കരമന നെടുങ്കാട് സജി കൊലക്കേസ്... വധശിക്ഷാ തടവുകാരനായ അമ്മക്കൊരുമകന് സോജുവടക്കം 9 പ്രതികള് , അന്വേഷണ ഉദ്യോഗസ്ഥനായ മുന് കരമന സര്ക്കിള് ഇന്സ്പെക്ടറും നര്ക്കോട്ടിക് സെല് അസി.കമ്മീഷണറെ വിസ്തരിച്ചു, തുടര് വിസ്താരത്തിനായി മാര്ച്ച് 15 ന് ഹാജരാകണം, സോജുവിനെ ഹാജരാക്കാന് പ്രൊഡക്ഷന് വാറണ്ട്
സിറ്റിയിലെ പ്രബല ഗുണ്ടാ സംഘത്തലവന്മാരായ അമ്മക്കൊരു മകന് സോജുവും ചൂഴാറ്റുകോട്ട അമ്പിളിയും തമ്മിലുള്ള കുടിപ്പകയില് 2012 ല് മൃഗീയമായി നടന്ന കരമന സജി കൊലക്കേസില് അന്വേഷണ ഉദ്യോഗസ്ഥനായ മുന് കരമന സര്ക്കിള് ഇന്സ്പെക്ടറും നര്ക്കോട്ടിക് സെല് അസി.കമ്മീഷണറുമായ ഷീന് തറയലിനെ വിചാരണ കോടതി മുപ്പത്തഞ്ചാം സാക്ഷിയായി വിസ്തരിച്ചു.
തിരുവനന്തപുരം ഏഴാം അഡീ. ജില്ലാ സെഷന്സ് കോടതിയാണ് സാക്ഷി വിസ്താരം നടക്കുന്നത്. തുടര് വിസ്താരത്തിനായി മാര്ച്ച് 15 ന് ഷീന് തറയില് ഹാജരാകാന് കോടതി ഉത്തരവിട്ടു. അന്നേ ദിവസം വധശിക്ഷാ തടവുകാരനായ ഒന്നാം പ്രതി സോജുവിനെ ഹാജരാക്കാന് പ്രൊഡക്ഷന് വാറണ്ട് അയക്കാനും കോടതി ഉത്തരവിട്ടു. കേസില് ഇതിനോടകം 35 സാക്ഷികളെ വിസ്തരിക്കുകയും 44 രേഖകളും പ്രതികള് കൃത്യത്തിനുപയോഗിച്ച13 തൊണ്ടി മുതലുകളും അക്കമിട്ട് തെളിവില് സ്വീകരിച്ച് വിചാരണ അന്തിമ ഘട്ടത്തിലെത്തി നില്ക്കേയാണ് .
ജെറ്റ് സന്തോഷ് കൊലക്കേസില് വധശിക്ഷാ തടവുകാരനും 24 ക്രിമിനല് കേസുകളില് പ്രതിയുമായ അമ്മക്കൊരുമകന് സോജുവടക്കം 9 പ്രതികളാണ് സജി കൊലക്കേസില് വിചാരണ നേരിടുന്നത്. സോജു എന്ന അജിത് കുമാര് , ഹരികുമാര് എന്ന രഞ്ജിത് , സാബു , നെടുങ്കാട് തളിയില് സ്വദേശി പുഞ്ചിരി വിനോദ് എന്ന വിനോദ് (29) , ചെണ്ട മനു എന്ന മനു , ചെത്ത് ഷാജി എന്ന ഷാജി , വെട്ട് അനി എന്ന അനില് കുമാര് , സതീഷ് കുമാര് , അജു എന്ന ഷെറിന് എന്നിവരാണ് സജി കൊലക്കേസില് വിചാരണ നേരിടുന്ന 9 പ്രതികള്.
2004 ല് ജെറ്റ് സന്തോഷിനെ കൈകാലുകള് വെട്ടിമാറ്റി മലയിന്കീഴ് ആലന്തറ കോളനിയില് 6 കഷണങ്ങളാക്കി മൃഗീയമായി കൊന്ന് ഓട്ടോറിക്ഷയില് തള്ളിയത് മുതല് സിറ്റിയിലെ പ്രബല ഗുണ്ടാസംഘങ്ങള് തമ്മില് നടന്ന സീരിയല് കൊലപാതകങ്ങളുടെ ബാക്കി പത്രമാണ് സജി കൊലക്കേസ്.
സോജുവിന്റെ അളിയന് മൊട്ട അനിയെ 2006 ല് അമ്പിളിയുടെ സംഘം കൊലപ്പെടുത്തിയ വിരോധത്തില് ആ കൊലപാതക സംഘത്തലവനായ ചൂഴാറ്റു കോട്ട അമ്പിളിയുടെ ഒളിയിടം കാട്ടിക്കൊടുക്കാന് അമ്പിളിയുടെ വലംകൈയ്യായ സജിയെ 2012 സെപ്റ്റംബര് 6 ന് രാത്രി മുഴുവന് പല സ്ഥലങ്ങളില് കൊണ്ടുപോയി അന്യായ തടങ്കലില് വെച്ച് വെട്ടിയും തുടയിലും മുതുകിലുമായി 9 കുത്തിയും മൃതപ്രായനാക്കി വിവരം ലഭിക്കാത്തതിനാല് കൊന്ന് വെളുപ്പിന് നെടുങ്കാട് തള്ളിയെന്നാണ് കേസ്. സജിയെ തടങ്കലില് വക്കും മുമ്പ് അമ്പിളിയുടെ മറ്റൊരു സംഘാംഗമായ മണികണ്ഠനെ ശരീരമാസകലം കത്തി കൊണ്ട് വരഞ്ഞു റോഡില് തള്ളിയിരുന്നു.
മൊട്ട അനിയുടെ ഭാര്യയുമായി അവിഹിത ബന്ധം സംശയിച്ച് ഭാര്യയെക്കൊണ്ട് ജെറ്റ് സന്തോഷിനെ 2004 ല് കരമന വിളിച്ചു വരുത്തി ബാര്ബര് ഷോപ്പില് നിന്നും ടാറ്റാ സുമോയില് തട്ടിക്കൊണ്ടു പോയി കൈ കാലുകള് വിച്ചേദിച്ച് മൃഗീയമായി കൊലപ്പെടുത്തിയ ജെറ്റ് സന്തോഷ് കൊലക്കേസില് ഒന്നാം പ്രതിയായ സോജുവും ഏഴാം പ്രതിയായ ജാക്കി അനിയെന്ന അനില്കുമാറും വധശിക്ഷക്ക് വിധിക്കപ്പെട്ട് മരണവാറണ്ടില് തടവറക്കുള്ളില് കഴിയുകയാണ്.
"
https://www.facebook.com/Malayalivartha
