റിപ്പബ്ലിക് ദിനത്തില്‍ നാരീശക്തി' പ്രമേയമാക്കി കേരളം അവതരിപ്പിച്ച ഫ്‌ലോട്ടിന് അഭിനന്ദനം... കളരിപ്പയറ്റും ഗോത്രനൃത്തവും ചെണ്ടമേളം അടക്കമുള്ള നാടന്‍ കലാരൂപങ്ങള്‍ ഉള്‍പ്പെടുന്നതായിരുന്നു സംസ്ഥാനത്തിന്റെ ഫ്‌ലോട്ട്.

വിവിധ മേഖലയിലെ 24 സ്ത്രീകള്‍ അണിനിരന്ന ഫ്‌ലോട്ടില്‍ നഞ്ചിയമ്മയുടെ നാടന്‍പാട്ടും കേള്‍പ്പിക്കുകയും ചെയ്തു. രാഷ്ട്രപതി ദ്രൗപതി മുര്‍മു അടക്കമുള്ള വിശിഷ്ട വ്യക്തികള്‍ ഫ്‌ലോട്ടിനെ കയ്യടിച്ച് അഭിനന്ദിക്കുകയുണ്ടായി.

സ്വാതന്ത്ര്യത്തിന്റെ 75-ാം വാര്‍ഷികവേളയില്‍ 2022ല്‍ നടന്ന റിപ്പബ്ലിക്ദിന പരേഡില്‍ നിന്ന് ശ്രീനാരായണ ഗുരുവിന്റെ ശില്‍പം ഉള്‍പ്പെട്ട കേരളത്തിന്റെ ഫ്‌ലോട്ട് കേന്ദ്രസര്‍ക്കാര്‍ തള്ളിയത് വലിയ വിമര്‍ശനത്തിന് വഴിവെച്ചിരുന്നു.

ചടയമംഗലത്തെ ജടായുപ്പാറയുടെ ദൃശ്യമാതൃകക്കൊപ്പം കേരളം തയ്യാറാക്കിയ നിശ്ചല ദൃശ്യത്തില്‍ ശങ്കരാചാര്യരുടെ ശില്‍പം ഉള്‍ക്കൊള്ളിക്കണമെന്ന നിര്‍ദേശം കേന്ദ്ര സര്‍ക്കാര്‍ മുന്നോട്ടുവെച്ചിട്ടുണ്ടായിരുന്നു.

മതേതര കേരളമെന്ന നിലയില്‍ അതിനു തയ്യാറാകാതെ ശ്രീനാരായണ ഗുരുവിന്റെ ശില്‍പമാണ് കേരളം ഉള്‍പ്പെടുത്തിയത്. തൊട്ടുപിന്നാലെ കാരണമൊന്നും വിശദീകരിക്കാതെ കേരളത്തിന്റെ നിശ്ചല ദൃശ്യം കേന്ദ്രം വെട്ടി. ഇതിനെതിരെ ശിവഗിരി മഠം അടക്കം പരസ്യമായ പ്രതിഷേധം പ്രകടിപ്പിച്ചിട്ടുണ്ടായിരുന്നു.