അനില്‍ ആന്റണിയെ കോണ്‍ഗ്രസുകാര്‍ നേരത്തെ ഓങ്ങി വച്ചതാണ്. ഇപ്പോഴാണ് തരത്തില്‍ കിട്ടിയത്. ഡിജിറ്റല്‍ മീഡിയയുടെ ചുമതല ഏല്‍പ്പിച്ചപ്പോള്‍ തുടങ്ങിയ കലിപ്പാണ്. ഇനിയും തടയിട്ടില്ലെങ്കില്‍ കെ മുരളീധരനെക്കാള്‍ വളരും. അതോടെ കൂട്ടയടിയാണ് കണ്ടത്. ഒരാളും പിന്തുണച്ചില്ല. ഇതാണ് അനില്‍ ആന്റണി കടുത്ത തീരുമാനത്തിലേക്ക് പോയി രാജിവച്ചത്.

അനില്‍ ആന്റണിയുടെ അഭിപ്രായപ്രകടനം അമ്പരപ്പാണ് സംസ്ഥാന കോണ്‍ഗ്രസില്‍ സൃഷ്ടിച്ചിരിക്കുന്നത്. രാജി കേരള നേതാക്കള്‍ക്ക് ആശ്വാസമായി. എ.കെ. ആന്റണിയുടെ മകനെതിരെ അവര്‍ക്കു കൂടുതല്‍ സ്വരം കടുപ്പിക്കേണ്ടി വന്നില്ല. വ്യക്തിപരമായുള്ള ഇഷ്ടം രാഷ്ട്രീയരംഗത്ത് അനിലിനോട് കേരള നേതാക്കള്‍ പുലര്‍ത്തിയിരുന്നില്ല.

കേന്ദ്രനേതൃത്വവും അദ്ദേഹത്തെ വിശ്വാസത്തിലെടുത്തില്ല. അതുകൊണ്ടുതന്നെ അനിലിന്റെ അഭിപ്രായ പ്രകടനത്തോടു കോണ്‍ഗ്രസ് സൈബര്‍ ഇടങ്ങളില്‍ നിന്നു തീരെ മാര്‍ദവമില്ലാത്ത പ്രതികരണങ്ങളുണ്ടായി. നിലപാടു വ്യത്യാസത്തിന്റെ പേരിലല്ല, ചീത്തവിളിയുടെ പേരിലാണു പദവി ഒഴിഞ്ഞതെന്നാണ് അനില്‍ പ്രതികരിച്ചതും.

തിരക്കിട്ട രാജിയുടെ കാര്യത്തില്‍ എ.കെ. ആന്റണിയുടെ വഴി തന്നെ മകനും സ്വീകരിച്ചു. ആന്റണി ഇതിനോട് മനസ്സു തുറന്നിട്ടില്ല. സംഘപരിവാറിന് അനുകൂലമായ സ്വരം മകനില്‍ നിന്നു വന്നെന്ന പഴി കേള്‍ക്കാന്‍ അദ്ദേഹം ആഗ്രഹിക്കുന്നുണ്ടാവില്ല. ലോക്‌സഭാ തിരഞ്ഞെടുപ്പല്ലാതെ മറ്റൊന്നിനെക്കുറിച്ചും ഇനി ചിന്തിക്കരുതെന്നു ചൂണ്ടിക്കാട്ടി കെപിസിസി നിര്‍വാഹകസമിതിയില്‍ അനാവശ്യ വിവാദങ്ങള്‍ വിലക്കിയത് ആന്റണി തന്നെയാണ്.

ഇപ്പോള്‍ മകന്‍ വിവാദത്തിന്റെ കേന്ദ്രബിന്ദുവായി, കോണ്‍ഗ്രസില്‍ നിന്നു തന്നെ അകലുകയും ചെയ്തു. തന്റെ നിലപാട് മകനും പിന്തുടരണമെന്ന് ആന്റണി ശാഠ്യം പിടിച്ചിട്ടില്ല. കോണ്‍ഗ്രസ് അധ്യക്ഷനായി മല്ലികാര്‍ജുന്‍ ഖര്‍ഗെയെ അവതരിപ്പിക്കുന്നതിനു ഡല്‍ഹിയില്‍ കാര്‍മികത്വം വഹിച്ച ആന്റണി പിന്നീട് കണ്ടത് ശശി തരൂരിനെ പിന്തുണച്ച് മകന്‍ രംഗത്തെത്തിയതാണ്.

പുതിയ തലമുറയുടെ താല്‍പര്യങ്ങളില്‍ ഇടപെടാന്‍ താനാരാണെന്ന നിസ്സഹായതയാണ് അടുപ്പമുള്ളവരോട് അദ്ദേഹം പങ്കുവച്ചത്. കോണ്‍ഗ്രസുകാര്‍ അനിലിനെ വിലമതിച്ചിരുന്നത് എ.കെ.ആന്റണിയുടെ മകന്‍ എന്ന നിലയില്‍ തന്നെയാണ്. കെപിസിസി ഡിജിറ്റല്‍ മീഡിയ കണ്‍വീനറായി മുല്ലപ്പള്ളി രാമചന്ദ്രന്‍ അനിലിനെ നിയോഗിച്ചതിനു പിന്നിലും ആ പരിഗണനയുണ്ട്.

നിയമസഭാ തിരഞ്ഞെടുപ്പുകാലത്ത് സമൂഹ മാധ്യമപ്രചാരണത്തിന് സാധ്യമായതെല്ലാം ചെയ്‌തെന്ന് അനില്‍ അവകാശപ്പെട്ടെങ്കിലും കോണ്‍ഗ്രസിന്റെ തന്നെ മറ്റൊരു സൈബര്‍ ടീം അദ്ദേഹത്തിനെതിരെ രംഗത്തുവന്നു. അതോടെ അനിലിന് കേരളരാഷ്ട്രീയത്തില്‍ താല്‍പര്യം കുറഞ്ഞു. പ്രഫഷനല്‍ കോണ്‍ഗ്രസ് ദേശീയ അധ്യക്ഷന്‍ കൂടിയായ ശശി തരൂരിനോടുളള സൗഹൃദത്തിലൂടെയാണ് അനില്‍ സമീപകാലത്ത് കോണ്‍ഗ്രസ് ബന്ധം തുടര്‍ന്നു വന്നത്.

അതേസമയം ബിബിസി ഡോക്യുമെന്ററി വിഷയത്തില്‍ അനിലിന്റെ അഭിപ്രായത്തെ പൂര്‍ണമായും തരൂര്‍ തള്ളി. പ്രശ്‌നങ്ങള്‍ ആളിക്കത്തിക്കാന്‍ ആളുണ്ട്, പരിഹരിക്കാന്‍ ആളില്ല എന്ന സ്ഥിതി കോണ്‍ഗ്രസില്‍ തുടരുകയാണ്. അനിലിന്റെ ഭാവി നീക്കത്തെപ്പറ്റി അഭ്യൂഹങ്ങള്‍ പ്രചരിച്ചു തുടങ്ങി. ആന്റണിയോട് ആലോചിച്ചല്ല രാജി എന്നാണ് അനില്‍ പറഞ്ഞത്. രാഷ്ട്രീയത്തില്‍ തുടരാനാണെങ്കില്‍ ആന്റണിയോട് ഉപദേശം തേടാതിരിക്കില്ലെന്ന് കോണ്‍ഗ്രസുകാര്‍ പ്രതീക്ഷിക്കുന്നു.

കെപിസിസി ഡിജിറ്റല്‍ മീഡിയ സെല്‍ കണ്‍വീനര്‍ അനില്‍ ആന്റണിയുടെ പ്രവര്‍ത്തനങ്ങളോടുള്ള എതിര്‍പ്പ് ഏറെ നാളായി പാര്‍ട്ടിയിലുണ്ടായിരുന്നു. പാര്‍ട്ടി നേതൃത്വത്തില്‍ പലരോടും അനിലും വിയോജിപ്പിലായിരുന്നു. ഗുജറാത്ത് കലാപത്തെക്കുറിച്ചുള്ള ബിബിസി ഡോക്യുമെന്ററി വിയോജിപ്പുകളെ മറനീക്കി. ഡോക്യുമെന്ററി വിഷയത്തില്‍ കോണ്‍ഗ്രസ് നയത്തിനു വിരുദ്ധമായ നിലപാടെടുത്ത അനിലിനെ പിന്തുണച്ച് ആരും രംഗത്തെത്തിയില്ലെന്നതും ശ്രദ്ധേയമായി. ഏറ്റവും അടുപ്പം പുലര്‍ത്തുന്ന തരൂരിന്റെ പിന്തുണയും അനിലിനു ലഭിച്ചില്ല. തനിക്കെതിരായ പ്രചാരണങ്ങള്‍ക്കു പിന്നില്‍ ചില കോണ്‍ഗ്രസുകാര്‍ തന്നെയാണെന്നും ഉചിതമായ സാഹചര്യത്തില്‍ അതു വെളിപ്പെടുത്തുമെന്നും അനില്‍ പ്രഖ്യാപിച്ചത് വിവാദങ്ങള്‍ തുടരുമെന്ന സൂചന നല്‍കുന്നു.