സ്വാതന്ത്ര്യം നേടുമ്പോള്‍ ദരിദ്രവും നിരക്ഷരവുമായ രാഷ്ട്രമായിരുന്ന ഇന്ത്യ ഇന്ന് ലോകവേദിയില്‍ മുന്നേറുന്ന ആത്മവിശ്വാസമുള്ള രാഷ്ട്രമായി മാറിയെന്ന് രാഷ്ട്രപതി ദ്രൗപതി മുര്‍മ്മു. ലോകവേദിയില്‍ നേടിയെടുത്ത ആ ആദരവ് ഇന്ത്യയ്ക്ക് പുതിയ അവസരങ്ങളും ഉത്തരവാദിത്വങ്ങളും നല്‍കുന്നതായി രാഷ്ട്രപതി ദ്രൗപതി മുര്‍മ്മു. റിപ്പബ്ലിക് ദിനത്തോടനുബന്ധിച്ച് രാഷ്ട്രത്തോട് സംസാരിക്കുകയായിരുന്നു രാഷ്ട്രപതി.

ഇത്തവണത്തെ ജി 20 അദ്ധ്യക്ഷ സ്ഥാനം ഇന്ത്യ വഹിക്കുന്നത് ഇതിന് ഉത്തമ ഉദാഹരണമാണ്. ലോക വേദികളിലെ നമ്മുടെ ഇടപെടലുകളാണ് മാറ്റത്തിന് കാരണം.

ജി 20 അദ്ധ്യക്ഷ സ്ഥാനം കൂടുതല്‍ സമത്വമുള്ള സുസ്ഥിരമായ ഒരു ലോകക്രമം കെട്ടിപ്പടുക്കാനായി നേതൃത്വം നല്‍കുന്നതിന് രാജ്യത്തെ സഹായിക്കും. ആഗോള വെല്ലുവിളികള്‍ ഈ വേദിയില്‍ ചര്‍ച്ച ചെയ്ത് പരിഹരിക്കാനായി ശ്രമിക്കും. ലോക ജനസംഖ്യയുടെ മൂന്നില്‍ രണ്ടും ജി.ഡി.പിയുടെ 85 ശതമാനവും ജി 20 രാജ്യങ്ങളിലാണ്. ആഗോള താപനത്തിനും കാലാവസ്ഥ വ്യതിയാനത്തിനും ജി 20 കൂടുതല്‍ ഊന്നല്‍ നല്‍കേണ്ടതുണ്ട്. സ്വാതന്ത്ര്യം നേടുമ്പോള്‍ ദരിദ്രവും നിരക്ഷരവുമായ രാഷ്ട്രമായിരുന്ന ഇന്ത്യ ഇന്ന് ലോകവേദിയില്‍ മുന്നേറുന്ന ആത്മവിശ്വാസമുള്ള രാഷ്ട്രമായി മാറി. സര്‍ക്കാരിന്റെ ഇടപെടലുകളാണ് ഇത് സാദ്ധ്യമാക്കിയത്.

മഹാത്മജിയുടെ സര്‍വ്വോദയ എന്ന ആദര്‍ശം സാക്ഷാത്കരിക്കാനായി ഇനിയും ഏറെ ചെയ്യാനുണ്ട്. ഇന്ത്യ അഞ്ചാമത്തെ സാമ്പത്തിക ശക്തിയായത് സര്‍വ്വോദയ ദൗത്യത്തില്‍ നാം കൈവരിച്ച നേട്ടങ്ങളുടെ ഉദാഹരണമാണ് .

ആത്മനിര്‍ഭര്‍ ഭാരത് വലിയ പ്രതികരണമാണുണ്ടാക്കിയത്. ജനാധിപത്യത്തിന് വഴികാട്ടിയായ ഭരണഘടന അംഗീകരിക്കേണ്ടത് ഒരോ പൗരന്റെയും കടമയാണ്.

ഭരണഘടനാ ശില്‍പ്പി അംബേദ്ക്കറോട് രാഷ്ട്രത്തിന് എന്നും നന്ദിയുണ്ടായിരിക്കും.രാഷ്ട്ര നിര്‍മ്മാണത്തില്‍ സ്ത്രീകള്‍ക്ക് കൂടുതല്‍ അവസരം നല്‍കണം. ചൊവ്വ ദൗത്യ സംഘത്തിന് കരുത്ത് പകരുന്നത് അസാധാരണക്കാരായ സ്ത്രീകളാണ്. നാളത്തെ ഇന്ത്യയെ രൂപപ്പെടുത്തുന്നതില്‍ സ്ത്രീകള്‍ക്കാണ് വലിയ പങ്ക്. രാജ്യത്തിന് വേണ്ടി എല്ലാം ത്യജിച്ച് അതിര്‍ത്തിയില്‍ കാവല്‍ നില്‍ക്കുന്ന സൈനികരെ പ്രത്യേകം അഭിനന്ദിക്കുകയാണ്. രാജ്യത്തെ പ്രാപ്തമാക്കുന്ന കര്‍ഷകര്‍, തൊഴിലാളികള്‍, ശാസ്ത്രജ്ഞര്‍, നാടിന്റെ അംബാസഡര്‍മാരായ പ്രവാസികള്‍ എന്നിവരെയും ഞാന്‍ അഭിനന്ദിക്കുന്നു. നാടിന് വേണ്ടി ജീവന്‍ ത്യജിച്ച എല്ലാ സേനകളിലെയും ധീരഹൃദയരെ അഭിവാദ്യം ചെയ്യുന്നുവെന്നും രാഷ്ട്രപതി .