കാലങ്ങളായ് ക്ഷേത്രമുതലുകള്‍ കട്ടുമുടിക്കുകയാണ് രാഷ്ട്രീയക്കാര്‍. വിശ്വാസമില്ല പക്ഷെ ദൈവത്തിന്റെ മുതല്‍ വേണം. ഒരു മാനദണ്ഡങ്ങള്‍ പാലിക്കാതെ ക്ഷേത്രങ്ങളുടെ ഭരണതലപ്പത്ത് രാഷ്ട്രീയക്കാര്‍. മലബാറില്‍ ക്ഷേത്രംട്രസ്റ്റികളില്‍ 99% രാഷ്ട്രീയക്കാര്‍. ഇതില്‍ സിപിഎമ്മുകാരുടെ അതിപ്രസരം. നിരീശ്വരവാദികളാണ് പക്ഷെ ക്ഷേത്രമുതലില്‍ കൈയ്യിട്ടുവാരും. ക്ഷേത്രം ട്രസ്റ്റികളായി പാര്‍ട്ടിക്കാര്‍ വേണ്ടാ എന്ന് കോടതി ഉത്തരവിട്ടിട്ടും ട്ര്‌സറ്റിമാരായ് അള്ളിപ്പിടിച്ച് കിടക്കുകയാണ് ഇക്കൂട്ടര്‍. കീശവീര്‍പ്പിക്കാന്‍ ഇതില്‍പ്പരം നല്ലൊരു വകുപ്പ് വേറെയില്ലല്ലോ.

മലബാര്‍ ദേവസ്വം ബോര്‍ഡില്‍ പാരമ്പര്യേതര ട്രസ്റ്റികളായി വരുന്നവരില്‍ 99 ശതമാനവും രാഷ്ട്രീയപ്പാര്‍ട്ടികളുടെ നോമിനികള്‍. ക്ഷേത്രട്രസ്റ്റികളായി ആളെ കൊണ്ടുവരുന്നതില്‍ മാനദണ്ഡങ്ങള്‍ കൃത്യമായി പാലിക്കപ്പെടുന്നില്ലെന്നും ട്രസ്റ്റികളില്‍ സജീവരാഷ്ട്രീയക്കാരുണ്ടെന്നും ആരോപണമുണ്ട്. കോഴിക്കോട് പേരാമ്പ്രയില്‍ ബ്ലോക്ക് പഞ്ചായത്ത് അംഗവും സി.പി.എം. ലോക്കല്‍ കമ്മിറ്റി അംഗവുമായ പ്രാദേശികനേതാവാണ് ഒരു പ്രധാന ക്ഷേത്രത്തിന്റെ ട്രസ്റ്റിബോര്‍ഡ് ചെയര്‍മാനായിരിക്കുന്നത്. പ്രാദേശികതലത്തില്‍ മേല്‍കൈയുള്ള ഭരണകക്ഷിക്കാര്‍ തന്നെയാണ് ഒട്ടുമിക്ക ക്ഷേത്രങ്ങളിലും പാരമ്പര്യേതര ട്രസ്റ്റിയായിവരുന്നത്. ഇവരില്‍ പലര്‍ക്കും ക്ഷേത്രകാര്യങ്ങളുമായി ബന്ധമില്ലെന്നും വിശ്വാസികളല്ലെന്നുമുള്ള പരാതിയുയര്‍ന്നിരുന്നു.

എന്നാല്‍, ഇക്കാര്യത്തില്‍ ബോര്‍ഡിന്റെ മാര്‍ഗനിര്‍ദേശങ്ങള്‍ കര്‍ശനമായി പാലിച്ചുവരുന്നുണ്ടെന്നും കോടതിവിധി അത് ആവര്‍ത്തിച്ച് ഓര്‍മപ്പെടുത്തുക മാത്രമാണ് ചെയ്തതെന്നും പ്രസിഡന്റ് എം.ആര്‍. മുരളി പറഞ്ഞു. മലബാര്‍ ദേവസ്വം ബോര്‍ഡിന് കീഴിലെ 1400 ക്ഷേത്രങ്ങളില്‍ പകുതിയില്‍ താഴെ ക്ഷേത്രങ്ങളിലേ ട്രസ്റ്റി ബോര്‍ഡ് ഭരണമുള്ളൂ. അതില്‍തന്നെ പാരമ്പര്യേതര ട്രസ്റ്റിമാരുള്ളത് 25 ശതമാനം ക്ഷേത്രങ്ങളില്‍ മാത്രമാണ്. അവരെ സംബന്ധിച്ച് പൊതുവേ പരാതി വിരളമാണ്. പൊതുജനങ്ങളില്‍നിന്ന് അപേക്ഷ ക്ഷണിച്ച് പരസ്യപ്പെടുത്തി ക്ഷേത്രകാര്യങ്ങളില്‍ തത്പരരായ നാട്ടുകാരെതന്നെയാണ് എടുക്കുന്നതെന്നും 100 ശതമാനം സൗജന്യസേവനമാണ് അവര്‍ നടത്തുന്നതെന്നും പ്രസിഡന്റ് ചൂണ്ടിക്കാട്ടി. എന്നാല്‍, ട്രസ്റ്റി നിയമനവിജ്ഞാപനത്തില്‍ പറയുന്ന പ്രകാരമുള്ള യോഗ്യതയുണ്ടോ എന്ന അന്വേഷണം പാരമ്പര്യേതര ട്രസ്റ്റിമാരുടെ കാര്യത്തില്‍ ബോര്‍ഡ് നടത്താറില്ലെന്നതാണ് വസ്തുത. പലപ്പോഴും പാര്‍ട്ടി ശുപാര്‍ശയാണ് പരിഗണിക്കുന്നത്. എന്തെങ്കിലും വലിയ വിവാദമുണ്ടാവുമ്പോള്‍ മാത്രമാണ് ബോര്‍ഡ് പ്രത്യക്ഷത്തില്‍ ഇടപെടുന്നത്. പ്രദേശികമായി എതിര്‍പ്പില്ലെങ്കില്‍ അസി. കമ്മിഷണര്‍ ട്രസ്റ്റി ബോര്‍ഡിന്റെ തീരുമാനം അംഗീകരിക്കുകയാണ് പൊതുവേ ചെയ്യാറ്.

മലബാറിലെ അവസ്ഥ മാത്രമല്ല ഇത്. ക്ഷേത്രങ്ങള്‍ സിപിഎമ്മുകാര്‍ക്ക് കീശവീര്‍പ്പിക്കാനുള്ള മാര്‍ഗ്ഗം മാത്രമാണ്. അല്ലാതെ വിശ്വാസം സംരക്ഷിക്കുകയെന്ന ചിന്തകളല്ല. ശബരിമലയിലും ഗുരുവായൂരിലുമൊക്കെ നടക്കുന്ന അഴിമതികള്‍ പലപ്പോഴായ് പുറത്തുവന്നിട്ടുള്ളതാണ്. എന്നാല്‍ ഇതിനെതിരെയൊന്നും ഒരു നടപടിയും ഉണ്ടായിട്ടില്ല. ഗുരുവായൂര്‍ ക്ഷേത്രത്തിലെ കോടികളാണ് സര്‍ക്കാര്‍ ഖജനാവിലേക്ക് മറിഞ്ഞത്. ഗുരുവായൂര്‍ ദേവസ്വത്തിന്റെ ഒത്താശയോടെയാണ് കോടികള്‍ സര്‍ക്കാരിലേക്ക് പോയത്. പിന്നീട് ഈ വിഷയം കോടതി കയറിയതോടെ കോടതിയും രോഷത്തോടെയാണ് പ്രതികരിച്ചത്. ക്ഷേത്ര സ്വത്തില്‍ കൈകടത്തരുതെന്ന് കോടതി വ്യക്തമാക്കിയത്. ശബരിമലയില്‍ പിന്നെ ദേവസ്വംബോര്‍ഡ് ഭണ്ഡാരം വിഴുങ്ങുകയാണ്. പാര്‍ട്ടിക്കാര്‍ക്ക് വേണ്ടപ്പെട്ടവരെയൊക്കെയാണ് ക്ഷേത്രങ്ങളുടെ തലപ്പത്ത് പ്രതിഷ്ടിക്കുന്നത്. എന്തുകൊണ്ട് ക്ഷേത്ര സ്വത്തില്‍ മാത്രം കൈയ്യിട്ട് വാരുന്നു. സിപിഎമ്മുകാര്‍ കൈയ്യിട്ട് വാരി മുടിക്കുകയാണ് ക്ഷേത്രസ്വത്തുകള്‍.