74-ാമത് റിപ്പബ്ലിക് ദിനാഘോഷത്തില്‍ രാജ്യം.... റിപ്പബ്ലിക്ദിനാഘോഷങ്ങളില്‍ ഈജിപ്ത് പ്രസിഡന്റാണ് മുഖ്യാതിഥി... രാജ്യമെങ്ങും അതീവ ജാഗ്രതയിലാണ്.

ജനുവരി 26 ന് രാജ്യം 74-ാമത് റിപ്പബ്ലിക് ദിനം ആഘോഷിക്കുകയാണ്. 1950-ല്‍ നമ്മുടെ രാജ്യത്തിന്റെ പരമോന്നത ഭരണഘടന നിലവില്‍ വന്നതിന്റെ ഓര്‍മ്മയ്ക്കായാണ് ഈ ദിനം ആചരിക്കുന്നത്. ആ ദിവസത്തെ പ്രധാന ആകര്‍ഷണങ്ങളില്‍ ഒന്നാണ് നമ്മുടെ രാജ്യത്തിന്റെ ക്ഷണം സ്വീകരിച്ച് മുഖ്യാതിഥിയായി എത്തുന്ന വിദേശ നേതാക്കള്‍.

എല്ലാ വര്‍ഷത്തേയും പോലെ ചടങ്ങിലെത്തുന്ന മുഖ്യാതിഥി മറ്റ് വിശിഷ്ടാതിഥികളോടൊപ്പം ആഘോഷങ്ങള്‍ക്ക് സാക്ഷ്യം വഹിക്കും. ന്യൂഡല്‍ഹിയിലെ കര്‍ത്തവ്യ പഥില്‍ പരേഡിനുള്ള ഒരുക്കങ്ങളെല്ലാം സജജ്മായി. ഇത്തവണ ഈജിപ്ഷ്യന്‍ പ്രസിഡന്റ് അബ്ദുല്‍ ഫത്താഹ് എല്‍-സിസി ആണ് ചടങ്ങിലെ മുഖ്യാതിഥി.

സാധാരണയായി മറ്റൊരു രാജ്യത്തിന്റെ രാഷ്ട്രത്തലവനെയാണ് റിപ്പബ്ലിക് ദിനത്തില്‍ മുഖ്യാതിഥി ക്ഷണിക്കുന്നത്. പല ഘടകങ്ങള്‍ പരിഗണിച്ച ശേഷമാണ് രാജ്യം ഒരു മുഖ്യാതിഥിയെ തിരഞ്ഞെടുക്കുന്നത്.

കോവിഡ് മൂലം ഏകദേശം രണ്ടു വര്‍ഷത്തിനു ശേഷമാണ് റിപ്പബ്ലിക് ദിനത്തില്‍ രാജ്യത്തേക്ക് മുഖ്യാതിഥി എത്തുന്നത്. ഈ ദിവസം ക്ഷണമനുസരിച്ച് ഇന്ത്യയിലെത്തുന്ന അതിഥിക്ക് രാഷ്ട്രപതി ഭവനില്‍ വച്ച് ഗാര്‍ഡ് ഓഫ് ഓണര്‍ നല്‍കുന്നു. ഇന്ത്യയുടെ റിപ്പബ്ലിക് ദിനാഘോഷത്തില്‍ അതിഥിയായി പങ്കെടുക്കുന്ന ആദ്യ ഈജിപ്ഷ്യന്‍ നേതാവ് ആണ് ഇത്തവണ മുഖ്യാതിഥിയായി എത്തുന്ന അബ്ദുല്‍ ഫത്താഹ് എല്‍-സിസി. ഈജിപ്റ്റുമായി പ്രാചീന കാലം മുതലേ ഊഷ്മളമായ ബന്ധം ഇന്ത്യ കാത്തുസൂക്ഷിച്ചിരുന്നു.

ആഫ്രിക്കന്‍ ഭൂഖണ്ഡത്തില്‍ നിന്നുള്ള ഇന്ത്യയുടെ ഏറ്റവും പ്രധാനപ്പെട്ട വ്യാപാര പങ്കാളിയായിരുന്നു ഈജിപ്റ്റ്. അതുകൊണ്ട് കൂടിയാണ് അല്‍സിസിയ്ക്കുള്ള ക്ഷണം വളരെയേറെ പ്രാധാന്യമര്‍ഹിക്കുന്നത്.
അതേസമയം 74-ാമത് റിപ്പബ്ലിക് ദിനാഘോഷത്തിന്റെ ഭാഗമായി രാജ്യമെങ്ങും അതീവ ജാഗ്രതയിലാണ് . ഡ്രോണ്‍ ആക്രമണത്തിന് സാധ്യതയുണ്ടെന്ന വിലയിരുത്തലില്‍ ഡല്‍ഹിയില്‍ പരിശോധനയും നിരീക്ഷണവും ശക്തമാക്കി. ജമ്മുകശ്മീരില്‍ സുരക്ഷാസേന ത്രിതല സുരക്ഷയാണ് ഒരുക്കിയിട്ടുള്ളത്.