സാധാരണക്കാരായ എല്ലാവരുടെയും മനസ്സിലെ ആഗ്രഹമാണ് ഒരു പ്രാവശ്യമെങ്കിലും വിമാനത്തില്‍ കയറി യാത്ര ചെയ്യുക എന്നത്. എന്നാല്‍ ഇത്തരത്തിലുള്ള ആഗ്രഹം അവര്‍ മനസ്സില്‍ തന്നെ വയ്ക്കുകയും ചെയ്യും. സാധാരണ നാട്ടിന്‍ പുറങ്ങളില്‍ ജീവിക്കുന്നവരില്‍ മിക്കവരും വിമാനം ആകാശത്തുകൂടെ പോകുന്ന സൗണ്ട് കേള്‍ക്കുമ്പോള്‍ അവര്‍ അറിയാതെ തന്നെ മാനത്തേക്ക് നോക്കും. അവര്‍ക്ക് അറിയാം അത് വിമാനമാണ് പോകുന്നത് എന്ന് എന്നാല്‍പോലും അത് ആവര്‍ത്തിച്ചുകൊണ്ടേയിരിക്കും.

എന്നാല്‍ ഇവിടെ കുറച്ച് അമ്മമാര്‍ തങ്ങളുടെ ആഗ്രഹം മനസ്സില്‍ വയ്ക്കാതെ അത് പ്രാവര്‍ത്തികമാക്കാന്‍ പോവുകയാണ്. അതും അവരുടെ സ്വന്തം പണം കൊണ്ട്. ആ പണം മക്കളോ ഭര്‍ത്താവോ ആരും അവര്‍ക്ക് കൊടുത്തതല്ല. അവര്‍ ജോലിചെയ്ത് സമ്പാതിച്ച പണം കൊണ്ട്.

ജീവിതത്തിലാദ്യമായി വിമാനയാത്ര ചെയ്യാനൊരുങ്ങുന്നത് കോട്ടയത്തെ കുറച്ച് അമ്മമാരാണ്. അതും തൊഴിലൊറപ്പ് ജോലി ചെയ്യുന്ന അമ്മമാര്‍. തൊഴിലുറപ്പില്‍ നിന്നും കിട്ടിയ പണം കൊണ്ടാണ് ഇവര്‍ വിമാനയാത്രയ്ക്ക് തയ്യാറാകുന്നത്. ഇത് തൊഴിലുറപ്പ് ചെയ്യുന്ന എല്ലാവര്‍ക്കും അഭിമാനിക്കാവുന്ന കാര്യമാണ്. ബംഗലുരുവിലേക്കാണ് ഇവരുടെ യാത്ര. ഇവര്‍ ബംഗലുരുവില്‍ എത്തുമ്പോള്‍ ഇവരെ വിധാന്‍ സൗധ കാണിക്കാനും വിരുന്ന് കൊടുക്കാനും മുന്‍ എംഎല്‍എ ഐവാന്‍ നിഗഌ തയ്യാറായിരിക്കുകയാണ്.

ഇവര്‍ക്ക് സ്പീക്കറുമായി സംസാരിക്കാനുള്ള അവസരവും ഒരുക്കും. യാത്രയ്ക്കായി സര്‍ക്കാര്‍ ഡോര്‍മെട്രി അടക്കമുള്ള സൗകര്യം ഒരുക്കാനാണ് നീക്കമുണ്ട്. കോട്ടയം പനച്ചിക്കാട് ഗ്രാമപ്പഞ്ചായത്തിലെ വിളക്കാംകുന്നിലെ 21 സ്ത്രീകളാണ് വിമാനയാത്രയ്ക്ക് ഒരുങ്ങുന്നത്. റിപ്പബ്ലിക് ദിനത്തില്‍ രാവിലെ 6.45നു നെടുമ്പാശേരിയില്‍ നിന്നു ബെംഗളൂരുവിലേക്കാണ് വിമാന യാത്ര. ഇന്ന് പകല്‍ ബെംഗളൂരു മുഴുവന്‍ ചുറ്റിക്കറങ്ങി രാത്രിയില്‍ ഗരീബ് രഥ് എക്‌സ്പ്രസില്‍ കോട്ടയത്തേക്ക് മടങ്ങും.

തൊഴിലുറപ്പ്, കുടുംബശ്രീ, ഹരിതകര്‍മ സേന എന്നീ വിഭാഗങ്ങളില്‍ 77 കാരി അടക്കമുള്ളവരാണ് വിമാനയാത്ര നടത്തുന്നത്. 50 വയസ്സിനു മുകളിലുള്ളവരാണ് യാത്രാസംഘത്തില്‍ ഭൂരിപക്ഷവും. 70 വയസ്സിനു മുകളിലുള്ള 2 പേരുണ്ട്. മുതിര്‍ന്ന അംഗം ചെല്ലമ്മ വരെ യാത്രയ്ക്ക് തയ്യാറായി. വിവരം ഗ്രൂപ്പില്‍ പങ്കുവെച്ചതോടെ എല്ലാവരും യോജിച്ചു. മറ്റുള്ളവരുടെ പിന്തുണ കൂടിയായപ്പോള്‍ യാത്രയ്ക്കുള്ള തീരുമാനവുമായി മുമ്പോട്ട് പോയി. ഗ്രൂപ്പിനു നേതൃത്വം നല്‍കുന്ന സാലി രാജനാണ് യാത്രയുടെ ആശയം മുമ്പോട്ട് വെച്ചത്. ഒരു വര്‍ഷം കൊണ്ട് 73,000 രൂപ സ്വരൂപിച്ച ശേഷമാണ് ഇവര്‍ വിമാനടിക്കറ്റുകള്‍ ബുക്ക് ചെയ്തത്. പനച്ചിക്കാട്ടു നിന്നു നെടുമ്പാശേരിയിലെത്താന്‍ വാനും ഏര്‍പ്പാടാക്കി.
ഇത്തരത്തിലുള്ള യാത്രകള്‍ക്ക് ഇത് ഒരു തുടക്കമാകട്ടേയെന്നും മറ്റുള്ളവര്‍ക്ക് പ്രചോദനമാകട്ടെയെന്നും നമുക്കും ആശംസിക്കാം.