പ്രതികള്‍ കുറ്റകരമായ നരഹത്യ ശ്രമം നടത്തിയെന്നാണ് കേസ്. വിഴിഞ്ഞം സ്വദേശികളായ സെയ്ഫുദീന്‍ , അല്‍അമീന്‍ എന്നിവരാണ് മൂന്നും നാലും പ്രതികള്‍.